1 TESALONIKA 1 - KITAB NU TUMPU ALLA LELE MA'IMAI'

¹ To utu-utus jama'at nu Tesalonika, anu pinalesayamo hi Tumpu Allah Tuuma ka' Tumpu Yesus Kristus: Kami, aiya i Paulus, i Silas ka' i Timotius, montaha'imani ka' mongamalakon da Tumpu mombee'i balakat tiba ka'ima'an hi komiu.

Kantumuu'an tiba kapalesaya'an nu to mia-mian Tesalonika

^2-3 Kami saja' montalima kase hi Tumpu, kalana komiu to utu-utus iwi-iwi'. De kami balado'amo hi Tumpu Tuumanto, kami saja' monginau' komiu. Kami saja' mondo'akon komiu. Kami saja' monginau' mosia na komiu mompotoa kapalesaya'an miu hi Kristus i uno nu palabuatan, mosia na komiu mongkalibosi mian sangga'at sahingga montulungi aha, ka' mosia na komiu taha'iman totu-totu'u hi Tumpunto i Yesus Kristus.

⁴ Osumbu' mami na komiu to utu-utus, nukalibosi nu Tumpu Allah ka' nompile'imo komiu da iamo samata-mata na tumpu-Nyo.

⁵ Kalana kami mompotokakon Lele Ma'ima' hi belemiu misa' ola potatae, panyo mule' tiba kuasa ka' tiba Roh nu Tumpu, ka' kami palesaya hondo na kahondoan lengkat i Lele Ma'ima'. Osumbu' miu mosia na kami tinumuu' nombaumo kapentingan miu tempo'nyo kami jinojoong itina' hi komiu.

⁶ Komiu mombatukimo sonto' mami, ka' sonto' nu Tumpu. Mau mule' komiu talalo mongoa'i sansala, otalima miu nu lame' na lele anu opolele hi komiu. Kalame'an aijo' binee' nu Roh nu Tumpu.

⁷ Tiba anu sumo aijo' komiu timbali sonto' hi iwi-iwi' mian Kristen i Makedonia ka' Akhaya.

⁸ Kalana tinampu'unan lengkat mae hi komiu, na lele mongkona Tumpu tinogilelemo toka-toka i Makedonia ka' i Akhaya. Ka' misa' ola aitu; panyo lele mongkona mosia na komiu palesaya hi Tumpu Allah tinokamo iyaya mae, sahingga kami madi'mo palalu montaloakon apa-apaa.

⁹ Iwi-iwi' na mian aijo' notatae mongkona mosia na komiu nontalima kami, tempo'nyo kami u'utu mae tinokamo hi komiu. Aha notatae mongkona mosia na komiu nompala'imo to pilo-pilogot ka' tinokamo samata-mata hi Tumpu anu tumuu' da palesaya hi Ia.

¹⁰ Aha notatae mule' mongkona mosia na komiu montaha'imani katokaan nu Anak nu Tumpu lengkat mae i suluga', aijo'mo i Yesus, anu sinilakamo po'ule'mo pinotumuu' nu Tumpu. I Yesusmo ai-aijo' na anu momposalamat kita i tambuha' nu Tumpu anu saidi' mae toka.