1 TIMOTIUS 2 - KITAB NU TUMPU ALLA LELE MA'IMAI'

Mosia na jama'at mogreja

¹ Momonanyo, kupoita totu-totu'u da apaa na anu opoita, sambayang, ka' mondo'akon mian da'isan, ka' mule' mompoita talima kase anu opotoka hi Tumpu kona hi mian iwi-iwi';

² kona hi to tomu-tomundo ka' kona hi iwi-iwi' mian anu montoongi kakuasa'an. Poita da kantumuu'anto sanang ka' aman na palesaya hi Tumpu i uno nu kalakuan anu pantas.

³ Aijo'mo na anu ma'ima' ka' momposanang kinyonyoa nu Tumpu Allah, anu Momposalamat kita.

⁴ Ia mongka'oho' da iwi-iwi' na mian oposalamat, ka' monsumbu' anu totu'u.

⁵ Kalana, ola sa'a-sa'angu'nyomo na Tumpu, ka' ola samian na bau ponsumbu'an Tumpu manusia aitumo i Kristus Yesus.

⁶ Ia samian na manusia anu nombee'mo butong-Nyo da mompobebas iwi-iwi' na mian i to dosa-dosa' nu aha. Tiba jalan aijo' Tumpu Allah nompoto'imo tempo'nyo anu tinantukanmo, kalana Ia mongkahanda'i da iwi-iwi' na mian oposalamat.

⁷ Ka' aijo'mo na sababnyo aku pinokau namba hi to mia-mian anu misa' Yahudi da mompolele hi aha lele mongkona kapalesaya'an anu totu'u. Anu pinotoingkumo aiya, memang totu'u, aku madi' baleko'.

⁸ Ku kahanda'i da mau mule' iya mae na to momo'ane balado'a ming kinyonyoa ahi' anu susi', madi' pusa kabai ko po'uwalian.

⁹ Tionyo ahi' to bou-boune mompakei butongnyo babaanggan, ka' mompake pakean anu ma'ima' na otoa. Boli mompake potongan nu ubak ogunting anu talalo okabangangi kabai mai-mainan mosoni', kabai mutiara, kabai pakean anu to maha-mahan.

¹⁰ Panyo, ola ahi' to bouboune mompakei butongnyo nu palabuatan anu ma'ima' sumo anu patut hi boune de mogrejamo hi Tumpu.

¹¹ Boune tionyo ahi' balagulu' momohokot ka' tulu-tulutan.

¹² Aku madi' mompototu'u boune mongajan kabai mompalentah mo'ane; aha tionyo ahi' momohokot.

¹³ Kalana anu momona pinotimbali aijo'mo i Adam, lapas aijo' atina'je ka' i Hawa.

¹⁴ Ka' misa'nyo i Adam, panyo boune ahi' na anu ingakalanmo, sahingga nolanggaimo palentah nu Tumpu.

¹⁵ Mau mule' sumo aijo', boune salamat na mohampeakon anak, asan ia ta'aluk na kinyonyoa tataap palesaya hi Kristus ka' tataap mongkalibosi mian sangga'at ka' tumuu' samata-mata kalana kapentingan nu Tumpu.