1 TOMU-TOMUNDO' 18 - KITAB NU TUMPU ALLA LELE MA'IMAI'

I Elia ka' i Obaja

¹ Madi' pinin, ilapas na aijo', kina konamo i taun kototolu'nyo na posinaa anu daka' hondo aijo', pinoto'imo nu Tumpu hi Elia, “Lako'mo mangadap hi Tomundo' Ahab, ka' poto'i madi'mo pin Ku tudunakonmo na ujan.”

² Sahingga nambamo na i Elia. Tempo'nyo aitu balaa' kasusa'an i anu o kaan tinalalomo hondo sinusa' kiijo' i Samaria.

³ Kalana aijo' i lagamo i Ahab na i Obaja da toka mae mangadap. (I Obaja kapala nu anu mongulus kapalaluan nu auan, i uno nu laigan i Tomundo'. Ia totu-totu'u mian anu saja' hondo monsombah Tumpu.

⁴ Tempo'nyo i Izebel nompateimo to nabi-nabi nu Tumpu, i Obaja aiya na nontulungi aha 100 na nabi pinosuluknyo i uno nu liang – 50 na mian i sa'angu' na liang – ka' nombee'i aha anu o kaan ka' anu o inum.)

⁵ I Ahab notatae hi Obaja, “Imbo' da mamba osongkohinto na lipu' aiya ka' molio mata nu uee kabai kaunyo. Ihe na monsumbu' kita mohumpak hemput da bau pompakan ka' bau pompo'inum ajahanto ka' bagalto, da bolimo kita mompatei potuu'onto mau ola sa'angu'.

⁶ Salatan noko bagimo na da'erah anu mamba osongkohi aijo', aha nambamo. I Ahab namba nontulu jalan sangga'at ka' i Obaja suele nambamo nontulu jalan sangga'at.”

⁷ Hau-haunyo i Obaja nambamo aijo' siningkabotmo na ia i Elia i tonga' nu jalan. Salatan sinumbu'nyomo na i Elia, i Obajat inolodadupumo nontabea'i ia ka' pinokilawanyomo, “Pa' memang belentomo Tuuma, na i Elia?”

⁸ “Ii' akumo aiya na i Elia,” na koonyo i Elia. “Jadi uuka aiya lako'mo mamba poto'i hi tomundo' nu beleyum, poto'i aku i aiya.”

⁹ Tinaaman i Obaja, “Apaa na kasala'anku sahingga belento Tuuma nombee' mo aku hi Ahab da opateimo?

¹⁰ I uno nu sanggo nu Tumpu anu tumuu', Tumpu Allah anu osombah nu belento Tuuma, aiya ku poto'i saba' i tomundo' nompalentahmo aku molio belento Tuuma iyaya mae. De i sa'angu' na lipu' pamalentahnyo motatae tukoonyo belento Tuuma madi' ko anu aiya mae, sabole-bole tionyo nu poita i Ahab da pamalentah nu lipu' aijo' basumpa' de memang totu-totu'u belento Tuuma madi' ko anu kinabot kiijo' mae.

¹¹ Ka' uuka aiya belento Tuuma mongka'oho' da aku mambamo hi ia ka' mompoto'i tukoongku belento Tuuma i aiya mae?

¹² De ku pala'imo na tampat aiya, ku gantang Roh nu Tumpu momboamo belento Tuuma i tampat anu madi' ku sumbu'! Ka de ku poto'imo hi Ahab tukoongku belento Tuuma i aiya mae, lapas mae madi'mo nu humpak na belento Tuuma, tantu nu pateimo na aku. Da osumbu' nu belento Tuuma, aku aiya totu-totu'u monsombah Tumpu salatan pe'e aku daagi' anak!

¹³ Uugat belento Tuuma ma'isa nohongo lele tempo'nyo i Izebel nompatei to nabi-nabi nu Tumpu, akumo aiya na nomposuluk 100 na aha i uno nu liang – 50 na mian i sa'angu' na liang, ka' nombee'i aha anu o kaan ka' anu o inum?

¹⁴ Uuka aiya kadaka' belento Tuuma nonsaimo aku mamba mompoto'i hi Tomundo', belento Tuuma i aiya? Tantu nu pateimo na aku!”

¹⁵ Tinaaman i Elia, “I uno nu sanggo nu Tumpu, Tumpu anu daka' na kuasa'nyo anu kuku hongo na palentahnyo, sinaa aiya posi akumo na mangadap hi tomundo'.”

I Elia ka' to nabi-nabi Baal

¹⁶ Sahingga nambamo na i Obaja nompoto'i hi tomundo' ka' i Ahab nambamo ahi' nonsingkaboti i Elia.

¹⁷ Salatan tinoamo i Ahab na i Elia, i Ahab notataemo daka-daka', “Aiyamo na ia anu saja' monsaduakon da saja' painggaga na mian nu Israel!”

¹⁸ “Misa' aku na monsaduakon da saja' painggaga,” na koonyo i Elia, “panyo posi belento Tomundo'. Belento Tomundo' tiba sa'anakan nu belento Tomundo' na monsaduakon sahingga saja' painggaga. Kalana nonsombahmo pilogot nu Baal haha aijo' belento Tomundo' nolanggaimo iwi-iwi' na palentah nu Tumpu.

¹⁹ Uuka aiya palentahkonmo hi mian nu Israel iwi-iwi' da singkabot tiba aku i Bungkutnyo nu Karmel. Boa mae na nabi nu Baal anu itina' aha pato-pato'atu ka' limampulu' ka' mule' aha pato-pato'atu na nabi pilogot Boune Asyera, anu nunu ongkosi i Izebel bengkele' nu belento Tomundo'!”

²⁰ Sahingga pinalentahmo i Ahab na mian da'isan iwi-iwi' ka' nabi Baal haha aijo' da mamba i Bungkutnyo nu Karmel.

²¹ Lantas i Elia nokiijo'mo hi mian da'isan ka' notatae, “Sampe toka hipian na tempo'nyo belemiu daagi' sabole-bole tataap mompo'ohua' kinyonyoa? De Tumpu aijo', Tumpu Allah, osombah na Tumpu! De Baal aijo' Tumpu Allah, osombah na Baal!” Mian da'isan anu sinilimu' i kiijo' ola nomohokot.

²² Lapas aijo' i Elia notataemo, “Te to nabi-nabi nu Tumpu me ola-olanyomo aku na aiya, padahan aiya sinihuk nabi Baal 450.

²³ Jadi boa mae ohua' na sapi' lakinyo. Pokau na nabi Baal haha aijo' mongala sa'angu' mae na sapi' ka' okolot ka' opado-padot lantas opaha potimpasmo aijo' i kau' anu pipinaha tambunmo. Panyo' aha madi' timbali momposuni apu i aijo'. Sapi' anu sa'angu' mule' akuje na mombau suele susumo aijo'. Akuje na mongkolot ka' mompado-padot ka' mompaha potimpas aita' i kau' anu pipinaha tambunmo. Panyo' aku suele madi' timbali momposun apu i aijo'.

²⁴ Nabi nu Baal haha aijo' balado'a hi pilogot nu aha, ka' aku suele balado'aje hi Tumpu. Anu montudunakon mae apu salaku pontaaminyo. Aijo'mo na Tumpu Allah.” Iwi-iwi' na mian da'isan nontaamimo daka-daka' na potatae, koonyo nu aha, “Situju.”

²⁵ Lantas notataemo na i Elia hi nabi nu Baal haha aijo', “Kalana belemiu na manjoo', jadi belemiu pe'e na mompile'i sapi'nyo ka' mompotouka, panyo boli momposuni apu aijo' i kaunyo. Lapas aitu balado'amo hi pilogot nu belemiu.”

²⁶ Sahingga aha nompile'mo sa'angu' na sapi' lantas pinotoukamo nu aha. Lapas aijo' aha binalado'amo hi Baal nu aha, lengkat pe'e daagi' subu sangkutnyo tinoka sonsu'un na sinaa, ka' lewa' nolo-noloboo', “Taami mae na kami Baal!” Sumo aijo' na aha nombau ka'mule' lewa'mo nonsalelei montikubi mezbah nu aha. Panyo' madi' hondo-hondo ko anu nontaami mae.

²⁷ Salatan sinonsu'unmo na sinaa i Elia lewa'mo nompobau-bau aha. “Balado'a mule' ka' lebe opohoson! Te misa' ia pilogot ahi'? Ku gantang ia hau-haunyo mompotutugakon apa-apaa kabai ugaat namba i pibodo'an Kabai ugaat ia nambamo pa' noya! Kabai ugaat ia i hoyotmo, jadi tionyo ahi' belemiu moliko ia!”

²⁸ Nabi haha aijo' binalado'a lebe mule' pinohoson nu aha. Ka' susumo anu saja'mo nu bau nu aha, butong nu aha binoyo-boyotmo nu aha nu bajak kabai talombo', sahingga bi baso'onmo.

²⁹ Sumo aijo' na aha nombau ka' saja'mo pino'uli-ulit nu aha sampe sangkut malom sumomo mian anu sinoku'onmo nu setan. Panyo' madi' ko anu nontaami mae ka' madi' ko anu nompajuli mae.

³⁰ Lantas pinoto'imo i Elia hi mian da'isan haha aijo' iwi-iwi', “Imbo' po'uka mae oha-ohani.” Aha iwi-iwi' nokiijo' mo nontikubi ia, lapas aijo' pinoko'ima'annyomo na mezbah nu anu nohobo'mo.

³¹ Ia nongala sampulu' ka' ohua' na batu, toto sa'angu' na batu mowakini sa'angu' na lee' mae i Yakub, aijo'mo mian anu sinanggohanmo nu Tumpu Israel.

³² Batu haha aijo' na po'ule' binau i Elia mezbah bau tampat ponsomban Tumpu. Titikup na mezbah aijo' sinepe'annyo ka' gagana' ahi' ewa sahingga timbali mongisi kila-kila sampulu' ka' olima' na liter na uee.

³³ Kau' anu oposun pinaha tambunnyomo i mezbah aijo', lantas sapi' anu sa'angu' aijo' kinolotmo ka' pinado-padotmo ka' pinaha potimpasnyomo i kau' haha aijo'. Lapas aij'o pinoto'inyomo, “Isimo opat na gumbang nu uee sampe mobuke' lantas dudu'akonmo na uee aijo' itampat ponsombahkonan koloban tiba kau'nyo haha aijo' suele odudu'i.” Salatan pinoko baumo nu aha na aijo',

³⁴ pinoto'inyo mule', “Daagi' minsan,” lantas binau mule' nu aha. “Daagi' pe'e minsan,” na koonyo i Elia lantas po'ule' mule' binau nu aha.

³⁵ Sahingga no'ilimo na uee duhu-duhuk i mezbah aijo' ka' sepe'nyo nobuke'mo nu uee.

³⁶ Salatan nonsombahkonmo koloban malom-malom i Elia nongohanimo mezbah aijo' ka' binalado'a, “O Tumpu, Tumpu Allah anu nunu sombah i Abraham, i Ishak, ka' i Yakub, ponyata'mo mae uuka aiya da nusumbu'mo nu aha taalu' Belentomo atina' na Tumpu Allah nu Israel, ka'akumo aiya na posaihon nu belento. Ponyata'mo mae mule' da nusumbu' nu aha taalu' anu ku bau aiya iwi-iwi' palentah mae lengkat hi Belento.

³⁷ Taami mae Tumpu! Taami mae na aku da mian da'isan haha aiya monsumbu' taalu' Belentomo o Tumpu, na Tumpu Allah, ka' da nusumbu' nu aha taalu' Belento ahi' na po'ule' nonsule' akon aha hi Belento.”

³⁸ Lantas tinudunakonmo mae nu Tumpu na apu lengkat mae i langit ka'nompapuimo sahingga notoyo'mo na koloban aijo' tiba kau'nyo tiba batunyo haha aijo' ka' tano'nyo ka' kinaannyomo suele na uee aijo' sampe no'oti na uee aijo' i sepe'nyo.

³⁹ Salatan tinoamo nu mian da'isan apa-apaa na jinadimo aijo' aha tinolodadupumo i tano' ka' notatae, “Tumpu, memang Tumpu Allah! Totu-totu'u Tumpu aijo', memang Tumpu Allah!”

⁴⁰ Sahingga notataemo na i Elia, “Hakop na nabi Baal aijo'! Boli opotuha' mau ola samian!” Lantas i hakopmo nu to mia-mian na nabi Baal haha aijo', ka' binoamo i Elia i Kaunyo Kison, ka' i kiijo' mae pinateannyomo na aha iwi-iwi'.

Madi'mo pinosinaa

⁴¹ Lapas aijo' pinoto'imo i Elia hi Tomundo' Ahab, “Uuka aiya sahanyo belento Tomundo' mambamo pongkaan! Gagana' uuka ujanmo, kalana i hongongkumo na buhoknyo mae.”

⁴² Lantas i Ahab nambamo nongkaan ka' mule' i Elia nindakomo i Bungkutnyo nu Karmel. I kiita' mae ia tinolodadupumo, ohupnyo i hampot i tano' i olot nu bukunyo ohu-ohua'.

⁴³ Lantas pinoto'inyomo hi posaihonnyo, “Pindakomo pokiita' i bungkutnyo ka' tanggalakon sasu mokaiyong i ambai.” Posaihonnyo aijo' nindakoomo lapas aijo' po'ule'mo ninsusule' mae ka' pinoto'inyo, “Madi' ko apa-apaa anu tinoangku.” Sape pinimpitun na i Elia nonsai posaihonnyo lewa' nopule' nindako nokiita' nontanggalakon.

⁴⁴ Tinoka kinopimpitunnyomo na posaihon aijo' ninsusule' mae pinoto'inyomo, “Aku nontoamo kundom sumo pala nu lima na ko ise'nyo lengkat mae i sasu ambai.” Sahingga pinoto'imo i Elia hi posaihonnyo, “Lako'mo hi Tomundo' Ahab ka' poto'i paninsake'mo i karetanyo ka' pinsusule'mo da ma'isa pe'e ko ujan mongewa'.”

⁴⁵ Ola sangkinihap sasaidi' pintungmo na langit, ka' mombun makansangmo ka' mule' ujan mabohosmo natudun. I Ahab sinumake'mo i karetanyo lantas ninsusule'mo i Yizreel.

⁴⁶ Tempo'nyo aijo' i Elia nohumpakmo kahosonan lengkat mae hi Tumpu. Kinekesnyomo na juba'nyo nokiita' i kompongnyo lantas ia nopadeka'mo so' i liu-liunyo na i Ahab tinoka-toka i sabatan daka' nu kota Yizreel.