1 TAWARIKH 23 - KITAB NU TUMPU ALLA LELE MA'IMAI'

¹ Salatan i Tomundo' Daud i langkai'mo hondo ia nohangkatmo i Salomo binaumo tomundo' nu Israel.

Kalaja nu aha mian Lewi

² I Tomundo' Daud nomposihukmo iwi-iwi' na to pola-polaya' nu Israel, to ima-imam ka' mian nu Lewi,

³ lantas binilangnyomo na to momo'ane tulunan nu bansa Lewi anu ko umunnyomo tolumpulu'mo na taun mokiita'. Iwi-iwi' aha 38.000 na mian.

⁴ Lantas aha 24.000 na mian anu aijo' hi aha, binee'anmo kalaja, aijo'mo mongulus kalaja i Laigan nu Tumpu, 600 na mian mongulus anu palalu otulis ka' mongulus palakala,

⁵ 4.000 na mian binee'an kalaja monjaga, ka' 4.000 na mian mule' mompuji' Tumpu mompake pakakas musik anu pinotoukamo.

⁶ I Daud nombagi mian nu Lewi haha aijo' totolu' na gombuannyo, ingala hi aha sa'anakan mae aijo'mo: sa'anakan mae i Gerson, i Kehat tiba i Merari.

⁷ I Gerson kino anak ua'aha na mo'ane: i Ladan tiba i Simei.

⁸ To ana-anak i Ladan aha totolu': i Yehiel, i Zetam tiba Yo'el.

⁹ Aha aijo'mo na kapala nu sa'anakan lee' mae i Ladan. (I Selomit, i Haziel tiba i Haran, aijo'mo na to ana-anak mo'ane i Simei).

^10-11 Aha opat na to ana-anak mo'ane i Simei, umun nu aha tatusannyo aijo'mo: i Yahat, i Ziza, i Yeus tiba i Beria. Lee' i Yeus tiba i Beria madi' manjoo' jadi aha sumo-sumomo ola o anggap sa'anakan.

¹² I Kehat kino anak mo'ane aha opat: i Amran, i Yizhar, i Hebron, tiba i Uziel.

¹³ I Amram aijo'mo na tuuma i Harun tiba i Musa. (I Harun ka' lee'nyo sampe toka sidu-sidutu' tinantukanmo samata-mata mongulus iwi-iwi' na pakakas anu opake de monsombahmo Tumpu, mompapu kamangian bau pongadati Tumpu, mombau anu nu pokauhakon nu Tumpu ka' mombalakati mian da'isan i uno nu sanggo nu Tumpu.

¹⁴ To ana-anak mo'ane i Musa posaihon nu Tumpu Allah aijo', pinosoop hi tulunan mae nu bansa Lewi.)

¹⁵ I Musa kino anak mo'ane ua'aha aijo'mo i Gersom tiba i Eliezer.

¹⁶ Anu tinimbali polaya' nu to ana-anak i Gersom aijo'mo i Sebuel.

¹⁷ I Eliezer ola samian na anaknyo mo'ane sanggonyo i Rehabya. Panyo i Rehabya manjoo' hondo na anaknyo.

¹⁸ I Yizhar, anak i Kehat anu ko ohua'nyo, kino anak mo'ane sanggonyo i Selomit; ia aijo'mo na kapala nu aha sa'anakan.

¹⁹ I Hebron anak i Kehat anu ko totolu'nyo, kino anak mo'ane aha opat: i Yeria na tu'anyo, lapas aijo' i Amarya, i Yahaziel, tiba i Yekameam.

²⁰ I Uziel, anak i Kehat anu ko opatnyo, kino anak mo'ane ua'aha: i Mikha na tu'anyo, tiba i Yisia.

²¹ I Merari kino anak mo'ane ua'aha, sanggo nu aha, i Mahli tiba i Musi. I Mahli kino anak mo'ane ua'aha, aijo'mo i Eleazar, tiba i Kis.

²² Panyo i Eleazar sinilaka madi' kino anak mo'ane; ola to ana-anak boune anu no'osoamo tiba to utu-utus anu mototominsan ka' aha, aijo'mo to ana-anak i Kis.

²³ I Musi, anak i Merari anu ko ohua'nyo, kino anak mo'ane aha totolu': i Mahli, i Eder tiba i Yeremot.

²⁴ Aijo'mo na sanggo nu lee' mae iwi-iwi' i Lewi anu tinulismo, ingala i sanggo nu kapala nu aha mae sa'anakan ka' auwan nu aha toto samian. Umun nu aha uampulu'mo na taun mokiita' ka' binee'anmo kalaja i Laigan nu Tumpu.

²⁵ I Daud notatae, “Tumpu Allah nu Israel nombee'imo ka'amanan hi mian anu pinalesayamo hi Ia, ka' Ia jojoongmo i Yerusalem sampe toka sidu-sidutu'.

²⁶ Kalana aitu, Kemah nu Tumpu ka' iwi-iwi' na pakakas anu opake de monsombahmo Tumpu madi'mo palalu lewa' nu simbu nu mian Lewi.”

²⁷ Jadi kalana palentah i Daud anu pupusnyomo na tinaloakonnyo, sahingga iwi-iwi' na mian Lewi, de umunmo 20 mo na tuna o tulismo i daputan ka' obee'imo kalaja.

²⁸ Aha tionyo ahi' montulungimo to ima-imam lee' mae i Harun mongatun atulannyo monsombah Tumpu i Laigan nu Tumpu, mompobelesi natan, ka' salipi' anu kiijo' i Laigan nu Tumpu, ka' montoa da iwi-iwi' apaa na anu nu Tumpu, madi' mahenyu.

²⁹ Aha mule' suele saja' mompotouka; roti anu osombahkon hi Tumpu Allah, labu anu osombahkon hi Tumpu, kukis anu monipis anu madi' inguna'an ragi, koloban anu tinunuanmo ka' labu anu ginalo'anmo nu lanya' Zaitun. Aha mule' ahi' tionyo montimbang ka' montakan iwi-iwi' na anu osombahkon anu binoamo mae i Laigan nu Tumpu.

³⁰ Ka' mule' aha tionyo ahi' manyanyi mompuji' Tumpu daagi' subu ka' de malomo;

³¹ ka' mule' sansina-sinaa de koloban anu opotunu ka' osombahkon hi Tumpu kona i sinaa nu Sabat, de molamo'akonmo Bitu'on Bu'ou, ka' i sinaa nu lamean sangga'at. Konjoo'nyo nu mian Lewi anu mokalaja de tokamo i tempo'nyo, suele binaumo na atulannyo. Sampe toka sidu-sidutu' na mian nu aha Lewi sabole-bole ahi' saja'mombau kalaja anu pinotoongmo hi aha aijo'.

³² Aha mule' binee'anmo kalaja saja' montoa ka' mompokopiani Kemah nu Tumpu ka' laigan nu Tumpu ka' montulungi to utu-utus nu aha aijo'mo to ima-imam lee' mae i Harun, de mongantanmo anu monsombah Tumpu i tampat aijo'.