1 TOMU-TOMUNDO' 21 - KITAB NU TUMPU ALLA LELE MA'IMAI'

Ale' nu anggur i Nabot

¹ Koko laigan i Tomundo' Ahab kiijo' i Yizreel daagi' ko ale' nu anggur anu nu mian sanggonyo i Nabot.

² “Bee'mo mae na ale' nu anggur nu beleyum aijo' hi belengku, kalana ale' aijo' ohani tiba laiganku. Aku ko kahanda' monsu'an ngangahan nu utan i kiijo'. Beleyum mohumpakje ale' nu anggur anu lebeh ma'ima' salaku bolosnyo kabai beleyum mongka'oho' da ku olimo, nu olinyo anu memang pantas.”

³ Tinaaman i Nabot “Ale' nu anggur aiya pusaka' nu nompolee'ku. Iuno nu sanggo nu Tumpu, madi' timbali ku bee' hi belento Tuan?”

⁴ Kinyonyoanyo madi'mo sinanang ka' notambuha'mo kalana nohongomo apaa na anu tinaloakon i Nabot hi ia, i Ahab ninsusule'mo ka' nale'mo i kahoyotannyo ohupnyo pinsonggilingnyo ka' madi'mo mongka'oho' mongkaan.

⁵ I Izebel bengkele'nyo nambamo hi ia ka' nompokilawa, “Kadaka' beleyum madi'mo sinanang na kinyonyoa? Kadaka' madi'mo mongka'oho' mongkaan?”

⁶ Tinaaman i Ahab, “Aku madi'mo sinanang hi Nabot. Pinoitangkumo hi ia da opobaluk mae na ale' nu anggurnyo hi belengku, kabai ku tolosi nu ale' nu anggur sangga'at de aijo' na anu nu ka'ima'i, panyo' ia madi' mongka'oho'!”

⁷ “Beleyum tomundo' nu Israel!” na pinontaami i Izebel. “Pobulamo ka' pongkaanmo. Posanangmo na kinyonyoa nu beleyum kalana ku bee'mo na ale' nu anggur i Nabot aijo' hi beleyum!”

⁸ Jadi i Izebel nontulismo sulat nongala sanggo i Ahab ka' pinokampitnyomo na segel nu tomundo' i sulat aijo'. Sulat aijo' pinakatunyo hi to pola-polaya' ka' hi to tu'a-tu'anyo anu kiijo' i Yizreel.

⁹ Sumo uuka na isi nu sulat aijo', “Bebakon hi mian iwi-iwi' da bapuasa' ka' palentah na aha da sihuk! I tampat kasihukan aijo' bee'i kasuhangan anu talasanggo hondo.

¹⁰ Pokau na mian anu uwesan Ua'aha sumuhang mompaha ahop tiba ia ka' montuuk i Nabot au' aitu ia nontotobi'akonmo Tumpu Allah tiba tomundo'. Lantas boa na aha i sambiha' nu kota' ka' pahambunu'akon nu batu sampe mate!”

¹¹ Palentah i Izebel aijo' binaumo nu to pola-polaya' ka' to tu'a-tu'anyo nu Yizreel.

¹² Aha nombebakonmo da mian da'isan bapuasa'. Lapas aijo' aha nompalentahmo mian da sihuk, ka' i Nabot binee'anmo tampat kasuhangan anu o'angga'i hondo.

¹³ Mian anu uwesan ua'aha aijo' sinumuhangmo mompaha ahop i Nabot, ka' i ahop nu mian da'isan aha nontuukmo ia au' aitu ia nontotobi'akonmo Tumpu Allah tiba tomundo'. Kalana aijo' ia sinabatakonmo i kota' ka' pinahambunu'akonmo nu batu sampe ia nate.

¹⁴ Lele mosia na i Nabot pinatean pinoto'imo hi Izebel.

¹⁵ Salatan i humpakmo i Izebel na lele aijo', pinoto'inyomo hi Ahab “I Nabot sinilakamo. Jadi uuka aiya lako'mo ala na ale' nu anggur aijo' anu madi' nu ka'oho' nu pobaluk hi beleyum.”

¹⁶ I Ahab nambamo lia-lia' nongala ale' nu anggur aijo' da timbalimo anunyo.

¹⁷ Lantas pinoto'imo nu Tumpu hi Elia, Nabi anu lengkat mae i Tisbe aijo',

¹⁸ “I Ahab, tomundo' nu Samaria aijo' uuka aiya kiijo'mo i ale'nu anggur i Nabot kahanda'mo mongala ale' aijo' da timbalimo anunyo. Jadi lako'mo pokiijo',

¹⁹ ka' poto'i hi ia tukoong-Ku, Aku Tumpu mompoto'imo sumo uuka, 'Nompateimo, nongagoi mule'! Kalana aijo' baso' nu beleyum nu jila'imo nu dedeng i tampat pinonjila'ian nu dedeng baso' i Nabot!’ ”

²⁰ Salatan i Ahab nontoamo i Elia, ia notataemo, “Osampo bali', ahennyo beleyum nohumpakmo aku!” “Totu'u,” na koonyo i Elia. “Kalana Belento Tuan totu-totu'u ahi' na kinyonyoa nombau anu ma'idek hi mata nu Tumpu,

²¹ jadi sumo uuka na anu pinoto'imo mae nu Tumpu hi belento Tuan, 'Ku potokamo mae na balaa' hi belemiu. Beleyum ku alinimo ka' batu-batu to momo'ane i uno nu auan nu beleyum, tu'anyo tiba to oli-olitau, Ku silakaimo.

²² Auan nu beleyum timbalimo susumo auan i Tomundo' Yerobeam anak i Nebat ka' sumomo auan mae i Tomundo' Baesa anak i Ahia, kalana beleyum nonsabapimo mian nu Israel nombaumo dosa', sahingga Aku pinusamo.'

²³ Ka' Tumpu notataemo hi Izebel, saba' butong nu beleyum nu kaanje nudedeng i uno nu kota Yizreel.

²⁴ Maumo pa' ihe na anu i uno nu auan nu beleyum na mate i kota aiya, nukaanmo nu dedeng, ka' anu mate i sambiha' nu kota' nu tolukimo nu tomonsi'.”

²⁵ Madi' toho' ko mian anu totu-totu'umo na kinyonyoanyo mombau anu ma'idek i mata nu Tumpu susumo anu binaumo i Ahab. Iwi-iwi' na anu ma'idek aijo' bibinaunyomo aijo' pokinde' i Izebel bengkele'nyo.

²⁶ I Ahab nombaumo to dosa-dosa' anu talalo ma'idek; ia nonsombahmo pilogot susumo anu lewa' nu bau nu mian Amori, aijo'mo to mia-mian anu i laa'mo nu Tumpu nosabat i Kana'an tempo'nyo mian nu Israel nompinsopimo lipu' aijo'.

²⁷ Noko lapas na i Elia notatae, i Ahab nombeakmo baju'nyo ka' nompake baju' kalung, da ponsumbu'an ia nompele-pelee'mo ka' ia binapuasa'mo. Maumo ia hoyot mompake ahi' hude kalung. Ka' de ia kolalajang otoa ia susa' hondo na kinyonyoanyo.

²⁸ Notataemo na Tumpu hi nabi Elia,

²⁹ “Tinoaumo nu beleyum mosia na i Ahab tina'alukmo hi beleng-Ku? Kalana aijo' Aku madi'mo daagi' mompotoka mae balaa' de daagi' ia tutuu' minsanje anaknyo atina'je ka' Kupotoka mae na balaa' aijo' hi aha sa'anakan.”