1 TOMU-TOMUNDO' 5 - KITAB NU TUMPU ALLA LELE MA'IMAI'

I Salomo binatanga'mo mombau Laigan nu Tumpu

¹ I Hiram, tomundo' nu aha Tirus, saja'mo no bela' tiba i Tomundo' Daud. Salatan i hongomo i Hiram na i Salomo binaumo tomundo' pinombolosi i Daud, tuumanyo ia nonsaimo mian namba hi Salomo.

² Lantas i Salomo nomputuunmo sumo uuka hi Hiram,

³ “Belento Tomundo' Hiram anu talasanggo! Tantu o sumbu'mo nu belento Tuan na tuumangku i Daud saja' pagala sabole-bole nahampate kalana saja' nu tumbuhi nu to lipu-lipu' anu aitu mae montikubi kami, ka' monsampo bali kami. Jadi kalana Tumpu ma'isa nombee'i ia kauntungan nahampate nongewa aha sampo bali'nyo, sahingga ia ma'isa kino tempo' mompotinjo laigan bau ponsombahnyo Tumpu Allah.

⁴ Panyo' uuka aiya Tumpu Allah-ngku nombee'imo ka'amanan i da'erah kakuasa'anku iwi-iwi'. Madi'mo ko anu monsampo bali' aku, ka' madi'mo suele ko balaa' anu nontokai mae lipu'ku.

⁵ Tumpu nojanji'mo hi tuumangku, i Daud sumo uuka, 'Anak nu beleyum momo'ane na Ku hangkatje bau tomundo' mombolosakon beleyum, iaje na mompotinjo laigan bau ponsombaan mae Aku.' Kalana aijo' kita Tuan Hiram Anu talasanggo aku i Salomo nombaumo kaputusan da mompotinjomo laigan aijo'.

⁶ Sinumbu'mo nu belento Tuan saba' mianku i aiya madi' ko anu monsumbu' monta' kau' susumo mian nu belento Tuan. Kalana aijo' ku poita de timbali da belento Tuan mompalentah to mia-mian nu belento Tuan monta'iakon mae aku kau' lontio' i Libanon. Mianku ku palentahje da montulungi aha, ka' maumo sangkuka na tambonyo anu otantukan mae nu belento Tuan, bau pontamboi mian haha aijo' ku bayanje.”

⁷ I Hiram sinanang hondo na nohumpak lele aijo'. Ia notatae, “O puji' na Tumpu sinaa aiya kalana Ia nombee'imo i Daud samian anak mo'ane anu pande hondo binau tomundo' hi bansa anu daka' sumo aijo'.”

⁸ Lantas i Hiram nonsaimo mian namba nompoto'i hi Salomo, “I humpakmo na lele apaa na anu nu poita nu belento Tuan, ka tionyo ahi' ku bau. Ku alapije kau' lontio' i Libanon ka' kau' lontio' biasa susumo anu pinoitamo nu belento Tuan.

⁹ To mia-miankuje na momboa kau' haha aijo' otudunakon lengkat mae i Libanon mokaiyong i ambai. I kiijo' batang nu kau' haha aijo' nu botokje nu aha susumo aki'an ka' oloyoje nu aha monduhuk bone' mamba i tampat anu pinoto'imo nu belento Tuan. Toka i kiijo' aki'an haha aijo' o tatakije ka' obee' hi to mia-mian nu belento Tuan na molausakon pakalaja'an aijo'. Ola ahi' belento Tuan ku poita da belento Tuan montoukai anu o kaan nu to mia-mian anu mokalaja hi belengku i laigan nu tomundo'.”

¹⁰ Sahingga i Hiram nombee'imo i Salomo iwi-iwi' na kau' lontio' nu Libanon ka' kau' lontio' biasa iyamo na konjoo'nyo anu opalalui.

¹¹ Ka' pombee'i mongkaan to mia-main anu mokalaja i laigan nu tomundo' Hiram aijo' toto sataun i Salomo mombee'imo i Hiram 322.500 na kilogram gandum, 4.400 na liter nu lanya' zaitun anu madi' ko galo'nyo.

¹² Tumpu nompodaagi'mo janji'-Nyo ka' nombee'imo kapandean hi Salomo. I Hiram ka' i Salomo nompaha sumbu'mo ima-ima'. Ka' aha ua'aha aijo' nombaumo palajanjian.

¹³ I tomundo' Salomo nompalentahmo aha 30.000 na mian to momo'ane ingala mae hi aha songko-songko na Israel da mombau kalaja anu opalentahkon.

¹⁴ Ka' mohangkatmo i Adoniram da monjagai aha. I Salomo nombagimo aha totolu' na gombuannyo, toto sa'angu' sampulu' na madala na mian. Totolu' na gombuannyo aijo' mobolo-bolos toto sambitu'on na jojoong i Libanon ka' ohua' na bitu'on na jojoong i laigan.

¹⁵ I Salomo suele nompalentahmo 80.000 na mian mompa'at batu anu lengkat mae i bungkutnyo ka' 70.000 na mian anu mongato batu haha aijo'.

¹⁶ Ia menghangkat 3.300 mandur da mongawasi pakalajaan aijo'.

¹⁷ Ka' suele pinalentahnyomo na aha mompa'at batu toto daka-daka' ka' to ima-ima' bau pompotinjoan Laigan nu Tumpu.

¹⁸ Sumo aijo' na to mia-mian anu mokalaja pinalentah i Salomo ka' to mia-mian anu mokalaja pinalentah i Hiram ka' suele to mia-mian anu lengkat mae i kota Gebal da montoukai batu tiba kau' da bau Laigan nu Tumpu aijo'.