1 TOMU-TOMUNDO' 17 - KITAB NU TUMPU ALLA LELE MA'IMAI'

I Elia ka' tempo' nu posinaa anu daka' hondo

¹ Daagi' ko samian na nabi, sanggonyo i Elia. Ia mian lengkat mae i Tisbe, sa'angu' na kota' i da'erah Gilead. Daagi' kino sansinaan ia tinokamo hi Tomundo' Ahab ka' notatae, “Jumo nu sanggo nu Tumpu anu tumuu' Tumpu Allah anu osombah nu mian Israel ka' anu kuku hongo na palentahnyo, ku poto'i hi belento Tuan, ohua' kabai totolu' na taun anu aiya mae i ahop madi'mo daagi' ko dondu'ok kabai ujan mau ola sangkiding, de ku poto'imo, yo atina' daagi'mo.”

² Lapas aijo' pinoto'imo nu Tumpu hi Elia,

³ “Pala'imo na tampat aiya, lako'mo i sasu kabete'an i santoa nu Kaunyo Yordan ka' paninsulukmo kiijo' mae koko panga' nu Kaunyo Kerit.

⁴ Beleyum timbali monginum i panga'nyo nu kaunyo aijo', ka' ku saije na tomonsi' papaa' momboai anu o kaan nu beleyum.”

⁵ Palentah nu Tumpu aijo' tinulutanmo i Elia, ka' ia nambamo i panga' nu kaunyo Kerit lantas ia jinojoongmo kiijo' mae.

⁶ Panga'nyo nu kaunyo aijo' na ponginumannyo ka' anu nu kaan roti ka' ponoha' anu nu boa mae nu tomonsi' papaa' daagi' subu ka' de malommo.

⁷ Madi' pinin, panga'nyo nu kaunyo aijo' suele no'otimo kalana madi'mo daagi' kino ujannyo.

I Elia ka' balu kiijo' i Sarfat

⁸ Lapas aijo' Tumpu notataemo hi Elia,

⁹ “Uuka aiya beleyum lako'mo i kota Sarfat, koko Sidon ka' jojoongmo kiijo'mae. Aku nonsaimo samian na balu kiijo' mae da ia na mombee'i anu o kaan nu beleyum.”

¹⁰ Sahingga nambamo na i Elia nokiijo' i Sarfat. Salatan tinokamo i sabatan nu kota aijo', ia nontoamo samian na balu hau-hauno mongala kau' anu oposun. Lantas notataemo na i Elia hi balu aijo', “O pontina'on, tulungiakon mae alapi uee sangkiding na aku da ku inum.”

¹¹ Hau-haunyo balu aijo' i lumajangmo mongalapi uee, i Elia notataemo daka-daka' “O pontina'on, ka' suele roti boai mae sangkiding.”

¹² Tinaaman nu balu aijo', “Jumo nu sanggo nu Tumpu anu tumuu', Tumpu Allah anu osombah nu belento Tuuma, aku basumpa', totu-totu'u aku madi'mo ko roti. Ola labu nu tiligu na daagi' hi belengku, me sangkakup kiijo' i mangko'. Ka' lanya' nu Zaitun sangkiding kiijo' i boton. Aku aiya mongala kau' anu oposun bau pongunjang tiligu anu me ise-ise' kiijo', da okaan nu kami moto anak. Me aijo' na anu okaan mami, madi'mo ko anu okaan sangga'at; lapas aijo' kami montanda'imo silaka.”

¹³ Boli bata-bata, “Pontina'on!” na koonyo i Elia hi ia, “Baumo Pontina'on na anu o kaan bau bagi nu belento Pontina'on ka' mule' bau bagi nu anak nu belento Pontina'on. Panyo' anu momonanyo pe'e obaui aku, sa'angu' na roti ise-ise', te labu ka' lanya' ititina' na obau ka' boa mae hi belengku.

¹⁴ Kalana Tumpu Allah anu osombah nu mian Israel, notataemo tukoonyo, mangko' ititina' saja' ko isinyo labu, ka' boton ititina' saja' ko isinyo lanya' sangkutnyo toka na ujan anu nu tudunakonje mae nu Tumpu i dunia aiya.”

¹⁵ Lantas nambamo na balu aijo', nombau apaa na anu pinoto'imo i Elia. Sahingga aha toto-totolu' ko anumo o kaan sansina-sina nanjoo'mo na anu pinosadia.

¹⁶ Ka' susumo anu pinoto'imo nu Tumpu da nu potokakon i Elia, mangko' aijo' saja'mo kino isinyo labu ka' boton mule' aijo' saja'mo ko isinyo lanya'.

¹⁷ Madi' pinin anak nu balu aijo' nasakitmo. Sakitnyo kino pintu-pintuangnyomo sahingga ia sinilakamo.

¹⁸ Lantas balu aijo' notataemo hi Elia, “O posaihon nu Tumpu Allah, kadaka' belento Tuumangku nombaumo anu sumo aiya hi belengku? Ku gantang kahanda' nu belento Tuuma toka mae hi belengku da nusumbu' nu Tumpu Allah na dosa'ku, sahingga anaku sinilakamo?”

¹⁹ Tinaaman i Elia, “Boa mae na anak atina' mo'uuka.” Lantas ingalamo i Elia na anak momo'ane aijo' anu aijo' hi tinanyo, ka' binoanyo i salipi' anu aita' mae i bawonyo, i salipi' anu kinajojoongan i Elia. Anak aijo' pinomale'mo i Elia i kamale'annyo,

²⁰ lantas dinaka-daka'annyomo na ia binalado'a, “O Tumpu, Tumpu Allah-ngku, kadaka' belento Tumpu nompotokamo mae balaa' hi balu aiya? Ia nompobee'mo mae aku da jojoong pe'e madi' pinin hi ia, payo' aiya belento Tumpu nompateimo anaknyo!”

²¹ Lapas aijo' i Elia lewa'mo nongokobakon saha'annyo hi anak aijo' pinintolun, ka' binalado'a, “O Tumpu, Tumpu Allah-ngku potuu'akon mae paya' na anak aiya!”

²² Tumpu nohongomo do'a i Elia anak aijo' po'ule'mo ningkinyonyoa ka' tinumuu'mo.

²³ Lantas i Elia nintatau'mo mae lengkat i aita' i salipi'nyo ka' binoanyomo mae na anak aijo' hi tinanyo ka' pinoto'inyo, “O Pontina'on aiyamo na anak nu belento Pontina'on! Ia po'ule'mo tinumuu'!”

²⁴ Tinaaman nu balu' aijo', “Aiyaje ka'sinumbu'ku taalu' belento Tuuma posaihon mae nu Tumpu Allah, ka' anu otaloakon nu belento Tuuma memang totu'u lengkat mae hi Tumpu!”