1 TIMOTIUS 6 - KITAB NU TUMPU ALLA LELE MA'IMAI'

¹ To mia-mian Kristen anu tinimbalimo posaihon, tionyo ahi' nu akui nu aha na tuan nu aha patut ahi' o adati, da mian madi' mombusiki sanggo nu Tumpu kabai pangajalanto.

² To posa-posaihon anu tuannyo mian Kristen, madi' timbali monte tuannyo kalana aha bubu' mian Kristen. Ola ahi' aha tionyo mohongo-hongo palentah nu tuan nu aha aijo' tiba lebe mule' ma'ima', kalana tuan anu ohongo-hongo ma'ima' na palentahnyo aijo' bubu' mian palesaya anu okalibosi. Iwi-iwi' aiya tionyo ahi' beleyum mongajanakon ka' opokinde'akon.

Pangajalan anu madi' totu'u ka' kakaya'an anu totu-totu'u

³ Ihehe na mongajanakon ajalan sangga'at anu madi' pokakana aijo' ka' madi' mompahakona tiba ajalan anu totu'u lengkat mae hi Tumpunto i Yesus Kristus, ka' tiba ajalan nu agamanto,

⁴ atina'mo na mian anu kobubuun ka' madi' monsumbu' apa-apaa! Panyakitnyo aijo'mo ola mongka'ima'i mompaha lawa-lawani ka' mahanggaga mongkona potatae sahingga monsaduakonmo ma'idekan na kinyonyoa, mosubalimo, mompitana'i, monsangka anu madi' ma'ima',

⁵ ka' po'uwalian anu madi'mo ko kamingkotannyo. Jalan pikilan nu mian haha aijo' pinu'otmo ka' madi'mo daagi' totu'u. Aha monsangka de bala agama moko timbali kaya.

⁶ Hondo-hondomo agama mombee'i ka'untungan anu daka', de mian mongoa'imo sukup apaa na anu daagi'mo hi ia.

⁷ Kalana madi' ko sa'angu'nyo pe'e na anu binoantomo i uno nu dunia aiya, ka' madi' ko sa'angu'nyo pe'e suele na anu opoko ala oboanto mosabat mompata'i dunia aiya!

⁸ Jadi de daagi' ko kaanon ka' pakean, aijo' sukupmo.

⁹ Panyo mian anu mongka'oho' timbali kaya, tagodamo ka' nusegotimo nu sagala lupa na anu oka'ima'i, anu ponga' ka' mongidei. Anu oka'ima'i haha aijo' mombau mian timbali magalis ka' silaka.

¹⁰ Kalana mongka'ima'i doi lubatmo na lupa-lupa ka'idekan. Daagi' kosambahagian na mian ola molio doi sahingga madi'mo mombatuki ajalan nu Kristen, lantas aha nu tokaimo nu kasansala'an anu manjoo' hondo anu mongideimo kinyonyoa nu aha.

To poki-pokinde' kona hi butong

¹¹ Panyo beleyum atina' anumo nu Tumpu, jadi beleyum tionyo matikojo'on i han iwi-iwi' aijo'. O'usahakon da timbali mian anu totu'u i mata nu Tumpu, anu tulut hi Tumpu, palesaya hi Kristus, mongkalibosi sangko mian, sabaan i uno nu mongoa'i sansala, ka' mingkalakuan ma'ima' na kinyonyoa.

¹² Bala usaha totu-totu'u da tumuu' sumo mian Kristen da beleyum mohumpak tambo tumuu' kopian sampe toka sidu-sidutu'. Kalana aijo'mo na kahanda' nu Tumpu molaga beleyum tempo'nyo beleyum nongakuimo i ahop nu mian da'isan tukooyum palesayamo hi Kristus.

¹³ Ka' uuka aiya, i ahop nu Tumpu anu nombee'mo nyawanyo hi iwi-iwi na apaa, ka' i ahop i Kristus Yesus anu nombee'imo katalangan anu totu'u mongkona butongnyo hi Pontius Pilatus, ku poita na aiya hi beleyum:

¹⁴ Tututimo na palentah iwi-iwi' aijo' ima-ima' ka' madi' ko kasala'annyo sampe i sinaa nu Tumpunto i Yesus Kristus po'ule'mo toka.

¹⁵ Katokaan-Nyo nu posi tantukanje nu Tumpu i tempo' anu matantu. Iamo na samata-mata Mongkuasai; Ia anu talasanggo, Tomundo i iwi-iwi na tomundo, ka' Tumpu i iwi-iwi na tuan.

¹⁶ Olamo Ia na anu madi' opoko kuasai nu kapatean; Ia tumuu' i uno nu jingka anu madi' opoko ohani maumo pa' ihe. Madi' ko samian pe'e na manusia anu toho'mo nontoa Ia, kabai anu moko ala montoa Ia. Olamo Ia na o'adati, ka' kakuasa'an-Nyo sampe toka sidu-sidutu'! Amin.

¹⁷ Hi to mia-mian anu kaya i dunia aiya tionyo ahi' nupoita nu beleyum da aha boli kobubuun, ka' boli montaha'imani to paka-pakakas anu madi' tataap – sumo hannyo nu kakaya'an. Aha tionyo montaha'imani Tumpu anu nombee'imo molabi-labi iwi-iwi na apaa hi kita, da olasainto.

¹⁸ Poita hi aha da mompotoa ka'ima'an, da manjoo' na mombau hahan anu ma'ima', manonong, ka' mongka'ima'i mobagi.

¹⁹ Tiba jalan anu sumo aijo' aha mompolimu'mo halata' anu ma'ima' anu timbali otaha'imani, anu tokaje aiya mae i ahop. Ka' tiba jalan aijo', aha mohumpakje kantumuu'an anu sampe toka sidu-sidutu', atina'mo kantumuu'an anu totu'u.

²⁰ Apaa na anu pinalesayakonmo hi beleyum, ojagai na aijo' ma'i-ma'ima', Timotius! Opatikojo'oni na to sisi-sisik anu madi' mingkaliangan ka' painggagan mongkona hahan anu madi' totu'u, osanggohimo “Sa'angu' na Ilimu'.”

²¹ Kalana daagi' ko to mia-mian anu montaloakon tukoonyo aha daagi' ko ilimu' aijo', sahingga madi'mo pokakana tiba pangajalan nu Kristen anu nu palesaya nu aha u'utu mae. O amalakon da Tumpunto mombalakati to Utu-utus. Tabea' mami, I Paulus 13