1 TAWARIKH 6 - KITAB NU TUMPU ALLA LELE MA'IMAI'

Lundu-lunduannyo mae nu aha Lewi anu tinimbali Imam Daka'

¹ I Lewi kino anak mo'ane aha totolu': i Gerson, i Kehat, tiba i Merari.

² I Kehat kino anak mo'ane aha opat: i Amran, i Yizhar, i Hebron tiba i Uziel.

³ I Amran kino anak mo'ane ua'aha; aijo'mo: i Harun, tiba i Musa, ka' boune samian aijo'mo i Miryam. I Harun kino anak mo'ane aha opat: i Nadab, i Abihu, i Eleazar tiba Itamar.

⁴ Tatu-tatusannyo nu tundulan i Eleazar sumo uuka: i Pinehas, i Abisua,

⁵ i Buki, i Uzi,

⁶ i Zerahya, i Merayot,

⁷ i Amarya, i Ahitub,

⁸ i Zadok, i Ahimaas,

⁹ i Azarya, i Yohanan,

¹⁰ i Azarya (ia mokalaja i Laigan nu Tumpu anu binau i Tomundo' Salomo i Yerusalem),

¹¹ i Amarya, i Ahitub,

¹² i Zadok, i Salum,

¹³ i Hilkia, i Azarya,

¹⁴ i Zeraya, i Yozadak.

¹⁵ I Yozadakmo aiya na anu binoa hingga-hinggat tiba mian nu Yehuda tiba mian sangga'at anu jojoong i Yerusalem tempo'nyo Tumpu nomboamo aha i lipu' sangga'at ka' pinojoongmo kiijo' mae salatan i Nebukadnezarmo na tinimbali tomundo'.

Lee' sangga'at i Lewi

¹⁶ I Lewi kino anak mo'ane aha totolu' aijo'mo: i Gerson, i Kehat tiba i Merari.

¹⁷ Aha toto samian kino anak. I Libna tiba i Simei aijo'mo na to ana-anak i Gerson;

¹⁸ i Amran, i Yizhar, i Hebron tiba i Uziel, aijo'mo na to ana-anak i Kehat.

¹⁹ I Mahli tiba i Musi, aijo'mo na to ana-anak i Merari.

²⁰ Lundu-lunduannyo mae nu lee' i Gerson aijo'mo: i Libna, i Yahat, i Zima,

²¹ i Yoah, i Ido, i Zerah, i Yeatri.

²² Lundu-lunduannyo mae nu lee' i Kehat aijo'mo: i Aminadab, i Korah, i Asir,

²³ i Elkana, i Ebyasaf, i Asir,

²⁴ i Tahat, i Uriel, i Uzia, i Saul.

²⁵ I Elkana kino anak mo'ane ua'aha: i Amazia tiba i Ahimot.

²⁶ Lundu-lunduannyo mae nu lee' i Ahimot aijo'mo: i Elkana, i Zofai, i Nahat,

²⁷ i Eliab, i Yeroham, i Elkana.

²⁸ I Samuel kino anak mo'ane ua'aha: i Yo'el na tumpenyo ka' i Abia na tampalui'nyo.

²⁹ Lundu-lunduannyo mae nu lee' i Merari aijo'mo: i Mahli, i Libni, i Simei, i Uza,

³⁰ i Simea, i Hagai, i Asaya.

Anu mahaik musik i Laigan nu Tumpu

³¹ Salatanmo pe'e Peti' Palajanjian i lalinmo i tampat ponsomban Tumpu i Yerusalem, i Tomundo' Daud nompile'imo to mia-mian anu mompangakui lewa' manyanyi bau pompuji-puji' Tumpu i Laigan nu Tumpu.

³² Aha manyanyi mobolo-bolos i Kemah nu Tumpu tempo'nyo ma'isa pe'e i Tomundo' Salomo nombau Laigan nu Tumpu.

³³ Tatu-tatusannyo nu tundulan nu mian haha aijo' anu lewa' manyanyi sumo uuka: Anu lengkat mae hi aha sa'anakan i Kehat: i Heman anak i Yo'el, Ia kapala nu anu manyanyi gombuannyo nu anu momona. Tatu-tatusannyo nu tundulan nu aha, o tundun sule-sule' sampe tinoka hi Yakub, aijo'mo: i Heman, i Yo'el, i Samuel,

³⁴ i Elkana, i Yeroham, i Eliel, i Toah,

³⁵ i Zuf, i Elkana, i Mahat, i Amasai,

³⁶ i Elkana, i Yo'el, i Azarya, i Zefanya,

³⁷ i Tahat, i Asir, i Ebyasaf, i Korah,

³⁸ i Yizhar, i Kehat, i Lewi, i Yakub.

³⁹ I Asaf kapala u anu manyanyi gombuannyo nu anu ko ohua'nyo. Tatu-tatusannyo nu tundulan nu aha, o tundun sule-sule' sampe tinoka hi Lewi aijo'mo: i Asaf, i Berekya, i Simea,

⁴⁰ i Mikhael, i Baaseya, i Malkia,

⁴¹ i Etai, i Zerah, i Adaya,

⁴² i Etan, i Zima, i Simei,

⁴³ i Yahat, i Gerson, i Lewi.

⁴⁴ I Etan kapala nu anu manyanyi gombuannyo nu anu kototolu'nyo; ia lengkat mae hi aha sa'anakan i Merari. Tatu-tatusannyo nu tundulan nu aha o tundun sule-sule' sampe ti noka hi Lewi, aijo'mo: i Etan, i Kisi, i Abdi, i Malukh,

⁴⁵ i Hasabya, i Amazia, i Hilkia,

⁴⁶ i Amzi, i Bani, i Semer,

⁴⁷ i Mahli, i Musi, i Merari, i Lewi.

⁴⁸ Kalaja sangga'at i laigan ponsomban Tumpu binee'mo hi sangalu nu aha mian nu Lewi suele.

Lee' i Harun

⁴⁹ I Harun lee'nyo kalajanyo nu aha mompapui kamangian, monsombahkon koloban anu opotunu i mezbah, mombau apa-apaa na anu o kalaja i Salipi' anu Susi' hondo, ka' monsombakon koloban bau pongalini dosa' nu aha mian nu Israel. Iwi-iwi' aijo' nubau nu aha susumo anu pinotiju'mo i Musa posaihon nu Tumpu aijo'.

⁵⁰ Aiya na lundu-lunduannyo nu aha lee' i Harun: i Eleazar, i Pinehes, i Abisua,

⁵¹ i Buki, i Uzi, i Zerahya,

⁵² i Merayot, i Amarya, i Ahitub,

⁵³ i Zadok, i Ahimaas.

Kajojoongan nu aha to mia-mian nu Lewi

⁵⁴ Aiya na da'erah kinajojoongan anu binee' hi aha sa'anakan i Kehat, lee' mae i Harun. Aha na nohumpak momona pambahagian tano' anu tinantukanmo hi aha mian nu Lewi.

⁵⁵ Tano' nu aha nonsangkupmo kota' Hebron i da'erah Yehuda, ka' padang hemput anu kiijo' i da'erahnyo.

⁵⁶ Panyo iwi-iwi' na ale' ka' to kampu-kampung anu i da'erah nu kota' aijo' binee'mo hi Kaleb anak i Yefune.

^57-59 Lee' i Harun nohumpak Hebron kota' bau popalaian da boli o hukum, i Yatir, ka' kampung mule' haha aiya tibamo padang hemputnyo: kampung Libna, Estemoa, Hilen, Debir, Asan, Bet-Semes.

⁶⁰ I Da'erah tulunan mae nu aha bansa Benyamin, aha nohumpak kampung haha aiya tibamo hemputnyo: Geba, Alemet, ka' Analot. Iwi-iwi'mo 13 na kampung na bau kajojoongan nu aha sa'anakan.

⁶¹ Sampulu' na kampung nu aha tulunan nu bansa Manasye anu i sasu kinsoban Kaunyo nu Yordan binee'mo hi aha to au-auwan sa'anakan mae i Kehat anu ma'isa nohumpak tano'.

⁶² To au-auwan hi aha sa'anakan i Gerson nohumpak 13 na kampung anu i da'erah nu aha tulunan nu bansa Isakhar, i Asyer i Naftali ka' i Manasye anu kiijo' mae i Basan sasu kabete'an Kaunyo nu Yordan.

⁶³ Ka' mule' suele ingondeakon, na to au-auwan nu aha sa'anakan i Merari nohumpak 12 na kampung i da'erah nu aha tulunan nu bansa Ruben, Gad tiba Zebulon.

⁶⁴ Sumo aijo' na aha bansa Israel nombee'i kampung bau bagi nu aha tulunan nu bansa Lewi, to kampu-kampung tibamo padang hemputnyo da bau kajojoongan nu aha.

⁶⁵ To kampu-kampung, anu i da'erah tulunan nu bansa Yehuda, Simeon ka' i Benyamin anu pinaha sanggomo aijo' suele ingundiakon nanombagi.

⁶⁶ I Da'erah tulunan nu bansa Efraim, ka' sambagian na auwan nu aha sa'anakan i Kehat nohumpak kampung haha aijo' ka' mule' padang hemput anu kiijo' i da'erahnyo aijo'mo:

⁶⁷ Sikhem, kota' popalaian da boli mohumpak hukuman anu i bungkutnyo nu da'erah aijo' Gezer,

⁶⁸ Yokmeam, Bet-Horon,

^69-70 Ayalon tiba Gad-Rimon. Anu i da'erah tulunan nu bansa Manasye sasu kinsoban Kaunyo Yordan aha nohumpak kampung Aner tiba Bileam tiba padang hemput kiijo' i da'erahnyo.

⁷¹ To au-auwan hi aha sa'anakan i Gerson nohumpak kampung tiba padang hemput anu kiijo' i da'erahnyo sumo uuka: I da'erah tulunan nu bansa Manasye, sasu kabete'an Kaunyo nu Yordan: Golan anu kiijo' i Basan tiba Asytarot.

⁷² I da'erah tulunan nu bansa Isakhar, Kedes, Deberat,

⁷³ Ramot tiba Anem.

⁷⁴ I da'erah tulunan nu bansa Asyer: Masal, Abdon,

⁷⁵ Hukok tiba Rehob.

⁷⁶ I da'erah tulunan nu bansa Naftali: Kedes anu kiijo' i Galilea, Hamon tiba Kiryataim.

⁷⁷ Lee' i Merari anu ma'isa nohumpak tano', nohumpak kampung tiba padang i da'erahnyo sumo uuka: I da'erah tulunan nu bansa Zebulon: Rimono tiba Tabor.

⁷⁸ I Da'erah tulunan nu bansa Ruben, sasu kabete'an Kaunyo nu Yordan koko Yerikho; Bezer, anu aita' i bungkutnyo, Yahas,

⁷⁹ Kedesmot, tiba Mefa'at.

⁸⁰ I da'erah tulunan nu bansa Gad: Ramot anu kiijo' i Gilead, Mahanim,

⁸¹ Hesybon, tiba Yaezer.