1 TOMU-TOMUNDO' 11 - KITAB NU TUMPU ALLA LELE MA'IMAI'

I Tomundo' Salomo nohikumo Tumpu

¹ I Tomundo' Salomo nongka'ima'imo manjoo' hondo na to bou-boune nu bansa sangga'at. Misa' ola anak lalangkoyang nu tomundo' Mesir na ingosoan i Salomo, panyo ia mule' nompaka po osoamo tiba to bou-boune nu aha mian Het, Moab, Amon, Edom tiba Sidon.

² Pinalentahkonmo nu Tumpu tukoo-Nyo mian nu Israel madi' timbali mo osoa mogogalo'an tiba bansa haha aijo', dumo aha saidi' mae monsaduakonmo mian nu Israel monsombahmo to pilo-pilogot sangga'at. Maumo sumo aijo' i Salomo nongosoaimo mule' ahi' aha to bou-boune mian anu isalipu'an.

³ Aha 700 na to lalangkoyan anak nu mian daka' na ingosoan i Salomo ka' daagi' mule' ko ambahue'nyo aha 300 na boune. Boune haha aijo' na nonsaduakon i Salomo nohikumo Tumpu Allah,

⁴ sahingga ia salatan ilangkai'mo pinoko alamo nu aha na pagala nonsale'i sahingga ia nonsombahmo to pilo-pilogot sangga'at. I Daud tuuma i Salomo montuluti hondo Tumpu, Tumpu Allahnyo panyo i Salomo madi'mo sumo tuumanyo.

⁵ I Salomo nonsombahmo Asytoret pilogot boune nu bansa Sidon, ka' suele Molokh pilogot mo'ane anu nu sombah nu bansa Amon.

⁶ Sumo aijo' na i Salomo binaladosa'mo hi Tumpu. I Daud tuuma i Salomo mohongo-hongo hondo Tumpu totu-totu'u na kinyonyoanyo panyo i Salomo madi'mo sinumo aijo'.

⁷ Aita i bungkutnyo sasu kabete'an Yerusalem ia nombaumo bau ponsomban Kamos pilogot nu aha mian Moab, ka' mule' bau ponsomban Molokh pilogot nu aha mian Amon – ohu-ohua' aijo' pilogot anu okabaati.

⁸ I Salomo nombau mule' tampat iyayamae da to bengke-bengkele'nyo anu lengkat mae i bansa anu isalipu'an timbali mompapu kamangian ka' monsombahkon koloban hi to pilo-pilogot nu aha.

^9-10 Pininduan na Tumpu, Tumpu Allah nu Israel nanintoa hi Salomo ka' nompo ingat ia tukoo-Nyo ia madi' timbali monsombah to pilo-pilogot sangga'at panyo i Salomo madi' ahi' montuluti Tumpu. Ia ola ahi' mompaka hiku Tumpu sahingga Tumpu nontambuha'imo ia.

¹¹ Tumpu notatae, “Kalana nu totonggolakon na molanggai palajanjian nu beleyum hi belengku ka' madi'mo montuluti palentah-ngKu iwi-iwi', jadi Ku alamo na kalaja'an nu beleyum ka' Ku bee'mo hi samian anu ko pangkatnyo anu mokalaja hi beleyum.

¹² Maumo sumo aijo', panyo kalana monginau' tuuma nu beleyum i Daud, madi' ahi' Ku bau na aijo' de daagi' beleyum tutuu'. Tokaje i tempo'nyo anakje nu beleyum momo'ane na mompalentah atina'je ka' Ku bau na aijo'.

¹³ Panyo madi' songko-songko na kalajaa aijo' Ku ala hi ia. Kalana monginau' posaihon-Ku i Daud ka' mule' monginau' Yerusalem anu binaung-Kumo kota'Ku aijo' sahingga daagi Ku potuha'i sa'angu' na tulunan nu bansa da nu palentah nu anak nu beleyum momo'ane.”

Aha anu monsampo bali' i Tomundo' Salomo

¹⁴ Sahingga Tumpu nonsungkelekmo kinyonyoa i Hadad lee' mae nu tomundo' Edom da monsampo bali'mo i Tomundo' Salomo.

^15-16 Daagi' pinin ma'isa pe'e aijo' jinadi i Tomundo' Daud nompatundu'mo Edom, i Yoab talenga' nu suludadu i Tomundo' Daud nambamo nokiijo' i Edom molamun to mia-miannyo anu sinilakamo. Inganom na bitu'on na kinopinnyo na ia tiba suludadunyo jinojoong kiijo' mae i Edom. Ka' tempo'nyo aitu aha nompateimo to momo'ane iwi-iwi' anu kiijo' mae.

¹⁷ Panyo i Hadad anu tempo'nyo aitu daagi olitau nopalaimo namba i Mesir hingga-hinggat pa' aha sangkuka na mian nu Edom tiba to posa-posaihon nu tuumanyo.

¹⁸ Aha namba lengkat mae i Midian lantas nambamo i Paran. Ikiijo' mae tiba to pia-piangkuka na mian sangga'at nosangalumo tiba aha lantas hingga-hinggat nambamo i Mesir, kahanda' singkabot tiba i tomundo' Mesir. Tomundo' aijo' nombee'imo i Hadad laigan ka' tano' da bau kajojoongannyo ka' mule' balanja anu bau pontumuu'.

¹⁹ Sahingga i Hadad tinimbalimo sangalu anu mompaha kona hondo i tomundo' sahingga i Hadad binee'annyomo dawoknyo utus ise nu bengkele' i Tahpenes da bau bengkele'nyo.

²⁰ Mamanga bengkele' i Hadad nohumpakmo samian na anak mo'ane anu sinanggohannyo i Genubat. Anak aijo' pinidaka'an nu posi bengkele'nyo ka' jinojoongmo i laigan nu tomundo' hingga-hinggat tiba to ana-anak mo'ane i tomundo'.

²¹ Salatan ihongomo i Hadad na lele tukoonyo nu aha, i Tomundo' Daud sinilakamo ka' i Yoab talenga' nu suludadu Israel suele sinilakamo, i Hadad notataemo hi tomundo' nu Mesir, “Pobee'mo mae na aku da minsusule'mo i lipu' kinahampeanku.”

²² “Ka' kadaka'” na koonyo i tomundo'. “Pa' daagi'ko kakulangan na beleyum i aiya, sahingga beleyum kahanda'mo minsusule' ilipu' kinahampean nu beleyum?” “Madi' ko kakulangan apa-apaa hi belengku” na koonyo i Hadad, “anyo pobee'mo mae na aku minsusule'.”

²³ Tumpu Allah nonsungkelek mule' suele kinyonyoa i Rezon anak i Elyada da monsampo bali' i Salomo. I Rezon posaihon anu nopalaimo nompala'imo tuannyo aijo'mo i Tomundo' Hadadezer tomundo' nu aha Zoba.

²⁴ I Tomundo' Daud toho'mo nompatundu' i Hadadezer aiya ka' nompateimo to sanga-sangalu i Hadadezer anu lengkat mae i Siria. Tempo'nyo aitu na i Rezon nopalaimo nompala'imo i Hadadezer ka' nonsale'imo to mia-mian da mombaumo kasangaja'an, lantas nongkapalaimo golombolan. Ia tiba suludadunyo nambamo i Damsyik lantas jinojoongmo i kota' aijo'. Tinoka kiijo' mae suludadunyo nohangkatmo ia binau tomundo nu Siria.

²⁵ Susumo i Hadad, i Tomundo' Rezon suele nonsampo bali'mo Israel tempo'nyo i Salomo daagi tutuu' ka' lewa'mo nombau kahengge'an ilipu' aijo'.

Tumpu Allah nojanji'mo hi Yerobeam

²⁶ Mian sangga'at anu notomuhumo nongewa i Salomo aijo'mo aha mian anu ko pangkatnyo mokalaja hi ia, sanggonyo i Yerobeam. Ia anak i Nebat lengkat mae i Zereda da'erah Efraim. Tinanyo binalumo sanggonyo i Zerua.

²⁷ Ka' mule' aiya monsisikakon mongkona mosia na i Yerobeam nombau kahengge'an. Tempo'nyo lewa'mo nontambuli tano' anu isasu salatan Laigan nu Tumpu ka' mule' pagan mesen nu kota' po ule'mo pinoko pianan.

²⁸ I Yerobeam suele nokalajamo ikiijo'. Salatan tinoamo i Salomo na i Yerobeam taalu' ia pande ka' mule' manjoo' na anu nu sumbu' ka' suele makeke binee'annyomo kalaja na ia monjagai mian anu opakisa na mokalaja i da'erah nu aha tulunan nu bansa Manasye tiba Efraim.

²⁹ Daagi kino sansinaan i Yerobeam nosabatmo lengkat i Yerusalem. Hau-haunyo ia itonga' nu jalan kiijo' i padang ia ilambananmo mae i Nabi Ahia anu lengkat mae i Silo, tempo'nyo aitu ia nompusok mae juba' anu daagi' bu'ou.

³⁰ Lantas ingukatmo i Ahia na juba'nyo ka' binea-beaknyomo na juba' aijo' sinampulu' ka' ohua' na beaknyo.

³¹ Lapas aijo' pinoto'inyomo hi Yerobeam, “Ala hi beleyum sampulu' na beaknnyo kalana Tumpu, Tumpu Allah nu aha Israel nompoto'imo sumo uuka hi beleyum, 'Ku alamo na kalaja'an aiya hi Salomo ka' Ku bee'mo hi beleyum na tulunan nu bansa anu sampulu' aijo'.

³² Sa'angu' na tulunan nu bansa tataap hi Salomo, kalana monginau' posaihon-Ku i Daud tiba Yerusalem anu pinile'an-Kumo ilipu' nu aha Israel songko-songko ka' binaumo kota'-Ku.

³³ Ku bau na han aijo' kalana i Salomo nohikumo Aku ka' mule' nonsombahmo pilogot haha aijo', aijo'mo: Asytoret pilogot boune nu bansa Sidon, Kamos, pilogot nu bansa Moab, ka' mule' Milkom pilogot nu bansa Amon. I Salomo madi'mo nontuluti pongka'oho'-Ku. Ia madi' susumo tuumanyo i Daud anu tulu-tulutan hondo hi belengku ka' saja' ahi' mombau apaa na anu Ku palentahkon.

³⁴ Maumo sumo aijo' Aku madi' mongala iwi-iwi' na kalaja'annyo aijo' hi ia. Ia daagi Ku pobee' mompalentah de ia ma'isa silaka. Han aijo' Ku bau kalana monginau' i Daud posaihon-Ku aijo' anu pinile'an-Kumo ka' mule' anu nontulutimo atulan-Ku ka' mule' palentah-ngKu iwi-iwi'.

³⁵ Kalaja'an aiya madi'mo Ku bee' hi anak mo'ane i Salomo ka' sampulu' na tulunan nu bansa aiya Ku bee'mo hi beleyum.

³⁶ Panyo sa'angu' na tulunan nu bansa Ku bee'mo hi ia da saja' daagi' ko samian na lee' mae i Daud posaihon-Ku aijo' na mompalentah anu saja' monsombah Aku i Yerusalem kota' anu pinile'an-Kumo tampat bau ponsomban Aku.

³⁷ Ka' beleyum Yerobeam Ku baumo tomundo' nu Israel ka' mule' Ku pobee'mo mompalentah songko-songko na da'erah iya na anu nu kahanda'i.

³⁸ De beleyum montiho susumo posaihon-Ku i Daud tulu-tulutan hondo hi beleng-Ku ka' mule' mombatuki iwi-iwi' na atulan-Ku ka' mule' momposanang kinyonyoang-Ku ka' mule' montuluti iwi-iwi' na anu Ku palentahkon hi beleyum, saba' beleyum saja' Ku toa ka' Ku jagai. Ku potimbalimo tomundo' na beleyum hi aha Israel. Sabole-bole lee' nu beleyum na Ku potimbali tomundo' nu aha Israel mombolosakon beleyum susumo anu binaung-Kumo hi Daud.

³⁹ Kalana i Salomo binaladosa'mo, Ku hukumo na lee' i Daud panyo madi' sampe toka sidu-sidutu'.’ ”

⁴⁰ Salatan lele aijo' tinokamo hi Salomo ia binatanga'mo da opateimo na i Yerobeam. Panyo i Yerobeam nopalaimo namba hi Tomundo' Sisak i Mesir ka' jinojoongmo kiijo' mae sampe i Salomo sinilakamo.

I Tomundo' Salomo sinilakamo

⁴¹ Sisikon sangga'at mongkona i Salomo ka' iwi-iwi' na anu binaunyomo ka' mule' mongkona kapandeannyo tinulismo i kitab Sisikon Kantumuu'an i Salomo.

⁴² Pinatompulu' na taun na kinopinnyo na i Salomo nompalentah i Yerusalem hi aha songko-songko na Israel.

⁴³ Lapas aijo' ia sinilakamo ka' ilamunmo i Kota' Daud. Lantas i Rehobeamo anaknyo momo'ane na binau tomundo' nombolosakon ia.