1 TAWARIKH 29 - KITAB NU TUMPU ALLA LELE MA'IMAI'

Anu binee' nu mian bau Laigan nu Tumpu

¹ Lantas notataemo na i Tomundo' Daud hi mian iwi-iwi' anu sinihuk i kiijo', “Pa' aha sangkuka na to ana-anaku anu to momo'ane, i Salomo na anu pinile'anmo nu Tumpu Allah. Panyo ia daagi' anak ka' ma'isa ko anu nu pisumbu-sumbu', padahan kalajaaiyo talalo hondo daka'. Ka' mule' anu obau aijo' misa' laigan nu tomundo' bau kajojoongan nu manusia, panyo laigan anu obee' hi Tumpu Allah.

² Pakakas anu obau laigan aijo' tibamo pakakas bau pongisinyo pinotoukamo totu-totu'u nu kamampuanku iwi-iwi'. Pinotoukangkumo na mosoni', salaka, tambaga, besak, kau', to batu-batu anu mahan na olinyo ka' to batu-batu mainan, to batu-batu anu monga-ngahan na buhitnyo anu bau pombunga-bungai, ka' manjoo' hondo na batu anu biasa opapu bau tiilon.

³ Pakalaus kalana ku ka'ima'i na Laigan nu Tumpu Allah-ngku aijo' sahingga binee'kumo na salaka, ka' mosoni' anu posi halata' ku:

^4-5 mosoni' anu ma'ima' hondo molabi 100 na ton, ka' salaka anu madi' ko galo'nyo kila-kila 240 na ton bau polapisi pimpi' nu Laigan nu Tumpu, ka' to bala-balang anu tionyo ahi' nu bau nu to tuka-tukang anu toto pande-pande. Jadi uuka aiya daagi' ihe na ko kinyonyoanyo sanang mombee' anu osombahkon hi Tumpu?”

⁶ Sahingga to tu'a-tu'anyo nu aha mae sa'anakan, to tu'a-tu'anyo nu tulunan mae nu bansa, to sulu-suludadu anu matangkas na pangkatnyo, ka' anu montoa ka' monjagai halata' i tomundo' nompoto'imo tukoonyo nu aha aha suele mombee'i.

⁷ Lantas aiyamo na anu binee' nu aha da obau Laigan nu Tumpu: mosoni' molabi 170 na ton, salaka molabi 340 na ton, tambaga mongohanimo 620 na ton, ka' besak molabi 3.400 na ton.

⁸ To mia-mian anu daagi' ko to batu-batu mainan nombee'i hi Yehiel da oposoop i Kas nu Laigan nu Tumpu. (I Yehiel aijo' mian nu Lewi anu asannyo mae aha sa'anakan i Gerson.)

⁹ Sanang na kinyonyoa nu mian da'isan hi Tumpu ka' aha i lame'mo kalana nanjoo'mo na anu binee'mo nu aha hi Tumpu. I Tomundo' Daud suele i lame'mo hondo.

I Daud nompuji'mo Tumpu

¹⁰ I ahop nu mian da'isan, i Tomundo' Daud nompuji'mo Tumpu. Ia notatae “O Tumpu Allah anu nu sombah i Yakub mompolee' mami, o puji' na belento sampe toka sidu-sidutu'!

¹¹ Belento totu-totu'u talasanggo ka' daka' na kuasa nu Belento. Belento opopodaka' ka' talalo hondo o adati, anu mongkuasai iwi-iwi'.

¹² Iwi-iwi' na kakaya'an ka' kabilahian nolengkat mae hi belento; iwi-iwi' nu kuasai nu Belento nu kahosonan ka' kakuasa'an nu Belento anu madi'mo ko anu molingkudui. Belento ko kuasa mompotimbali mian maumo pa' ihe timbali mian anu ko angga'nyo ka' baani.

¹³ Uuka aiya, o Tumpu Allah mami, kami montalima kase hi belento, ka' o puji' mami na sanggo nu Belento anu o adati.

¹⁴ Aku ka' mianku aiya totu-totu'u madi' moko ala mombee'i apa-apaa hi belento, kalana iwi-iwi' na anu binee' nu Belento ka' apaa na anu obee' mami aiya, belento ahi' suele na tumpunyo.

¹⁵ Osumbu' nu Belento o Tumpu, saba' susumo to aha-aha mompolee' mami, kami suele monjalani kantumuu'an aiya salaku mian anu tinokaje mae kabai mian anu lengkat mae i salipu'an. Kantumuu'an mami ola sumo loolung motulu, ka' kami madi' moko ala monggoliliakon da madi' silaka.

¹⁶ O Tumpu Allah mami, iwi-iwi' na balang anu mahan na olinyo aiya i limu'mo mami aiya, da obau sa'angu' na laigan bau kajojoongan nu Belento anu susi'. Panyo iwi-iwi' aiya i humpak mami hi belento ka' mule' belento ahi' na tumpunyo.

¹⁷ Ku sumbu' toto samian o uji' nu Belento na kinyonyoanyo ka' oka'ima'i nu Belento na kinyonyoa nu mian anu lomas. Tiba kinyonyoa sanang ka' sahondo-hondonyo ku sombahkonmo na iwi-iwi' aiya hi belento. Tinoangkumo mosia na mian anu pinalesayamo hi belento anu sinilimu'mo i aiya nomboa mae anu nu sombahkon nu aha hi belento, kinyonyoa nu aha sanang hondo.

¹⁸ O Tumpu Allah anu nu sombah i Abraham, i Ishak tiba i Yakub mompolee' mami, de timbali da belento montoa mae kami da mian anu pinalesayamo hi belento sabole-bole mongka'ima'i belento susumo tempo' uuka aiya ka' tulungiakon mae da aha saja' tulu-tulutan hi belento.

¹⁹ Bee'iakon na i Salomo, anaku momo'ane da mongka'ima'i totu-totu'u montuluti iwi-iwi' napalentah nu Belento ka' mombau laigan ponsomban belento Tumpu, kalana posadiaonnyo pinodaagi'kumo.”

²⁰ Noko lapas na binalado'a sumo aijo', pinoto'imo i Daud hi mian da'isan anu sinihukmo, “O puji' na Tumpu Allah nu belemiu!” Sahingga iwi-iwi' na mian lewa'mo nompuji' Tumpu, Tumpu Allah anu nu sombah nu mompolee' nu aha. Lantas aha tinolodadupumo nongadati Tumpu tiba i tomundo'.

²¹ Dodododopnyo aha nongkolotmo binatang anu osombahkon salaku koloban hi Tumpu, lantas binagi-bagiakonmo hi mian da'isan iwi-iwi', Ka' sangga'at mule' 1.000 na sapi' lakinyo, 1.000 na domba lakinyo ka' 1.000 na domba anu daagi' bata'nyo anu kinolot ka' pinotunu sa'a-sa'angu' i mezbah. Aha suele nonsombahkonmo anggur anu memang tionyo ahi' obee' da okolobanakon susumo anu haha aijo'.

²² Sinaa aitu aha lewa'mo nongkaan ka' binala'inum ka' binalame-lame' i ahop nu Tumpu. Lantas kinopinduannyomo na aha nombebakonmo i Salomo hi mian tukoonyo nu aha i Salomo tinimbalimo tomundo'. I Uno nu sanggo nu Tumpu pinotantumo nu aha na ia salaku tomundo' nu aha ka' i Zadok na i hangkatmo binau imam.

²³ Sahingga salaku binau pombolosi i Daud tuumanyo, i Salomo i hangkatmo nonsuhangi kasuhangan nu tomundo' anu pinoto'imo nu Tumpu. Ia tomundo' anu saja' mingkaliangan na tanga'annyo ka' o'angga'i nu aha bansa Israel iwi-iwi'.

²⁴ Iwi-iwi' na mian anu ko pangkatnyo salaku pamalentah ka' suludadu toka-toka hi to ana-anak i Daud anu toto momo'ane sangga'at suele mongakui kakuasa'an i Salomo salaku tomundo'.

²⁵ Binaumo nu Tumpu na mian da'isan da mompuji' i Tomundo' Salomo ka' mompotimbalimo ia tomundo' anu talalo talasanggo molingkudui to tomu-tomundo' maumo pa' iya mae anu toho'mo nompalentah Israel.

Pinongkodo'i sisikon tempo'nyo i Daud nompalentah

²⁶ I Daud anak i Isai nompalentah songko-songko na Israel,

²⁷ pinatompulu' na taun na kinopinnyo. I Hebron, ia nompalentah 7 taun na kinopinnyo ka' i Yerusalem 33 taun na kinopinnyo.

²⁸ Ia kaya ka' talalo hondo o'adati ka' i langkai'mo hondo ia sinilakaje. I Salomo anaknyo momo'ane na i hangkat binau tomundo' nombolosakon ia.

²⁹ Sisikon nu kantumuu'an i Tomundo' Daud, lengkat pe'e momonanyo sampe ia madi'mo nompalentah tinulismo i kitab Nabi Samuel, kitab Nabi Natan ka' kitab Nabi Gad.

³⁰ I uno nu kitab aijo' tinulismo na ia nompalentah, kakuasa'annyo ka' iwi-iwi' na anu jinadimo i butongnyo, ka' hi Israel ka' hi iwi-iwi' na kalaja'an anu mompaha ohani Israel. 86 85