1 TAWARIKH 2 - KITAB NU TUMPU ALLA LELE MA'IMAI'

Lee' i Yehuda, anak i Yakub

¹ To ana-anak mo'ane i Yakub aha sampulu' ka' ohua': i Ruben, i Simeon, i Lewi, i Yehuda, i Isakhar, i Zebulon,

² i Dan, i Yusuf, i Benyamin, i Naftali, i Gad, i Asyer.

^3-4 To ana-anak mo'ane i Yehuda aha olima'. Hi bengkele'nyo anu osa-osanggohi i Batsyua, boune nu aha Kana'an, i hampemo na i Er, i Onan ka' i Sela; hi bengkele'nyo anu osa-osanggohi i Tamar, aijo'mo ponuanakonnyo, i hampemo na i Peres, tiba i Zerah, i Er anak tumpe i Yehuda ma'idek hondo na kalakuannyo, sahingga ia pinateanmo nu Tumpu.

⁵ I Peres kino anak mo'ane ua'aha, aijo'mo i Herzon, tiba i Hamul.

⁶ I Serah kino anak mo'ane aha olima': i Zimri, i Etan, i Heman, i Kalkol, tiba i Dara.

⁷ I Akhan anak i Karmi lee' mae i Zerah, anu nonsaduakonmo balaa' anu daka' hondo hi mian nu Israel kalana nongalamo balang anu pinahuhuakon nahampate, padahan aijo' osombahkon ahi' hi Tumpu Allah.

⁸ Anak mo'ane i Etan aijo'mo i Azarya.

Tundulannyo mae i Isai, tuuma i Tomundo' Daud

⁹ I Herzon kino anak mo'ane aha totolu': i Yerahmeel, i Ram, tiba i Kaleb.

¹⁰ Lundu-lunduannyo mae nu tulunan lengkat pe'e mae hi Ram sampe tinoka hi Isai sumo uuka: i Ram i Aminadab i Nahason (mian anu talasanggo hi aha tulunan nu Yehuda)

¹¹ i Salmon i Boas

¹² i Obed i Isai.

¹³ To ana-anak mo'ane i Isai aha popitu'. Aiya na sanggo nu aha lengkat pe'e hi utus tu'a nu aha; i Eliab, i Abinadab, i Simea,

¹⁴ i Netanel, i Radai,

^15-16 i Ozem, i Daud. I Isai suele kino anak boune ua'aha: i Zeruya tiba i Abigail. I Zeruya kino anak aha totolu': i Abisai, i Yoab tiba i Asael.

¹⁷ I Abigail no'osoa tiba i Yeter lee' mae i Ismael. Aha kino anak mo'ane samian sanggonyo i Amasa.

Lee' i Hezron

¹⁸ I Kaleb anak i Hezron no'osoa tiba i Azuba ka' kino anak boune samian sanggonyo i Yeriot. I Yeriot aiya kino anak mo'ane aha totolu': i Yeser, i Sobab, i Ardon,

¹⁹ Salatan i Azuba sinilakamo, i Kaleb no'osoamo tiba i Efrat ka' kino anak mo'ane samian sanggonyo i Hur.

²⁰ Anak mo'ane i Hur sanggonyo i Uri ka' makumpunyo sanggonyo i Bezaleel.

²¹ Salatan umun i Hezron inganompulu'mo na taun, ia no'osoamo tiba samian na boune utus i Gilead anak i Makhir. Aha kino anak mo'ane samian sanggonyo i Segub,

²² ka' i Segub nohumpak samian na anak mo'ane sanggonyo i Yair, anu ko kampungnyo toto ise-ise'

²³ na nu palentah i da'erah Gilead. Panyo kalaja'an Gesur tiba Aram nompatundu'mo 60 na kampung toto ise-ise' i da'erah aijo' tiba kampung toto ise-ise' nu aha mian Yair, Kenat, ka' mule' kampung toto ise-ise' sangga'atnyo. Iwi-iwi' na mian anu jojoong i kiijo' lee' mae i Makhir tuuma i Gilead.

²⁴ Salatan i Hezron sinilakamo, i Kaleb anaknyo nongosoaimo i Efrat balu nu tuumanyo. Anak nu aha momo'ane sanggonyo i Asyur, iamo aijo' na nombau kota' Tekoa.

Lee' i Yerahmeel

²⁵ I Yerahmeel anak tumpe i Hezron kino anak mo'ane aha olima': i Ram, na tumpenyo hondo, lantas i Buna, i Oren, i Ozem, tiba i Ahia.

^26-27 I Ram kino anak mo'ane aha totolu'; i Maas, i Yamin, tiba i Eker. I Yerahmeel kino bengkele'nyo sangga'at sanggonyo i Atara; na nohumpak anak mo'ane sanggonyo i Onam.

²⁸ To ana-anak mo'ane i Onam ua'aha, aijo'mo: i Nadab tiba i Abisur,

²⁹ I Abisur no'osoa tiba i Abihail, ka' aha kino anak mo'ane ua'aha: i Aban tiba i Molid.

³⁰ I Nadab utus tu'a i Abisur kino anak mo'ane ua'aha, sanggonyo nu aha: i Seled tiba i Apaim, panyo i Seled sinilaka madi' kino anak mo'ane.

³¹ I Apaim tuuma i Yisei, i Yisei tuuma i Sesan, ka' i Sesan tuuma i Ahlai.

³² I Yada utus i Samai kino anak mo'ane ua'aha sanggo nu aha: i Yeter tiba i Yonatan. Panyo i Yeter sinilaka madi' kino anak mo'ane.

³³ I Yonatan kino anak mo'ane ua'aha aijo'mo i Pelet tiba i Zaza. Aha iwi-iwi' lee' mae i Yerahmeel.

³⁴ I Sesan madi' kino anak mo'ane, ola anak boune. Posaihonnyo, mian nu Mesir samian sanggonyo i Yarha,

³⁵ pino'osoakonnyomo tiba sala'samian na anaknyo. Aha kino anak mo'ane sanggonyo i Atai.

^36-41 Lee' mae i Atai sampe tinoka hi Elisama lundu-lunduannyo sumo uuka: i Atai i Natan i Zabad i Eflal i Obed i Yehu i Azarya i Heles i Elasa i Sismai i Salum i Yekamya i Elisama.

Lee' i Kaleb

⁴² I Kaleb utus i Yerahmeel kino anak mo'ane samian sanggonyo i Mesa. Ia anaknyo tumpe. I Mesa tuuma i Zif, i Zif tuuma i Maresa, i Maresa tuuma i Hebron.

⁴³ I Hebron kino anak mo'ane aha opat: i Korah, i Tapuah, i Rekem, tiba i Sema.

⁴⁴ I Sema aijo'mo na tuuma i Raham. Makumpu i Sema sanggonyo i Yorkeam. I Rekem utus tu'a i Sema, aijo'mo na tuuma i Samai;

⁴⁵ I Samai tuuma i Maon, ka' i Maon tuuma i Bet-Zur.

⁴⁶ I Kaleb kino anak boune sanggonyo i Efa, Aha kino anak mo'ane aha totolu', sanggo nu aha: i Haran, i Moza, tiba i Gazes. I Haram suele kino anak sanggonyo i Gazes. (

⁴⁷ Samian sanggonyo i Yohdai kino anak mo'ane aha anom; i Regem, i Yotam, i Gisan, i Pelet, i Efa, tiba i Saaf.)

⁴⁸ I Kaleb kino ambuhue' sangga'at sanggonyo i Makha. Tiba boune aijo' i Kaleb nohumpak anak boune ua'aha, sanggo nu aha i Seber tiba i Tirhana;

⁴⁹ lapas aijo' aha nohumpak mule' ohua' na anak mo'ane, sanggo nu aha: i Saaf, aijo'mo na nombau kota Madmana, ka' i Sewa aijo'mo na nombau kota' Makhbena tiba Gibea. I Kaleb suele kino anak boune samian sanggonyo i Akhsa.

⁵⁰ Ka' mule' aiya suele na lee' mae i Kaleb: I Hur anak tumpe i Kaleb hi bengkele'nyo anu osa-osangohi Efrat. I Syobal anak i Hur, iamo aijo' na nombau kota' Kiryat-Yearim.

⁵¹ I Salma anaknyo anu ko ohua'nyo, iamo aijo' na nombau kota' Betlehem; ka' i Haref anaknyo anu ko totolu'nyo, iamo aijo' na nombau kota' Bet-Gader.

⁵² I Syobal anu nonombau kota' Kiryat-Yearim, iamo aijo' na mompolee' mae nu mian Haro'e, ka' mule' mompolee' nu sambahagian na mian anu jojoong i Menuhot,

⁵³ ka' mule' mompolee' mae nu aha sa'anakan anu jojoong i Kiryat-Yearim, aijo'mo aha sa'anakan, i Yetri, i Puti, i Sumati tiba i Misrai. (Mian anu jojoong i kota' Zora, ka' Esytaol atina'mo na to mia-mian anu nolengkat mae hi aha sa'anakan haha aijo'.)

⁵⁴ I Salma aijo'mo na anu nombau kota' Betlehem, iamo na mompolee' mae nu mian Netofa, mian nu Atarot-Bet-Yoab, ka' mian nu Zori, aijo'mo sala' sa'angu' na aha sa'anakan mae anu ohua' aijo' anu jojoong i Manahti.

⁵⁵ Lengkat mae hi aha sa'anakan i Tirati, i Simati, tiba i Sukati, anu jojoong i kota' Yabes, atina'mo na to mia-mian anu toto pande-pande na montulis, ka' po'ule' montulis sulat anu penting hondo i sa'angu' sa sulat. Aha mian nu Keni anu no'osoa tiba mian nu Rekab.