1 TOMU-TOMUNDO' 13 - KITAB NU TUMPU ALLA LELE MA'IMAI'

¹ Tempo'nyo aitu daagi' ko nabi samian kiijo' i Yehuda. Ia pinokau nu Tumpu da mamba i Betel. Nabi aijo' tinoka i kiijo' tempo'nyo i Yerobeam hau-haunyo tinjo-tinjo i ahop nu mezbah monsombahkon koloban.

² Kalana Nabi aijo' pinokau nu Tumpu sahingga ia notataemo daka-daka' i mezbah aijo' “O mezbah, o mezbah! Sumo uuka na koonyo nu Tumpu, 'Samian na anak anu osanggohije i Yosia, saidi' mae hampeje hi lee' mae i Daud. Aita' hi beleyum atina' o mezbah, nu pateije na to ima-imam anu mokalaja i tampat lewa' ponsomban pilogot, ka' anu monsombahkonmo koloban atina' hi beleyum. Ka' atina' hi beleyum mule' notatae na nabi aijo' nu papuije na to buku-buku nu mian.’ ”

³ Po'ule' notatae na nabi aijo', “Mezbah aiya saidi' mae ohobo'akonmo, ka' abu'nyo aita' tombulokmo. Aijo'mo na bukuti'nyo aku aiya pinokau mae nu Tumpu.”

⁴ Salatan i Yerobeam nohongomo potatae haha aijo', tiniju'nyomo na nabi aijo' ka' notatae daka-daka', “Hakop na mian aitu!” Panyo' balo i hojok na lima i Yerobeam sahingga madi'mo pinoko ala po'ule pinaku'nyo.

⁵ Mezbah aijo' monti-montiik nohobo'mo ka' abu'nyo tinombulokmo nokaiyong i tano', susumo anu pinalentahkonmo nu Tumpu lantas pinoto'imo nu nabi aijo'.

⁶ Lantas notataemo na i Tomundo' Yerobeam hi nabi aijo', “Tulungiakon mae do'akon hi Tumpu Allah nu beleyum na aku. Poitakon da Nu kalibosi mae ka' mompo'alinakonmo limangku!” Nabi aijo' nondo'akonmo hi Tumpu, lantas na'alinmo na lima i tomundo'.

⁷ Lapas aijo' i tomundo' notataemo hi nabi aijo', “Imbo' da mamba mongkaan i laiganku. Aku kahanda' mombee'i palasen hi beleyum.”

⁸ Nabi aijo' nontaami, “Maumo ahi' sambahagian na ka kakaya'an nu belento Tomundo', obee'mo mae nu belento Tomundo' hi belengku, panyo' madi' ahi' aku mamba mongkaan ka' monginum tiba belento Tomundo'.

⁹ Aku nohumpak palentah hi Tumpu madi' timbali mongkaan ka' monginum, ka' madi'mo montulu jalan momona aku kinajalananku mae tinoka aiya, de aku minsusule'mo.”

¹⁰ Sumo aijo' na nabi aijo' ninsusule' nontulumo jalan sangga'at.

Samian na nabi anu i langkai'mo kiijo' i Betel

¹¹ Tempo'nyo aitu daagi' ko nabi samian anu i langkai'mo jojoong kiijo' i Betel. To ana-anaknyo nompoto'imo hi ia nabi anu lengkat mae i Yehuda aijo'. Aha nonsisikmo apaa na anu binaunyomo i Betel sinaa aitu, ka' apaa na anu pinoto'inyomo hi Tomundo' Yerobeam.

¹² Lantas pinokilawamo nu nabi anu i lalangkai'mo aijo', “Nabi anu lengkat mae i Yehuda aijo' nontulu jalan iya na ia ninsusule'?” Lantas pinoto'imo nu aha na jalannyo aijo' hi ia.

¹³ Lantas pinokaunyomo na aha nompokona kasuhangan i keledainyo. Lapas aijo' sinake'annyomo na keledainyo ka' namba,

¹⁴ nololoi'mo nabi anu lengkat mae i Yehuda aijo'. Tinokannyo na nabi aijo' hau-haunyo suha-suhang i patu nu kau' daka'. Nabi anu ilangkai'mo aijo' nompokilawa “Pa' Belentomo na nabi anu lengkat mae i Yehuda? Tinaaman nu miana aijo' totu'u.”

¹⁵ “Imbo' da mamba mongkaan i laiganku,” na koonyo nu nabi anu i lalangkai'mo aijo'.

¹⁶ Panyo' nabi anu lengkat mae i Yehuda aijo' nontaami, “Be paya'! Aku madi' timbali mamba hi belento Tuumangku mongkaan i laigan nu belento Tuumangku. Aku mule' madi timbali mongkaan kabai monginum i aiya tiba belento Tuumangku.

¹⁷ Tumpu nompalentahmo aku madi' timbali mongkaan kabai monginum ka' madi'mo montulu jalan momona anu kinatuluanku mae de aku minsusule'mo.”

¹⁸ Sahingga nabi anu i langkai'mo aijo' lengkat mae i Betel nombaleko'imo ia, ia notatae “Aku suele nabi susumo Belento. Tumpu nompalentahmo mae malaekat da mompokau aku molabot ka' mombee'i mongkaan Belento i laiganku.”

¹⁹ Sahingga nabi anu lengkat mae i Yehuda aijo' nambamo nokiijo' i laigan nu nabi anu i lalangkai'mo aijo' ka' nongkaan tiba ia.

²⁰ Hau-haunyo aha suha-suhang mongkan, Tumpu notataemo hi nabi anu i lalangkai'mo aijo'

²¹ sahingga pinisala'annyomo na nabi anu lengkat mae i Yehuda aijo' ia notatae, “Pinoto'i mae nu Tumpu Belento madi'mo nontuluti Ia. Belento madi'mo nombau apaa na anu pinalentahkon-Nyomo hi Belento.

²² Belento ninsusule'mo mae ka' nongkaanmo ka' nonginum, padahan Belento tinewa'mo na mombau han aijo'. Kalana aijo' Belento opateimo, ka' bangke' nu Belento madi'mo olamun i tampat polamunan nu Belento sa'anakan.”

²³ Salatan aha noko kaanmo, nabi anu i lalangkai'mo aijo' nompokonakonmo bau kasuhangan i keledai nu nabi lengkat mae i Yehuda,

²⁴ lantas nambamo na nabi aijo'. I pohintonga'an nu jalan ia labotmo lantas ia natemo. Bangke'nyo nati bandangmo i jalan, ka' kaledainyo nati tinjomo koko hi ia Singa aijo' suele tinuminjomo i kiijo'.

²⁵ To mia-mian anu nontulu i kiijo' nontoamo bangke'nyo tiba singa aijo'. Lantas aha nambamo i Betel ka' nompoto'imo apaa na anu tinoamo nu aha.

²⁶ Salatan i hongomo nu nabi anu i lalangkai'mo aijo' ia notataemo, “Tantu kiijo'mo na nabi anu madi'mo nontuluti palentah nu Tumpu! Mokonyo' aijo'.”

²⁷ Lantas notataemo na nabi anu ilangkai'mo aijo' hi to ana-anaknyo. “Pokonakon na bau kasuhanganku i keledaingku.” Salatan sinumake'mo i keledainyo, ia nambamo.

²⁸ Tinokannyo na bangke' nu nabi anu lengkat mae i Yehuda aijo' daagi' banda-bandang i jalan tiba keledainyo ka' singa koko hi ia. Singa aijo' madi' nonsa'u keledai aijo' ka' mule' madi' nongkaan bangke' aijo'.

²⁹ I hangkatnyo na bangke' aijo' ka' pinosake'nyo i keledainyo, lantas binoanyomo i Betel da o haangi ka' o lamun.

³⁰ Nabi anu ilangkai'mo aijo' na nolamun bangke' aijo' i tampat polamunan nu aha sa'anakan, jadi ia ka' to ana-anaknyo na no haangi bangke' aijo'. Aha notatae, “Paya' na belento, utusku, Paya'!”

³¹ Lapas aijo' nabi anu ilangkai'mo aijo' notataemo hi to ana-anaknyo, “De aku silakamo, lamun na aku i lamunan aiya koko nabi ai-aitu.

³² Apaa na anu tinaloakonnyomo aijo' pinalentah nu Tumpu mongkona mezbah kiijo' i Betel ka' iwi-iwi' na tampat ponsomban i to kota-kota nu Samaria memang tionyo jadi.”

I Yerobeam nombaumo kalakuan anu ma'idek

³³ I Tomundo' Yerobeam sabole-bole madi' mongka'oho' mombabali'i kalakuannyo anu ma'idek aijo'. Anu mongkalesang iwi-iwi' na tampat ponsomban anu binaunyomo aijo', ia sabole-bole mompile'i mian anu bau imam hi aha sa'anakan mae anu misa' lee' mae nu imam. Maumo pa'ihe asan ia mongka'oho', nuhangkatmo bau imam.

³⁴ Kalakuannyo anu ma'idek aijo' na nonsaduakonmo lee'nyo nohumpak balaa' ka' sinilakamo iwi-iwi'.