1 TOMU-TOMUNDO' 15 - KITAB NU TUMPU ALLA LELE MA'IMAI'

I Abiam, tomundo' nu Yehuda

¹ I taun ko sampulu'nyo ka' ualu'nyo na i Tomundo' Yerobeam nompalentah Israel, i Abiam tinimbalimo tomundo' nu aha Yehuda,

² ka' nompalentah tinotolu' na taun na kinopinnyo i Yerusalem. Tinanyo i Maakha, anak i Abisalom.

³ I Abiam nombaumo dosa' susumo tuumanyo. Ia madi' totu-totu'u na kinyonyoa montuluti Tumpu Allah-nyo, madi' pokakana tiba i Daud mompolee'nyo mae.

⁴ Panyo kalana monginau' i Tomundo' Daud, sahingga Tumpu, Tumpu Allah anu nusombah i Daud nombee'imo i Abiam samian na anak da mombolosakon ia mompalentah i Yerusalem ka' montinjohakon kota aijo'

⁵ Tumpu nombaumo sumo aijo' kalana i Daud nomposanangmo kinyonyoa-Nyo. I Daud madi' toho' nolanggai palentah nu Tumpu iwi-iwi', ola daagi' kino minsan palakala tiba i Uria mian nu Het aijo'.

⁶ I Rehabeam lewa' nahampate tiba i Yerobeam salatan pe'e tempo'nyo i Rehabeam nompalentah sampe tinoka-toka i Abiammo na mompalentah.

⁷ Sisikon sangga'at mongkona i Abiam, tinulismo i kitab nu to tomu-tomundo' nu aha Yehuda.

⁸ Salatan i Abiam suele sinilakamo ia i lamunmo i Kota Daud. I Asa anaknyo na nombolosakon ia binau tomundo'.

I Asa, tomundo' nu Yehuda

⁹ I taun ko uampulu'nyomo na i Tomundo' Yerobeam nompalentah Israel, i Asa tinimbalimo tomundo' nu Yehuda.

¹⁰ Ia nompalentah pinatompulu' ka' sa'angu' na taun na kopinnyo i Yerusalem. Kele'nyo i Maakha, anak i Abisalom.

¹¹ Susumo i Daud mompolee'nyo mae, i Asa suele momposanang kinyonyoa nu Tumpu.

¹² Iwi-iwi' na anu lewa' masala' pinojoong i tampat ponsomban pilogot i laa'nyomo, ka' iwi-iwi' na tampat bau bapilogotan anu binaumo nu to tomu-tomundo' anu nompalentahmo ma'isa pe'e kino ianyo, madi'mo pinobee'nyo i songko-songko na lipu'.

¹³ Kele'nyo i Maakha pinobelentinyomo i pangkatnyo da boli mo saja' Mombee'i sonto' bapilogot, kalana ia nombaumo patong nu pilogot Asyera anu masala', pilogot boune anu moko lumba' sosu'anon. I Asa nohobo'akonmo bapilogotan haha aijo' ka' pinapuaannyomo i Bangka'nyo nu Kidron.

¹⁴ Maumo madi' iwi-iwi' na tampat ponsomban pilogot i ngidean i Asa, panyo ia sabole-bole ahi' tulu-tulutan hi Tumpu i uno nu kantumuu'annyo.

¹⁵ Iwi-iwi na mosoni' tiba salaka anu sinombahkonmo nu tuumanyo hi Tumpu po'ule'mo binoanyo i Laigan nu Tumpu, sumo aitu mule' na mosoni' ka' salaka anu iamo na nonsombahkon.

¹⁶ Tempo'nyo i tomundo' Asa nompalentahmo Yehuda ka' i Tomundo' Baesa nompalentahmo Israel, saja'mo nahampate na ua-ua'aha aijo'.

¹⁷ I Baesa nontumbuhimo Yehuda ka' nompohosonmo kota Rama da o ompo'mo bolimo ko jalan mosabat kabai mokiijo' i Yehuda.

¹⁸ Kalana aijo' i Tomundo' Asa nongalamo iwi-iwi' na mosoni' ka' salaka anu daagi' kiijo' i Laigan nu Tumpu ka' i laigan nu tomundo' lantas pinakatuanyomo i Damsyik hi Benhadad tomundo' nu aha Siria anak i Tabrimon, makumpu i Hezion. Balang haha aijo' pinakatu binoa nu aha mian pa' aha sangkuka na anu ko pangkatnyo i laigan nu tomundo', ka' pinotuunnyo sumo uuka:

¹⁹ “Imbo' da kita mobela' susumo anu binaumo nu to tu'a-tu'anyonto. Aiya pinakatuanku mae mosoni' tiba salaka salaku palasen, ka' monsale' hi belento tuan da bolimo mompahasumbu' tiba i Baesa tomundo nu aha Israel, da po'ule'mo nulaga na suludadunyo anu aiya i da'erangku.”

²⁰ I Benhadad nonsitujuimo sale'nyo aijo', lantas nompalentahmo to sulu-suludadunyo anu matangkas na pangkatnyo ka' mule' gombuan nu suludadu nu aha da mambamo montumbuhi iwi-iwi' na kota nu aha Israel. Aha nompatundu'mo Iyon, Dan, Abel-Bet-Maakha tiba Kinerot koko Dowiwi nu Galilea tiba iwi-iwi' na da'erah Naftali.

²¹ Salatan i hongomo i Baesa na han aijo', ia madi'mo nompohoson Rama. Ia nambamo i Tirza ka' tempo'nyo aijo ia madi'mo lewa' nahampate.

²² Lapas aijo', iwi-iwi' na mian songko-songko i da'erah Yehuda madi'ko samiannyo, pinalentahmo i Tomundo' Asa da mamba mongato batu ka' kau' anu pinake i Baesa kiijo' i Rama nompohoson kota aijo'. Batu tiba kau' haha aijo' pinakemo i Asa da mompohoson kota Mizpa tiba Geba, sa'angu' na kota i da'erah nu Benyamin.

²³ Sisikon sangga'at mongkona i Tomundo' Asa, aijo'mo kabaaniannyo ka' to kota-kota' anu pinohosonnyomo tinulismo i kitab Sisikon nu to Tomu-tomundo' Yehuda. Salatan ia i langkai'mo, i Asa kinonamo nu panyakit i tengkenyo ua-uambiha'.

²⁴ Ia sinilakamo ka' i Yosafatmo, anaknyo momo'ane na binau tomundo' nombolosakon ia.

I Nadab, tomundo' nu Israel

²⁵ I taun ko ohua'nyomo na i Tomundo' Asa nompalentah Yehuda, i Nadab anak i Yerobeam tinimbalimo tomundo' i Israel ka' nompalentahmo ingohua' na taun na kinopinnyo.

²⁶ Susumo tuumanyo anu nompalentahmo ma'isa pe'e kino ianyo, ia mule' suele nombaumo kalakuan anu ma'idek i mata nu Tumpu, sahingga nonsaduakonmo mian nu Israel nombaumo dosa'.

²⁷ I Baesa anak i Ahia, aha tulunan mae nu bansa Isakhar nosa'angu'mo nongewa i Nadab, lantas nompateimo ia. Tempo'nyo aitu i Nadab tiba suludadunyo nontumbuhimo kota Gibeton i da'erah Filistin.

²⁸ Aijo' jinadi i taun anu ko totolu'nyomo na i Tomundo' Asa nompalentah Yehuda. Sumo aijo' na i Baesa tinimbali tomundo' nu Israel nombolosakon i Nadab.

²⁹ Madi' pinin salatan i Baesa tinimbalimo tomundo', pinateannyomo iwi-iwi' na aha salaigan i Yerobeam. Susumo koonyo nu Tumpu anu pinoto'i-Nyomo hi posaihonnyo i Nabi Ahia mian nu Silo, jadi aha iwi-iwi' salaigan i Yerobeam pinateanmo, madi' ko anu samian na pinotumuu'.

³⁰ I Yerobeam binaladosa'mo ka' nonsaduakonmo mian nu Israel suele binaladosa'mo. Tiba han sumo aijo' sahingga i Yerobeam nonsaduakonmo da Tumpu Allah anu nu sombah nu mian Israel notambuha'mo.

³¹ Sisikon sangga'at mongkona i Nadab, tinulismo i kitab Sisikon nu to Tomu-tomundo' Israel.

³² Tempo'nyo i Tomundo' Baesa daagi' nompalentah Israel, saja' nahampate na i Baesa tiba i Tomundo' Asa anu nompalentah Yehuda.

I Baesa, tomundo' nu Israel

³³ I taun ko totolu'nyomo na i Tomundo' Asa nompalentah Yehuda. I Baesa anak i Ahia nontomundo'imo songko-songko na Israel. Ia nompalentah i Tirza inguampulu' ka' opat na taun na kinopinnyo.

³⁴ Pokakana susumo i Tomundo' Yerobeam anu nompalentah ma'isa pe'e kino ianyo, i Tomundo' Baesa suele binaladosa'mo hi Tumpu ka' nonsaduakonmo mian nu Israel suele nombaumo dosa'.