1 TAWARIKH 9 - KITAB NU TUMPU ALLA LELE MA'IMAI'

To mia-mian anu ninsusule'mo mae lengkat i lipu' pinompojoongan

¹ Iwi-iwi' na mian nu Israel tinulis toto sa'angu' na auwan. Daputan aijo' tinulis i kitab nu to Tomu-tomundo' Israel. Salaku bau pinohukum kalana aha nombaumo dosa', aha mian da'isan nu Yehuda binoamo i lipu' pinompojoongan.

² Aha anu momona ninsusule' mae po'ule' namba i posi tano' nu aha i kota' haha aijo', to tu'a-tu'anyo, to ima-imam, aha mian nu Lewi ka' anu mokalaja i Laigan nu Tumpu.

³ Aha sambagian na tulunan nu bansa Yehuda, Benyamin, Efraim ka' Manasye ninsusule'mo mae ka' jinojoongmo i Yerusalem.

^4-6 Aha 690 na auwan nu tulunan nu bansa Yehuda anu jinojoong i Yerusalem, tiba lee' mae nu to ana-anak i Yehuda, sanggo nu aha, i Peres, i Syela tiba i Zerah. Lee' i Peres kinapalaan i Utai, lundu-lunduannyo nu lee' mae i Utai o tundun sule-sule' aijo'mo, i Utai, i Amihud, i Omri, i Imri tiba i Bani. Lee' i Zerah kinapalaan i Yeuel.

^7-9 To mia-mian tulunan nu bansa Benyamin anu jinojoong i Yerusalem aha 956 na auwan. To tu'a-tu'anyo nu auwan nu aha aijo'mo: i Salu anak i Mesulam, makumpu i Hodawya lokon i Hase nu a i Yibnia anak i Yeroham i Ela anak i Uzi, makumpu i Mikhri i Mesulan anak i Sefaca, makumpu i Rehuel, lokon i Yibnia.

To ima-imam anu jojoong i Yerusalem

^10-12 To ima-imam haha aiya anu jojoong i Yerusalem: i Yedaya, i Yoyarib tiba i Yakhin i Azarya anak i Hilkia, mompolee' mae nu aha aijo'mo i Mesulam, i Zadok, i Merayot tiba i Ahitub. (I Azaya te kapala nu anu mokalaja i Laigan nu Tumpu.) I Adaya anak i Yeroham; mompolee' mae nu aha aijo'mo i Pasyhur tiba i Malkia. I Masai anak i Adiel: mompolee' mae nu aha aijo'mo i Yahzera, i Masulam, i Mesilemit, i Imer.

¹³ To ima-imam anu salaku tu'anyo nu auwan iwi-iwi' aha 1.760 na mian. Aha pande hondo na mombau apa-apaa anu okalaja i Laigan nu Tumpu.

Aha to mia-mian nu Lewi anu jojoongmo i Yerusalem

^14-16 To mia-mian nu Lewi haha aiya anu jojoong i Yerusalem: I Semaya anak i Hasub; mompolee'nyo mae nu aha aijo'mo i Azrikam tiba i Hasabya lengkat mae hi aha sa'anakan i Merari i Bakbakar, i Heres tiba i Galal i Matanya anak i Mikha; mompolee'nyo mae nu aha aijo'mo i Zikri tiba i Asaf i Obaja anak i Semaya; mompolee'nyo mae nu aha aijo'mo i Galal tiba i Yedutun i Berekhya anak i Asa, makumpu i Elkana, ia jojoong i da'erah nu kota' Netofa.

To mia-mian anu monjagai Laigan nu Tumpu anu jojoong i Yerusalem

¹⁷ To mia-mian anu monjagai Laigan nu Tumpu jojoong i Yerusalem tibamo auwan nu aha aijo'mo: i Akub, i Talmon, i Ahiman, tiba i Salum anu mongkapalai ponjaga nu Laigan nu Tumpu.

¹⁸ Sampe sinaa aiya to mia-mian anu lengkat hi aha sa'anakan binee'an kalaja monjagai Sabatan Daka' nu Tomundo' sasu kabete'an. Naipuan mae mian haha aijo' aha sa'anakan binee'an kalaja monjagai sabatan daka' anu mokiijo' i sasu kemah nu aha mian Lewi.

¹⁹ Anu binee'an kalaja monjagai sabatan pinsoopan mokiijo' i Kemah nu Tumpu aijo'mo i Salum tiba to mia-mian anu sa'anakan tiba ia, aijo'mo sa'anakan i Korah. (I Salum anak i Kore makumpu i Ebyasaf). Naipuan mae mompolee' nu aha suele nokalaja susumo aijo' tempo'nyo aha nokalaja i Kemah nu Tumpu.

²⁰ I Pinehas anak i Eleazar – o'amalakon da Tumpu monjagai ia! – toho'mo nongkapalai aha.

²¹ I Zakharia anak i Meselemya suele anu mokalaja monjagai sabatan daka' i Kemah nu Tumpu.

²² Iwi-iwi' na mian anu pinile'anmo monjagai sabatan daka' iwi-iwi' aha 212 na mian. Aha dinaputanakon pinosi po'iwi' na nontulis i posi-posi kampung kajojoongan nu aha toto samian. Mompolee' nu aha suele binee'an kalaja i Tomundo' Daud susumo aijo' tiba i Nabi Samuel.

²³ Salatanmo pe'e aitu aha tiba lee' nu aha sabole-bolemo tinimbali penjaga sabatan daka' Laigan nu Tumpu.

²⁴ Opat na sabatan: sa'angu' sasu utara, sa'angu' sasu Selatan, sa'angu' sasu kabete'an ka' sa'angu' sasu kinsoban. Toto sa'angu' na sabatan haha aijo' samian na aha mian nu Lewi anu mongkapalai aha anu monjagai aijo'.

²⁵ To utu-utus nu aha anu jojoong i kampung nuaha toka mae mobolo-bolos – toto saduminggu na kopinnyo.

²⁶ Panyo kapala ponjaga anu aha opat aijo' na tataap ahi'. Aha na mompangakui montoa salipi' i Laigan nu Tumpu ka' montoa pakakas anu opo'una' i kiijo'.

²⁷ Aha jojoong koko Laigan nu Tumpu, kalana tionyo ahi' nu jagai nu aha na laigan aijo' ka' montuhea'akon sabatan daka' haha aijo' de mopatasmo salatan subu-subumo.

Mian nu Lewi sangga'at

²⁸ Sambagian na mian nu Lewi sangga'at mompangakui mongulus pakakas a nu opake de monsombahmo Tumpu. Ahamo na mombilang de o'alamo kalana opakemo ka' po'ule mo opogompiling.

²⁹ Sambahagian mule' mompangakui mongulus balang sangga'at anu opake monsombah Tumpu, ka' labu, anggur, lanya' nu zaitun, kamangian, ka' lampa-lampa.

³⁰ Panyo anu mompangakui monggalo' lampa haha aijo', to ima-imam.

³¹ Anu mompangakui mombau anu osombahkon opopotunu samian na aha Lewi sanggonyo i Matica, anak tumpe i Salum aha mae sa'anakan i Korah.

³² To mia-mian aha mae sa'anakan i Kehat mompangakui roti na oposadia bau pontalakani Tumpu de sinaamo nu Sabat.

³³ Sambagian na mian nu aha Lewi sangga'at mongala bahagian manyanyi i Laigan nu Tumpu. To tu'a-tu'anyo nu auwan nuaha jojoong i Laigan daka' anu pa' sangkuka na konjoo'nyo kiijo' i Laigan nu Tumpu. Aha madi'mo binee'an kalaja sangga'at, kalana aha binee'anmo kalaja sinaa ka' malom.

³⁴ Mian haha aiya anu sinanggomo aijo', aijo'mo na to tu'a-tu'anyo nu auwan nu aha Lewi anu tinundun i lundu-lunduannyo mae nu lee' nu aha. Ahamo aijo' na to pola-polaya' anu jojoong i Yerusalem.

Mompolee' i Tomundo' Saul tiba lee'nyo mae

³⁵ I Yeiel nombaumo kota' Gibeon, lantas jinojoongmo i kota' aijo'. Sanggo nu bengkele'nyo i Maakha,

³⁶ ka' anaknyo anu tumpe mo'ane sanggonyo i Abdon; ka' sangga'at mule' sanggo nu aha, i Zur, i Kish, i Baal, i Ner, i Nadab,

³⁷ i Gedor, i Ahyo, i Zakharia tiba i Miklot,

³⁸ tuuma i Simea. Lee' nu aha jojoong i Yerusalem tiba auwan sangga'at anu sa'a-sa'angu'mo na mompolee' mae nu aha.

³⁹ Tuuma i Tomundo' Saul sanggonyo i Kish ka' kai'nyo sanggonyo i Ner. I Saul kino anak mo'ane aha opat i Yonatan, i Malkisua, i Abinadab, tiba i Esybaal,

⁴⁰ i Yonatan kino anak mo'ane sanggonyo i Meribaal, tuuma i Mikha.

⁴¹ I Mikha kino anak mo'ane aha opat; i Piton, i Melekh, i Tahrea tiba i Ahas.

⁴² Anak i Ahas sanggonyo i Yoada anu kino anak mo'ane aha totolu': i Alemet, i Asmawet tiba i Zimri. Lundu-lunduannyo mae nu lee' i Zimri, aijo'mo i Moza,

⁴³ i Bina, ka' i Rafa, i Elasa tiba Azel.

⁴⁴ I Azel kino anak mo'ane aha anom: i Azrikam, i Bokhru, i Ismael, i Searya, i Obaja tiba i Hanan.