1 TOMU-TOMUNDO' 12 - KITAB NU TUMPU ALLA LELE MA'IMAI'

Bansa Israel sangga'at anu i sasu utara notomuhukmo

¹ I Rehabeam nambamo i Sikhem, kalana iwi-iwi' na mian nu Israel sasu utara sinihukmo i kiijo'mae kahanda'mo mohangkat ia bau tomundo'.

² Tempo'nyo aitu i Yerobeam anak i Nebat daagi' kiijo' mae i Mesir kalana nopalaimo madi'mo sinanang hi Salomo. Salatan ia nohongomo lele i Rehabeam, ia ninsusule'mo i Israel.

³ Mian anu i sasu utara nolagamo i Yerobeam, lantas aha hingga-hinggat tiba ia nambamo nangadap hi Rehabeam. Koonyo nu aha,

⁴ “I Salomo tuuma nu belento Tomundo' nombee'mo kalaja hi kami anu maboat hondo. Jadi uuka aiya de belento Tomundo' madi'mo mae talalo mompiboati kami nu kalaja ka' oga'aimo na kasansala'an mami, kami ba Tomundo mo hi Belento.”

⁵ Tinaaman i Rehabeam, “Pe'e da ku tutugi. Toka itolun po'ule'je toka mae.” Sahingga mian haha aijo' ninsusule'mo.

⁶ Lantas i Rehabeam nomoitamo pokinde' hi to tu'a tu'nyo anu toho'mo lewa' nompokinde'i i Salomo, tuuma i Rehabeam. “Mosia na aku montaami mian haha aijo'?” na koonyo i Rehabeam, “Mosia na pokinde' i belemiu?”

⁷ Tinaaman nu aha, “De belento Tomundo' totu'-totu'u ko kahanda' monginau' mian da'isan yo situjuimo apaa na anu nu poita nu aha, sahingga aha tulutmo hi belento Tomundo' sampe toka sidu-sidutu'.”

⁸ Panyo' pokinde' nu to tu'a-tu'anyo haha aijo' madi' pinajulian i Rehabeam. Ola mule' ahi', ia namba hi to mian-mian anu pokakana na umun nu aha ma'isa talalo motu'a, anu tempo'nyo uuka aiya montulungi ia.

⁹ Hi aha na pinompokilawannyo, “Mosia na pokinde' nu belemiu hi belengku da bau pontaami mian da'isan anu nomoitamo da madi' ku piboati nu kalaja na aha?”

¹⁰ Tinaaman nu aha, “Sumo uuka na opoto'i nu belento Tomundo' hi aha, 'Mau mule' akumo aiya na anu madi' moko ala mompalentah panyo' kamampuan nu tuumangku mompalentah daagi' ahi' aku na lebe mampu!'

¹¹ Tuumangku nombee'imo kalaja anu lebe maboat, panyo' anu ku bee' na kalaja aiya na lebe maboat mule'. Ia mondoke belemiu nu pompohos, panyo' aku mondoke belemiu nu pompohos anu ko hii'nyo besak!”

¹² Tinoka kino itolunnyo i Yerobeam ka' iwi-iwi' na mian haha aijo' po'ule' mule' nangadap hi Tomundo' Rehabeam, susumo anu pinalentahkonnyomo.

¹³ Madi' pokakana tiba pokinde' nu to tu'a-tu'anyo haha aijo', mian da'isan anu tinoka mae hi ia labot tinaloakonnyo,

¹⁴ susumo pokinde' nu to mia-mian anu pokakana na umun tiba ia, ia notatae “Tuumangku nombee'imo kalaja anu maboat hi belemiu, panyo' lebe maboat mule' na kalaja anu ku bee'. Ia mondoke belemiu nu pompohos, panyo' aku mondoke belemiu nu pompohos anu ko hii'nyo besak!”

¹⁵ Apaa na anu pinoita nu mian da'isan madi' pinajuliannyo. Panyo' aijo' memang pongka'oho'mo nu Tumpu. Apaa na anu pinoto'imo nu Tumpu hi Nabi Ahia kiijo' mae i Silo mongkona i Yerobeam anak i Nebat tionyo jadi.

¹⁶ Salatan tinoamo nu mian da'isan taalu' i tomundo' madi' ka'oho mohongo aha, aha nolobo'mo, “Bau apaa na mompajuli i Daud tiba sinin na lee'nyo! Aha madi' toho' nombau apa-apaa anu binee'nyo mae hi kita. Mian da'isan Israel, imbo' kita minsusule'mo! Pobakas na i Rehabeam aijo' mosi ulus butongnyo!” Sahingga ninsusule'mo na mian da'isan aha Israel,

¹⁷ ka' i Rehabeam tinimbali tomundo' ola i da'erah Yehuda.

¹⁸ Maumo sumo aijo', i Tomundo' Rehabeam daagi' ahi' nompalentah i Adoniram kapala nu mian anu mokalaja jalan, mombee'i pokinde' da boli ahi' mombau kahengge'an. Panyo' pinahambunu'akono nu aha nu batu na ia sahingga sinilakamo. Salatan nontoamo han aijo' naninsake'mo na i Rehabeam lia-lia' i karetanyo, ka' nopalaimo i Yerusalem.

¹⁹ Mulai pe'e aitu mian da'isan i sasu utara kalaja'an nu Israel saja'mo mombau kahengge'an hi to tomu-tomundo' anu lee' mae i Daud.

²⁰ Salatan songko-songko na mian da'isan nu Israel nohongomo taalu' i Yerobeam ninsusule'mo lengkat mae i Mesir, aha nolagamo ia da toka mae i pongobuan lantas i hangkatmo nu aha na ia binau tomundo' nu Israel. Ola mian da'isan tulunan mae nu bansa Yehuda na tataap montuluti lee' mae i Daud.

I Nabi Semaya nongkila-kilamo apaa na timbali saidi' mae

²¹ Salatan i Tomundo' Rehabeam tinokamo i Yerusalem, ia nomposihukmo 180.000 na suludadunyo anu pande na mahampate hi aha tulunan nu Yehuda ka' Benyamin da mahampate mongewa mian nu Israel ka' da tulunan-tulunan nu bansa Israel anu i sasu utara po'ule' mule' nu kuasai.

²² Panyo Tumpu Allah nonsaimo i Nabi Semaya.

²³ Da mompoto'i lele aiya hi Rehabeam ka' hi iwi-iwi' na tulunan nu bansa Yehuda ka' Benyamin,

²⁴ “Boli mompahampateakon mian nu Israel na belemiu kalana aha aijo' to utu-utus nu belemiu. Pinsusule'mo! Apaa na anu jiandimo aijo' pongka'oho'kumo.” Sahingga aha iwi-iwi' nontulutimo palentah nu Tumpu. Lantas ninsusule'mo na aha i laigan nu aha toto samian.

I Yerobeam nohikumo Tumpu

²⁵ Salatan tinimbalimo tomundo' nu Israel, i Yerobeam nompaka pohosonmo kota Sikhem i da'erah bungkutnyo nu Efraim, lantas jinojoongmo kiijo' mae panyo' madi' pinin. Lapas aitu ia namba mule' nompala'i kota aijo' ka' nompohosonmo Pnuel.

^26-27 Tinutugannyo i uno nu kinyonyoanyo, “De mian da'isan tataap saja' mamba i Yerusalem na monsombahkon koloban hi Laigan nu Tumpu susumo anu saja' nu bau nu aha uuka aiya, aha monsangaja'i mule' i Rehabeam, tomundo' nu Yehuda, lantas mompateimo mae aku.”

²⁸ Salatan tinimbalimo na han aijo', ia nombaumo ohua' na patong nu sapi' mosoni' na binau, lantas pinoto'inyomo hi mian da'isan, “O bansa Israel! Sukupmo na kopinyo belemiu saja' mamba i Yerusalem monsombah Tumpu. Uuka aiya, aiyamo na to pilo-pilogot nu belemiu anu nomboamo mae belemiu nosabat lengkat mae i Mesir.”

²⁹ Lantas pino'una'mo i Yerobeam na sa'angu' na sapi' mosoni' aijo' i Betel ka' sangga'at i Dan.

³⁰ Sahingga mian da'isan nombaumo dosa' kalana aha nambamo i Betel ka' i Dan monsombah pilogot.

³¹ Ka' mule' i Yerobeam nompaka baumo mule' tampar sangga'at lewa' ponsomban pilogot i bungkutnyo ka' nohangkatmo to ima-imam anu ingala hi bubu' aha anu misa' lee' mae nu aha tulunan nu bansa Lewi.

Tumpu nongkutukimo ponsomban pilogot kiijo' i Betel

^32-33 Lapas aitu imam haha aijo' pinaha pojoongmo i Yerobeam i Betel mokalaja kiijo' mae ka' ia suele nonsombahkonmo koloban hi sapi' mosoni' haha aijo' anu binaunyomo aijo'. Lantas tinantukannyomo de tangganmo sampulu' ka' olima' bitu'on ko ualu'nyomo, aijo'mo na sinaa daka' nu mian Israel, pokakanamo sumo sinaa daka' hi aha mian nu Yehuda. Toka sinaa aijo' i Yerobeam mambamo i Betel ka' monsombahkonmo koloban olame'akon sinaa daka' anu tinantukannyomo.