1 TOMU-TOMUNDO' 14 - KITAB NU TUMPU ALLA LELE MA'IMAI'

Anak i Yerobeam sinilakamo

¹ Tempo'nyo aitu anak mo'ane i Yerobeam sanggonyo i Abia nasakitmo.

² I Yerobeam notataemo hi bengkele'nyo, “Soba posadia ka' lako' i Silo hi laigan i Nabi Ahia anu nompoto'imo u'utu mae tukoonyo aku baumo tomundo' nu Israel. Panyo pibaju na beleyum susumo mian popololo da madi' nu sumbu' nu mian na beleyum.

³ Boai na ia sampulu' na batuan nu roti, kukis sangkiding tiba juu' nu uani' samboton. Pokilawa hi ia pa' apaa na jadi hi anakto i Abia. Nu poto'ije mae nu Nabi kiijo' hi beleyum.”

⁴ Jadi nambamo na bengkele' i Yerobeam hi laigan i Nabi Ahia kiijo' mae i Silo. Nabi aijo' madi'mo montoa-toa kalana ia i langkai'mo hondo.

⁵ Panyo Tumpu nompoto'imo hi ia, tukoo-Nyo bengkele' i Yerobeam uutumo mae, toka mae mompokilawa pa' mosia na anaknyo kiijo' masakit. Ka' Tumpu mule' ahi' nompoto'imo hi Nabi Ahia mosia na anu tionyo nu poto'i saidi mae. Salatan bengkele' i Yerobeam tinokamo kiijo' ia ningadi-adi'mo susumo mian sangga'at.

⁶ Panyo salatan i Nabi Ahia nohongomo lajangnyo uutumo i sabatan ia notataemo, “Imbo' pinsoop mae ku sumbu' na beleyum bengkele' i Yerobeam. Boli mingadi-adi'. Daagi' ko lele anu ma'idek toka hi beleyum.

⁷ Pinsusule'mo ka' poto'i hi Yerobeam sumo uuka na pinoto'i nu Tumpu, Tumpu Allah nu Israel, 'Beleyum pinile'an-Kumo hi aha mian da'isan ka' pinotimbaling-Kumo anu mongkuasai mian nu Israel anu pinalesayamo hi belengku.

⁸ Beleyum binee'an-kumo kalaja'an anu ingalang-Kumo hi lee' i Daud. Panyo beleyum madi'mo sumo posaihon-Ku i Daud. Ia tulu-tulutan hondo hi belengku ka' montuluti hondo palentah-ngKu. Apaa na anu Ku situjui aijo' na nu bau.

⁹ Panyo beleyum nombaumo kalakuan anu lebe ma'idek molingkudui apaa na anu binaumo nu aha anu nompalentahmo tempo'nyo ma'isa pe'e kino beleyumnyo nompalentah. Beleyum nohikumo Aku sahingga Aku pinusamo kalana nombaumo bapilogotan ka' mule' to pato-patong tambaga da osombah.

¹⁰ Kalana aijo' Ku potokamo mae na balaa' hi belemiu sa'anakan. Iwi-iwi' na lee' nu beleyum anu to momo'ane, maumo pa' apaa na pangkatnyo Ku pateimo. Ku ingkotimo na belemiu sa'anakan susumo mian anu mongkahe'i duhehe madi'mo daagi' ko anu tontuha'.

¹¹ Belemiu sa'anakan ihe na anu silaka i kota', dedeng na mongkaan, ka' anu silaka isambiha' nu kota' tomonsi' na montoluki. Ingat Aku Tumpu na notatae!’ ”

¹² Lantas po ule' mule' i Nabi Ahia notatae hi bengkele' i Yerobeam, “Jadi uuka aiya pinsusule'mo! Salatan beleyum minsoopmo i kota' anak nu beleyum itina' silakamo.

¹³ Iwi-iwi' na mian da'isan nu Israel nohangimo ka' nolamunmo ia. Iamo na mian anu hi aha salaigan i Yerobeam anu ilamun pinopodaka' hondo, kalana ola ia na anu nomposanangmo kinyonyoa nu Tumpu, Tumpu Allah nu Israel.

¹⁴ Israel nu bee'ije nu Tumpu samian na tomundo' lee' mae i Yerobeam anu memenyomo aitu na lee'nyo timbali bapangkat tomundo'. Sinaa tempo'nyo tinokamo! Otampu'uni uuka aiya,

¹⁵ Tumpu mohukumo Israel sahingga gayu'anmo susumo kau' anu totototon i uee. Nu sabatakonmo nu Tumpu na mian nu Israel ilipu' anu ma'ima' aiya anu binee'-Nyomo hi mompolee' nu aha. Nu ga'a ga'atakonmo na aha mamba i sasu Kaunyo nu Efrat, kalana aha nonsaduakonmo da ia notambuha' kalana aha lewa'mo nombau patong nu Asyera.

¹⁶ Nu pala'imo nu Tumpu na Israel kalana i Yerobeam binaladosa'mo sahingga nonsaduakonmo suele Israel binaladosa'mo.”

¹⁷ Lapas aijo' nambamo na bengkele' i Yerobeam i Tirza. Salatan ia ninsoopmo ilaigannyo anaknyo sinilakamo.

¹⁸ Mian da'isan aha Israel nohangimo ka' nolamunmo madi' sinala' susumo anu tinaloakonmo nu Tumpu anu pinoto'inyomo hi Nabi Ahia posaihon-Nyo.

I Yerobeam sinilakamo

¹⁹ Sisikon sangga'at mongkona i Tomundo' Yerobeam monsisikakon ia nompalentah ka' nahampate ia na nongkapalai tinulismo i kitab anu Monsisikakon to Tomu-tomundo' nu Israel.

²⁰ Inguampulu' ka' ohua' na taun na kinopinnyo na i Yerobeam nompalentah salaku tomundo' lapas aijo' ia sinilakamo ka' i lamunmo. Anaknyo sanggonyo i Nadab na nombolosi ia salaku tomundo'.

I Tomundo' Rehabeam lengkat mae i Yehuda

²¹ Salatan i Rehabeam anak i Salomo tinimbalimo tomundo' nu Yehuda tempo'nyo aitu umunnyo patompulu'mo ka' sa'angu' na taun. Ia nompalentah sinampulu' ka' pinopitu' na kinopinnyo, i Yerusalem. Kota' anu songko-songko i Israel, kota'mo aijo' na anu tinantukanmo nu Tumpu da bau ponsomban Ia. Tina i Rehabeam sanggonyo i Naama bansa mae nu aha Amon.

²² Bansa Yehuda nombaumo kalakuan anu ma'idek i mata nu Tumpu. Apaa na anu binaumo nu aha lebe ma'idek nolingkuduimo apaa na anu binaumo nu mompolee' nu aha ka' lebemo mule' nonsaduakon Tumpu notambuha' hi aha.

²³ Aita ito bungku-bungkutnyo tiba i patu nu kau' anu toto daka-daka' aha nombaumo tampat ponsomban pilogot ka' lewa'mo nompotinjo batu toto tangka-tangkas' to pato-patong nu pilogot boune Asyera da osombah.

²⁴ I tampat haha aijo'na lewa' pasala'an nu aha salaku bau ponsombah pilogot. Ka' mule' to momo'ane obee'i kalaja da mombau kalakuan masala' aijo'. Mian nu Yehuda nombaumo kalakuan anu ma'idek sumo aijo', han aijo' tiniho nu aha iwi-iwi' hi to bansa-bansa anu ila'mo nu Tumpu tempo'nyo mian nu Israel ninsoopmo ilipu' aijo'.

²⁵ I taun ko olima'nyomo na i Rehabeam nompalentah, i Sisak tomundo' nu Mesir nontumbuhimo Yerusalem.

²⁶ Iwi-iwi' na pakakas anu mahan na olinyo i uno nu Laigan nu Tumpu tiba i laigan nu tomundo' ka' mule' to kanta-kanta anu mosoni' na pinoki bau i Salomo pinahuhuakonnyomo.

²⁷ Ka' salaku binau pombolosi i Tomundo' Rehabeam noki baumo to kanta-kanta tambaga ka' pinoki jagannyomo hi to sulu-suludadu anu monjagai sabatan daka' laigan nu tomundo'.

²⁸ De i tomundo' mambamo i Laigan nu Tumpu to sulu-suludadu momboamo kanta haha aijo', lapas mae nu sule'akonmo nu aha i salipi' anu lewa' ponjaga'an.

²⁹ Sisikon sangga'at mongkona i Tomundo' Rehabeam tinulismo i kitab Sisikon nu to Tomu-tomundo' Yehuda.

³⁰ Tempo'nyo i Rehabeam nompalentah saja' nahampate na i Rehabeam nongewa i Yerobeam.

³¹ Mamanga ahi' i Rehabeam sinilakamo ka' ilamunmo i tampat pinolamunan to tomu-tomundo' i kota' Daud. I Abiam anaknyo momo'ane na nombolosi ia salaku tomundo'.