1 TAWARIKH 28 - KITAB NU TUMPU ALLA LELE MA'IMAI'

Pokinde' i Daud da mombau Laigan nu Tumpu

¹ I Tomundo' Daud nompalentahmo da iwi-iwi' na to pola-polaya' nu aha Israel sihuk i Yerusalem. Jadi to kapa-kapala nu toto sa'angu' mae na tulunan nu bansa anu montoongi pangkat kapalentahan, to kapa-kapala nu aha sa'anakan mae, to mia-mian anu montoa ka' mompalesa halata' ka' potuu'on i tomundo' ka' montoa to ana-anaknyo anu toto momo'ane – osaingkodo-kodo'imo to mia-mian daka' anu ko pangkatnyo i laigan nu tomundo', to sulu-suludadu anu toto tangka-tangkas na pangkatnyo, ka' to mia-mian anu o'angga'i, iwi-iwi' sinihukmo i Yerusalem.

² I Daud tinuminjomo i ahop nu aha ka' notatae, To utu-utusku sangko bansangku, potombihing mae! Pininmo na aku kino kahanda' mombau sa'angu' na laigan anu mahoson hondo da bau pompo'una'an Peti' Palajanjian nu Tumpu, da bau panintinjoan nu Tumpu Allah-nto. Aku nompotoukamo anu obau sa'angu' na laigan tampat ponsomban Ia.

³ Panyo Tumpu nontewa'mo aku mombau laigan aijo', kalana aku samian na suludadu anu saja'mo mompojuju baso'.

⁴ Tumpu Allah anu nu sombah nu aha Israel nompile'imo aku ka' lee'ku saidi' mae na mompalentah Israel sampe toka sidu-sidutu'. Anu pinosadia bau polaya', Ia nompile'imo tulunan nu bansa Yehuda ka' lengkat hi tulunan aijo' ia nompile'imo auwan nu tuumangku. Ka' iwi-iwi' na mian hi auwan nu tuumangku Ia sinanangmo na nompile' aku ka' nohangkatmo aku binau tomundo' nu aha Israel iwi-iwi'.

⁵ Ia nombee'imo mae aku anak manjoo' ka' anak haha aijo' iwi-iwi' pinile'an-Nyomo na i Salomo nompalentah Israel kalaja'an nu Tumpu.

⁶ Tumpu nompoto'imo hi belengku sumo uuka: “I Salomo anak nu beleyum na mombau laigan kajojoongan-Ku. Ia pinile'an-Kumo baumo anaku, ka' Aku baumo tuumanyo.

⁷ De ia totu-totu'u saja' montuluti atulan-Ku iwi-iwi' ka' palentah-ngKu iwi-iwi' susumo anu binaunyomo uuka aiya, Ku pohosonmo na kalaja'annyo sampe toka sidu-sidutu'.”

⁸ Lantas notatae mule' na i Daud, “Jadi uuka aiya, belemiu to mia-mianku, i ahop nu Tumpu Allah-nto ka' i ahop nu kita iwi-iwi' Israel mian anu pinalesayamo hi Tumpu Allah-nto. Tiba jalan anu sumo aijo' lipu' anu ma'ima' aiya tataap sabole-bole belemiu na tumpunyo ka' toka-toka i lee' nu belemiu na montumpui sampe toka sidu-sidutu'.”

⁹ Lantas i Daud notataemo hi Salomo, “O anaku, tionyo ahi' Tumpu Allah anu nu sombah nu tuuma nu beleyum na nu akui salaku Tumpu Allah nu beleyum. Beleyum tionyo ahi' montuluti hondo-hondo lengkat i uno nu kinyonyoa nu beleyum totu-totu'u. Kalana nu sumbu'mo nu Tumpu na pikilan ka' tanga'an nu kinyonyoanto. De beleyum molio Ia, nukabot na Ia, panyo de beleyum mompala'i Ia, ia madi'mo mongala beleyum sampe toka sidu-sidutu'.

¹⁰ Potutugakon ima-ima' saba' Tumpu nompile'imo beleyum da mombau laigan anu samata-mata opake ponsomban Ia. Jadi uuka aiya baumo na aijo' ka' okinyonyoai ahi' totu-totu'u.”

¹¹ Lapas aijo' binee'mo i Daud hi Salomo apa-apaa na anu tinanga'anmo obau, aijo'mo Laigan nu Tumpu, to guda-gudangnyo, iwi-iwi' na salipi'nyo, ka' Salipi'nyo anu Susi' hondo, tampat pongampunian dosa'.

¹² I Daud mule' nombee'i iwi-iwi' na tanga'an anu pinile'annyomo anu bau popasannyo ka' mule' salipi'nyo titikup, ka' mule' to guda-gudang pompo'una'an talakanan anu opake i Laigan nu Tumpu aijo' ka' mule' to guda-gudang pompo'una'an apa-apaa na anu nu bee' nu mian hi Tumpu.

¹³ Ka' mule' binee'nyomo na tanga'an mombagi-bagi toto sanggombu na to ima-imam ka' mian nu Lewi, mongkona kalaja anu tionyo ahi' nu bau nu aha, aijo'mo kalaja anu nu bau nu aha i Laigan nu Tumpu ka' mongkalesang iwi-iwi' na pakakas anu opake monsombah Tumpu.

¹⁴ Ia nombee'imo sonto' mosia na mombau mosoni' ka' salaka anu bau pakakas,

¹⁵ toto sa'angu' na sulu' ka' tengke nu sulu',

¹⁶ anu obau meja' salaka, ka' obau meja' mosoni' pompotimpasan roti anu osombahkon hi Tumpu Allah.

¹⁷ Ka' mule' nombee'i sonto' mosia na konjoo'nyo na mosoni' anu madi' ko galo'nyo, anu opake bau sindu', sobang, mangko' ka' boton to ise-ise', ka' sangkuka na konjoo'nyo na mosoni' anu madi' ko galo'nyo anu bau mezbah tampat pompap'uan kamangian,

¹⁸ ka' anu obau kareta pomposake'an to pato-patong nu malaekat, tiba polipiknyo, nanimboka aita' i Peti' Palajanjian nu Tumpu.

¹⁹ Lantas pinoto'imo i tomundo' Daud, “Iwi-iwi' aijo' i unomo nu tanga'an anu tinulismo susumo anu pinoto'imo nu Tumpu na sonto'nyo hi belengku da obau.”

²⁰ Lapas aijo' i Tomundo' Daud notatae mule' hi Salomo anaknyo momo'ane, “Beleyum tionyo ahi' totu-totu'u na kinyonyoa ka' baani. Tampuunimo na kalaja ka' boli bata-bata maumo pa'apaa na o ahopi. Tumpu Allah anu ku ku sombah na montulungi beleyum. Ia madi' mompojohok beleyum. Ia saja' montoa kapalaluan nu beleyum sahingga iwi-iwi' na kalaja aijo' timbalimo, ka' madi'mo ko anu obau.

²¹ Kalaja anu mongulus anu monsombah i Laigan nu Tumpu binagi-bagimo hi aha to ima-imam ka' hi aha mian nu Lewi. To mia-mian anu pande na mokalaja anu nu sumbu' totu-totu'u na mombau, toto samian sanang na kinyonyoanyo montulungi beleyum, ka' to pola-polaya' tiba mian da'isan montuluti palentah nu beleyum.”