1 TOMU-TOMUNDO' 4 - KITAB NU TUMPU ALLA LELE MA'IMAI'

To mia-mian anu ko pangkatnyo mokalaja hi Salomo

¹ I Salomo tinimbalimo tomundo' i lipu' nu aha Israel songko-songko.

^2-6 Aiyamo na to mia-mian anu ko pangkatnyo matangkas i hangkat i Salomo: To imam-imam: i Zadok, i Azarya anak i Zadok, i Abyatar Julu tulis nu Negara: i Elihoref ka' i Ahia, aijo'mo to anak-anak i Sisia. Anu montoongi doi nu negara: i Yosafat anak i Ahilud Talenga' nu suludadu: i Benaya anak i Yoyada Anu mongkapalai to kapala-kapala nu da'erah: i Azarya, anak i Natan Anu mompokinde' i tomundo': i Imam Zabud, anak i Natan. Anu mongatun ulusan nu laigan i tomundo': a Ahisar. Kapala nu mian anu mokalaja pakalaja'an anu nu palentahkon nu tomundo;; i Adoniram, anak i Abda.

⁷ I Salomo nohangkatmo sampulu' ka' ohua' na kapala da'erah songko-songko i lipu' nu Israel. Kalaja nu aha aijo'mo molimu' anu nu kaan nu tomundo' ka' aha salaigan anu o'alamae i da'erah nu aha. Toto samian na Kapala Da'erah mompangakui mae anu o kaan i uno nu sambitu'on, sataun toka sataun.

^8-19 Aha sampulu' ka' ohua' na kapala da'erah aijo', samian na gubernur na mongkapalai. Aiya na sanggo nu to kapa-kapala da'erah haha aijo' ka' da'erah anu nu kuasai nu aha: I Ben-Hur: da'erah nu bungkutnyo Efraim I Ben-Deker: kota Makas, Saalbim, Bet-Semes, Elon, Bet-Hanan I Ben-Hesed: kota Arubot, Sokho, ka' songko-songko na da'erah Hefer. I Ben-Abinadab, langkai' i Tafat anak boune i Salomo: songko-songko na da'erah Dor. I Baana anak i Ahilud: kota Taanakh, Megido ka' songko-songko na da'erah koko Bet-Sean, koko kota Sartan i sasu selatan kota Yizreel sampe toka-toka mokiijo' i kota Abel-Mehola ka' kota Yokmeam. I Ben-Geber: kota Ramot i Gilead, to kampu-kampung i Gilead anu nu aha mae mian nu Yair lee' mae i Manasye, da'erah Argob i Basan; iwi-iwi' 60 na kota daka' anu pinohoson nu benteng ka' pinaha supatan nu tambaga I sabatannyo toto daka-daka' I Ahinadab anak i Ido: da'erah Mahanaim I Ahimaas, langkai' i Basmat anak boune i Salomo: da'erah Naftali I Baana anak i Husai: da'erah Asyer, kota Alot I Yosafat anak i Paruah: da'erah Isakhar I Simei anak i Ela: da'erah Benyamin I Geber anak i Uri: da'erah Gilead, anu naipuan mae nu kuasai i Sihon tomundo' nu aha Amori ka' i Og tomundo' nu Basan.

Tinalasanggomo na i Salomo nompalentah

²⁰ Mian da'isan nu aha Yehuda ka' Israel konjoo'nyo sumomo bone' i biwi nu ambai. Sukup na anu nu kaan nu aha ka' anu nu inum ka' sanaang na kantumuu'an nu aha.

^21-25 Toto sangauwan ko ale' nu anggur ka' ale' nu ara. Tempo'nyo i Salomo dagi' tutuu' mian da'isan i songko-songko Yehuda ka' Israel lengkat mae i Dan toka-toka i Bersyeba kantuumu'an nu aha sinanangmo ka' madi'mo ko anu mompoposia. Kalana iwi-iwi' na tomundo' i sasu kinsoban Efrat nabuhukmo hi ia ka' iwi-iwi' na bansa nu to nega-negara anu mompaha o ohani kalaja'annyo nobela'mo tiba ia. Tano' i sasu kinsoban kaunyo nu Efrat lengkat mae i Tifsah i sohipi' nu kaunyo Efrat lau-laus no kiijo' i sasu kinsoban i kota Gaza i da'erah nu aha Filistin toka-toka i pontempasan tiba Mesir, songko-songko kinuasanmo i Salomo. To bansa-bansa i lipu' aijo' nabuhukmo ka' nombayanmo hasin hi ia. Ngangahan nu anu o kaan anu nu palalui i Salomo sansina-sinaa 5.000 liter labu anu i hihikmo, 10.000 liter labu anu ma'isa i hihik, 10 na sapi' anu opangkunakon, 20 na sapi' anu o polapas i padang, ka' 100 na domba ka' sangga'at mule' jonga kijang, menjangan ka' binatang anu lumahap.

²⁶ I Salomo ko suludadunyo 12.000 anu monsake'i ajahan ka' 40.000 na pangkun nu to aja-ajahan anu mohela' to kereta-keretanyo.

²⁷ Mobolo-bolos i uno nu sambitu'on toto samian na kapala da'erah mombee'i anu nu kaan hi Tomundo' Salomo ka' iwi-iwi' na mian anu mohumpak pombagian anu o kaan i laigan nu tomundo', sahingga saja' daagi na anu nu palalui nu aha.

²⁸ Toto samian na kapala da'erah haha aijo' mombee'i suele gandum ka' haat nu gandum bau pompakan ajahan i Salomo, mau ajahan anu o sake'i kabai ajahan pohela' kareta. Pompakan binatan haha aijo' oboa i pangkun nu ajahan haha aijo', yamo ahi' konjoo'nyo na anu opalalui.

²⁹ Tumpu Allah nombee'imo kapandean hi Salomo ka' pikilan anu matangkas hondo, ka' moko ala mompotutugakon anu mahan

³⁰ I to lipu-lipu' isasu kabete'an ka' Mesir madi'mo ko mian anu pande molingkudui ia.

³¹ Ia totu-totu'u pande hondo molingkudui mian iwi-iwi'. Ia molingkudui i Etan mian nu Ezrahi, i Heman, i Kalkon ka' Darta to ana-anak i Mahol. Sanggo i Salomo tinalasanggomo iyaya mae na to lipu-lipu' anu montikubi kalaja'annyo.

³² Daagi' ko landoni'nyo; 3.000 na konjoo'nyo ka' samadala labih na nyanyian anu ti nulisnyo.

³³ Ia monsumbu' mompangalati'i henggo nu to kau-kau' ka' to hempu-hemput lengkat pe'e kau' lontio' anu kiita' mae i Libanon toka-toka i hemput hisop anu tuumu' i tungebe nu batu Ia mompangalati'i onyi' nu bina-binatang sumo tomonsi', binatang anu jumolo ka' ikan.

³⁴ To tomu-tomundo' anu i songko-songko na dunia nohongomo kapandean i Salomo, sahingga aha nonsaimo mian namba hi ia mompotombihing ia.