1 TOMU-TOMUNDO' 10 - KITAB NU TUMPU ALLA LELE MA'IMAI'

Tomundo' boune nu lipu' Syeba nambamo mae hi Salomo

¹ Kapandean i Salomo tinogilelemo tinoka-tokamo hi tomundo' boune nu lipu' Syeba. Sahingga ia nambamo mae i Yerusalem kahanda' monsoba-soba i Salomo, ia soba nompokilawa anu toto maha-mahan.

² Ia namba sinangaluan nu mian da'isan hondo, ka' unta pinaha posake'an manjo'ona lampa-lampa, to batu-batu nu mainan, ka' mosoni' manjoo' hondo. Salatan siningkabotmo tiba i Salomo, tomundo' boune aijo' soba sobamo nompokilawa iwi-iwi' na ngahannyo anu uutu i kinyonyoanyo.

³ Apa-apaa na anu pinokilawanyo aijo' tinaaman i Salomo iwi-iwi' mau pe'e sa'angu' madi' ko anu i nahan hi ia.

⁴ Tomundo' boune aijo' nonsakisimo mosia na kapandean i Salomo. Ia nontoamo laigan nu tomundo' anu binau i Salomo,

⁵ mosia na ia mongatun anu ko pangkatnyo mokalaja i laigan nu tomundo' ka' mule' pibaju' nu aha anu pokakana na buhitnyo, ka' laigan kajojoongan nu aha. Ia nontoamo kaanon ka' anu o inum tinatuakon, mosia na to pangga-panggalima mokalaja i bau-bauon, ka' iwi-iwi' na koloban anu osombahkon i Salomo hi Laigan nu Tumpu. Tomundo' boune nu lipu' Syeba salatan nontoamo aijo' iwi-iwi', binangangmo ka' naha unda'anmo.

⁶ Sahingga ia notatae hi Tomundo' Salomo, “Iwi-iwi' na anu i hongongkumo i lipu' mami mongkona kapandean nu belento Tuan, memang totu'u!

⁷ Momonanyo mae madi' pinalesayangku, panyo' salatan aku tinokamo mae ka' posi matangkumo na nonsakisi, atina'je ka' aku nompalesayamo totu-totu'u. Memang totu'umo na anu i hongongkumo, ma'isa montokai mintonga' na anu tinoangkumo uuka aiya. Taalu' totu'u ahi' na kapandean ka' kakaya'an nu belento Tuan, lebe ahi' manjoo' molingkudui apaa na anu pinolele hi belengku.

⁸ Nohumpakmo hondo dale' na to bengke-bengkele' nu belento Tuan! Ka' suele nohumpakmo hondo dale' na to mia-mian anu ko pangkatnyo anu saja' mokalaja hi belento Tuan, sahingga saja' mohongo hi belento Tuan iwi-iwi' na pokinde' anu mompopande!

⁹ O puji' na Tumpu, Tumpu Allah nu belento Tuan! Kalana nohangkatmo belento Tuan tinimbali tomundo' nu Israel, pinotoamo nu Tumpu hi belento Tuan, na Ia sanang hi belento Tuan. Madi' kokamingkotanyo na Ia mongkalibosi bansa Israel; mokonyo' aijo' Ia nohangkatmo belento Tuan binaumo tomundo' nu aha, da belento Tuan sabole-bole ahi' mompojalan atulan ka' ka'adilan.”

¹⁰ Lapas aijo' tomundo' boune nu lipu' Syeba nombe'eimo palasen hi Salomo anu binoanyo mae kila-kila 4.000 kilogram na mosoni' ka' suele batu nu mainan manjoo' hondo ka' manjoo'na lampa-lampa. Madi'mo daagi' toho' i Salomo nohumpak manjoo'na lampa-lampa anu sumo aijo' na konjoo'nyo susumo anu bine'eje nu tomundo' boune nu lipu' Syeba hi ia. (

¹¹ To kapa-kapan nu Hiram anu nomboamo mae mosoni' lengkat mae i Ofir obee' hi Salomo, suele nomboamo mae batu nu mainan ka' kau' sondana.

¹² Kau' aijo' binau i Salomo talali anu opake i Laigan nu Tumpu ka' i laigan nu tomundo'; ka' suele obau kasapi ka' gambus da o kuti' nu to mia-mian anu manyanyi. Kau' haha aijo' aijo'mo kau' sondana anu ma'ima' hondo, anu u'utu mae toho'mo binoa i Israel; madi'mo daagi' toho' mian nontoa kau' anu sumo aijo' na ko ima'nyo.)

¹³ I Salomo suele nombee'i palasen susumo biasa anu lewa' pompalaseninyo sangga'at; anu binee'nyo hi tomundo' boune nu lipu' Syeba, iwi-iwi' apaa na anu pinoitanyomo. Lapas aijo' ninsusule'mo na tomundo' boune aijo' i lipu'nyo tiba aha iwi-iwi' anu nonsangalui mae.

Kakaya'an i Tomundo' Salomo

¹⁴ Sataun toka sataun i Tomundo' Salomo mohumpak mosoni' mongohanimo 23.000 kilogram,

¹⁵ ma'isa minsoop na ka'untungan sangga'at anu o humpak badagang ka' hasin anu o'ala hi to mia-mian anu badagang, to tomu-tomundo' nu Arab ka' anu o humpak gohi to gubo-gubolonun nu Israel.

¹⁶ I Salomo nombabu 200 na kanta anu daka', mosoni' na tinutuk. Mosoni' anu binau kanta aijo', toto sa'angu' kila-kila popitu' na kilogram na koboatnyo.

¹⁷ Ka' ia mule' nombau 300 na kanta mosoni' anu ise' hondo. Mosoni' anu binau kanta toto ise-ise' haha aijo' toto sa'angu' kila-kila ohua' na kilogram na ko boatnyo, iwi-iwi' mosoni' na tinutuk. Kanta haha aijo' iwi-iwi' pino'una'nyo i laigan anu osa-osanggohi Laigan Alas Libanon.

¹⁸ Ia mule' nombaumo sa'angu' na kadela bau kasuhangan nu tomundo' i lapisan nu sae nu gaja ka' binunga-bungan nu mosoni' anu madi' ko galo'nyo.

¹⁹ Kadela aijo' pino'anuan limanyo, ka' poti-potimbiha' daagi' ko patong nu singa. I hikunyo nu kadela aijo' ko patongnyo ubak nu sapi'. Ka' mule' kadela aijo' ingojanan anom na langku-langku'nyo.

²⁰ Pusnyo nu langku-langku'nyo kowi koanan toto sa'angu' ko patong singa – iwi-iwi'mo sampulu' ka' ohua' na konjoo'nyo. Madi' ko kadela nu tomundo' anu sumo aijo', maumo pa'iyayame na lipu' anu ko tomundo'nyo.

²¹ Iwi-iwi' na pakakas bau ponginuman i Salomo, mosoni' na binau, ka' iwi-iwi' na pakakas anu pino'una' i Laigan Alas Libanon suele mosoni' anu madi' ko galo'nyo na binau. Madi' ko anu salaka na binau, kalana tempo'nyo daagi' i Salomo nompalentah mian montoa salaka aijo' madi' ko olinyo.

²² I Salomo ko kapan anu toto daka-daka' anu talabut hingga-hinggat tiba to kapa-kapan nu Tomundo' Hiram. Totolu' na taun ola minsan nakapan haha aijo' minsusule' mae momboa mae mosoni', sae nu gaja, balan ka' tomonsi' merak.

²³ I Tomundo' Salomo na lebe kaya ka' lebe pande molingkudui to tomu-tomundo' i dunia maumo pa' iyayamae.

²⁴ Iwi-iwi' na mian i dunia aiya songko-songko batanga' da mamba singkabot tiba i Salomo kahanda' mohongo pokinde' anu moko pande anu binee'mo nu Tumpu hi ia,

²⁵ Aha toto samian de aha toka mae ko anu nu boa mae nu aha o palasen nakon hi Salomo. Aha mombee'i to bala-balang salaka, mosoni', hude, toongon anu bau pahampate, santo lampa-lampa, ajahan ka' bagal. Sumo aijo'mo sataun toka sataun.

²⁶ I Salomo nohangkatmo suludadu anu bau pahampate aijo'mo 1.400 na kareta opake mahampate, ka' 12.000 na suludadu anu monsake'i ajahan. Sambagian pinojoongmo i Yerusalem, ka' labinyo pinojoongnyo i kota sangga'at.

²⁷ Tempo'nyo i Salomo nompalentah, kiijo' i Yerusalem salaka sumo balang biasa susumo batu ka' kau' lontio' Libanon nanjoo'mo hondo sumomo kau' ara biasa.

²⁸ To mia-mian anu nu palentah i tomundo' badagang, ahamo

²⁹ aijo' na mamba mongala ajahan lengkat mae i Mesir. Olinyo nu ajahan sa'angu' 150 na doi salaka', ka' olinyo nu kareta sa'angu' anu bau pahampate 600 na doi salaka. Lapas mae to mia-mian haha aijo' anu badagang, ajahan haha aijo' ka' kareta haha aijo' anu opake bau pahampate po'ule' mule' opobaluk hi to tomu-tomundo' Het ka' hi to tomu-tomundo' Siria.