1 TIMOTIUS 5 - KITAB NU TUMPU ALLA LELE MA'IMAI'

Anu tionyo obau hi to mia-mian anu sama-sama palesaya

¹ Boli beleyum talalo montambuha'i mian anu lebe motu'amo anu molingkuduimo belemiu na ko tu'anyo, panyo osale'i na ia da mohongo potatae nu beleyum susumo au'aitu ia tuuma nu beleyum. Opalentah na to oli-olitau susumo utus,

² ka' to bou-boune anu tu'anyomo susumo tina. To lalangkoyang nu palentah susumo utus ise' nu kalakuan anu ma'ima'.

³ O'adati na to balu-balu anu totu-totu'u me mosi tumuu' butong sausa'.

⁴ Panyo de samian na balu, ko to ana-anaknyo kabai to maku-makumpunyo, aha aijo'mo na momona tionyo obee'i pangalati'an, da aha tionyo mompalahatikan to utu-utus nu aha ka' mombalosi kinyonyoa nu tu'anyo ka' kele' nu aha. Kalana han anu sumo aijo' ahi' na momposanang kinyonyoa nu Tumpu.

⁵ Balu anu totu-totu'u me butong sausa', ka' madi'mo ko anu pa' ihe na anu timbali montombuati, ia me taha'iman hi Tumpu. Sinaa ka' pihi ia la saja' balado'a hi Tumpu momoita da Nu montulungi.

⁶ Panyo balu anu mongka'oho' tumuu' ola basana-sanang, ia natemo mau mule' ia daagi' tutuu'.

⁷ Opotokakon na to sonto-sonto' aiya hi aha, da aha tumuu' madi' ko aluknyo.

⁸ Panyo de ko mian anu madi' montombuati to julu-julunyo, lebe-lebe mule' to utu-utusnyo, mian aijo' motundemo i kapalesaya'annyo; ia lebe ma'idek nu lingkuduimo na mian anu madi' palesaya.

⁹ Ola balu anu sosokmo i atulan haha aiya yo, timbali oposoop i uno nu daputan nu to balu-balu: Umunnyo tionyo madi' maga'a lengkat i anompulu' na taun, u'utu mae ola minsan na no'osoa,

¹⁰ talasanggo salaku boune anu saja' nombaumo hahan anu ma'ima', salaku sonto'nyo: nompidaka'imo to ana-anaknyo sampe na'ima', sanang na montalima to mia-mian sonso' male' i bonuanyo, montoa kapalaluan nu mian anu pinalesayamo, montulungi to mia-mian anu susa', ka' mombau totu-totu'u iwi-iwi' na ngahan nu kalaja anu ma'ima'.

¹¹ Boli oposoop i uno nu daputan aijo' to balu-balu anu ma'isa talalo bengkele'. Kalana de aha ko kinyonyoamo moduhus tiba mo'ane talalomo kosuhu-suhut aha mongkahanda'imo, da po'ule' mule' mo'osoa ka' mompala'imo i Kristus.

¹² Sahingga aha sala'mo, kalana aha nolanggaimo janji' anu binee'mo hi aha.

¹³ Ka' mule' aha ola lewa' mongingkoti tempo' kalana lewa'mo mosabat ka' minsoop i laigan nu mian. Ka' anu lebe ma'idek mule', aijo'mo saba' aha lewa'mo mompitana'i sanggo nu mian sangga'at ka' monggalo'imo ulusan nu mian tiba lewa'mo monsisik hahan anu madi' palalu lewa' osisik.

¹⁴ Aijo' na sababnyo ku kahanda'i da to balu-balu anu ma'isa pe'e bengkele' po'ule' pe'e mo'osoa, mohumpak anak ka' mongulus auwan da sampo bali'to madi' mohumpak kasampatan mongide-idei sanggonto.

¹⁵ Kalana daagi' ko to balu-balu anu nolempangmo nombatukimo Ibilis.

¹⁶ Panyo de daagi' ko boune mian Kristen ko utus anu binalumo, ia tionyo montulungi balu haha aijo'; boli mompojohok jama'atje na montanggungi aha. Tiba jalan anu sumo aijo' jama'at timbali montulungi balu haha aijo' anu madi' mohondo ko sampoto utusannyo.

¹⁷ Polaya' nu jama'at anu mompojalan kalaja ma'i-ma'ima', patut obee'i bau ponginau' kalajanyo pinduan lipat, lebe-lebe aha anu make-makeke na mompogreja ka' mongajan.

¹⁸ Kalana i uno nu Kitab nu Tumpu tinulismo, “Sapi' anu hau-haunyo mongutut gandum da mohudu' na batunyo nu gandum anu aijo' i pangkoengnyo, boli ahi' osoku' na nganga'nyo,” suele mule', “Mian anu mokalaja, ko hak montalima tambonyo.”

¹⁹ Boli monsitujui poosala' mongkona hi samian na polaya' nu jama'at, beilako' de nu pototu'umo nu ohua' na mian sakisi kabai molabi.

²⁰ Mian anu mombau dosa', tionyo opokinde'i i ahop nu iwi-iwi na jama'at, da sangga'at timbali mabuhuk.

²¹ I ahop nu Tumpu, Kristus Yesus ka' to mala-malaikat anu pinile'anmo kupoita sabole-bole beleyum mombatuki pokinde' haha aiya madi' pilenje mompisala'i maumo pa' ihe ka' boli mosi tinjo-tinjo, paimpisa-pisala'ian.

²² Boli talalo malia' mombalakati toto samian kahanda' mompotantumo ia da o hangkatmo baumo salaku posaihon nu Tumpu. De mian sangga'at baladosa', boli maninggalo' i dosa' aijo'. Ojagai na butong miu da tataap susi'.

²³ Boli ola monginum uee, o'inum sangkiding na anggur suele da bau pontulungi mompohansun kaanon i kompong miu kalana beleyum toto minsan masakit.

²⁴ Dosa' nu sambagian mian mau ma'isa pe'e oputusi, nanasamo na nontoa. Panyo dosa' nu mian sangga'at osumbu'je de lapasmo na mongulus.

²⁵ Sumo aitu mule' na kalakuan anu ma'ima' lau-laus kantoan. Ka' mau mule' anu madi' dengke na otoa, madi' saja'mo timbali opoko posuluk.