1 TAWARIKH 12 - KITAB NU TUMPU ALLA LELE MA'IMAI'

Aha mian tulunan nu bansa Benyamin nosa'angu'mo hi Daud

¹ Tempo'nyo i Daud nompala'imo i Tomundo' Saul. Ia nambamo jinojoong i Ziklag. Manjoo' na to sulu-suludadu anu tobos ka' to pande-pande tinokamo mae nosa'angu'mo hi Daud.

² Aha mian tulunan nu bansa Benyamin susumo i Saul. Aha to pande-pande na mompana' ka' mombunu'akon batu nu salambeta – maumo pa' koanan kabai kowi.

^3-7 Kapala nu aha aijo'mo i Ahiezer tiba i Yoas to ana-anak i Semaa mian nu Gibea. Aiya na sanggo nu suludadu haha aijo': i Yeziel tiba i Pelet to ana-anak i Azmawet i Berakha tiba i Yehu mian nu Anatot i Yismaya mian nu Gibeon, suludadu anu talasanggo hondo anu suele tinimbali kapala nu posa'angu'an “Tridasawira” i Yeremia, i Yehasiel, i Yohanan tiba i Yozabad mian nu Gedera i Eluzai, i Yerimot, i Bealya, i Semarya ka' i Seface mian nu Harufi i Elkana, i Yisia, i Azareel, i Yoezer ka' i Yasobam aha sa'anakan mae i Korah i Yo'ela tiba i Zebaja to ana-anak i Yeroham mian nu Gedor.

Aha mian tulunan nu bansa Gad nosa'angu'mo hi Daud

⁸ Tempo'nyo i Daud binabentengmo i padang anu mateges manjoo' na to sulu-suludadu anu toto pande-pande ka' anu tinalasanggomo aha tulunan nu bansa Gad tinokamo nosa'angu' hi ia. Aha to sulu-suludadu anu makolit hondo na montoongi kanta ka' talombo'; aha to babaani susumo singa ka' henggo nu aha lumpatan susumo jonga.

^9-13 Aiya na sanggo nu aha anu tinulis binatukakon i pangkat nu aha: i Ezer, i Obaja, i Eliab, i Mismana, i Yeremia, i Atai, i Eliel, i Yohanan, i Elzabad, i Yeremia, i Makhbanai.

¹⁴ Sambagian na mian nu Gad haha aijo' to sulu-suludadu anu toto tangka-tangkas na pangkatnyo anu mongkapalai aha 1.000 na mian, sambagian mule' suludadu anu toto tangka-tangkas na pangkatnyo anu mongkapalai aha 100 na mian.

¹⁵ Daagi' kino minsan jinadi i bitu'on palatamanyo tempo'nyo Kaunyo Yordan ingiaba'mo, suludadu anu toto tangka-tangkas na pangkatnyo haha aijo' notaapmo i kaunyo aijo' ka' nolaa'mo mian nu tumpu nu lipu' i bangka'nyo haha aijo', mau anu i sasu kabete'an kabai anu i sasu kinsoban nu kaunyo aijo'.

Aha mian tulunan nu bansa Benyamin tiba Yehuda nosa'angu'mo hi Daud

¹⁶ Daagi' kino minsan sanggombu na mian aha mae tulunan nu bansa Benyamin tiba Yehuda nambamo i benteng tampat kajojoongan i Daud.

¹⁷ I Daud nonsingkabotimo aha ka' nompoto'i, “De belemiu toka mae aiya kahanda' mosangalu montulungi aku otalima mami na belemiu sanang na kinyonyoa mami montalima belemiu. Panyo de belemiu ko kahanda' toka mae da monsilakaimo aku hi sampo bali'ku, maumo aku madi' nombau anu ma'idek hi belemiu, Tumpu Allah anu osombah nu mompolee'to na monsumbu' ka' mule' Ia na mohukum belemiu.”

¹⁸ Samian na anu aijo' mae hi aha, i Amasai anu lapas aijo' i hangkatmo binau kapala nu sa'angu' na gombuan nu mian anu osa-osanggohi “Tridasawira”, kinuasanmo nu Roh nu Tumpu Allah ka' notatae, “O Daud, anak i Isai! Kami monsangaja'i belento! O' amalakon da belento ka' aha anu montulungi belento momboa mae ka'untungan Tumpu Allah atina' hi beleyum!” Sahingga tinalimamo i Daud na aha ka' i hangkatnyomo na aha binaumo suludadunyo anu matangkas na pangkatnyo.

Aha mian tulunan nu bansa Manasye anu nosa'angu'mo hi Daud

¹⁹ Tempo'nyo i Daud tiba mian nu Filistin nompahampateakonmo i Tomundo' Saul, sambagian na suludadu tulunan nu bansa Manasye nambamo nokiijo' hi Daud. Sabenannyo i Daud madi' montulungi mian nu Filistin haha aijo'. To pola-polaya' nu aha Filistin nonsaimo ia minsusule' i Ziklag kalana aha mabuhuk dumo saidi' mae ia mambamo mokiijo' mosa'angu' hi Tomundo' Saul ka' monsilakaimo aha.

²⁰ Aiya na sanggo nu aha to sulu-suludadu tulunan nu bansa Manasye anu nokiijo' nosa'angu' hi Daud tempo'nyo ia nambamo nokiijo' i Ziklag: i Adnah, i Yozabad, i Yediael, i Mikhael, i Yosabad, i Elihu ka' i Ziletai. Aha toto samian mongkapalai 1.000 na suludadu.

²¹ Aha suludadu anu baani hondo ka' nontulungimo i Daud mongewa mian anu lewa' mamba mae montumbuhi. I mihinyo mae aha tinimbalimo suludadu nu Israel anu toto tangka-tangkas na pangkatnyo.

²² Timbalimo otaloakon sansina-sina daagi' ko mian anu toka mae mosa'angu' hi Daud, sahingga madi' pinin suludadu i Daud nanjoo'mo hondo.

Suludadu i Daud nahosonmo hondo

^23-37 Tempo'nyo i Daud kiijo' i Hebron nanjoo'mo na suludadu anu pandemo na mahampate nosa'angu'mo hi ia. Aha nontulungimo ia da ia bisa timbali tomundo' mombolosakon i Saul, susumo anu jinanji'mo nu Tumpu. Konjoo'nyo nu aha sumo aiya: Hi aha tulunan nu bansa Yehuda: 6.800 na mian, sasadiamo na kanta ka' talombo'nyo. Hi aha tulunan nu bansa Simeon: 7.100 na mian anu pandemo na mahampate. Hi aha tulunan nu bansa Lewi: 4.600 na mian. Suludadu i Yoyada mongkapalai lee' mae i Harun: 3.700 na mian. To utu-utus mae i Zadok, samian na suludadu anu daagi' olitau ka' baani hondo: mongkapalai aha 22 na mian – iwi-iwi' to tu'a-tu'anyo nu auwan. Hi aha tulunan nu bansa Benyamin (tulunan i Tomundo' Saul): aha 3.000 na mian; kanjoo'annyo na tulunan nu bansa Benyamin tataap montuluti i Saul. Aha tulunan nu bansa Efraim 20.800 talasanggo hi aha posi sa'anakan. Aha tulunan nu bansa Manasye anu jojoong i sasu kinsoban Kaunyo nu Yordan: 18.000 na mian anu tinantukanmo molantik i Daud da baumo tomundo'. Aha tulunan nu bansa Isakhar: 200 na polaya' tibamo to sulu-suludadunyo nu aha: polaya'nyo haha aiya to pande-pande na montantukan pa' apaa na anu tionyo obau nu mian da'isan Israel i saangu' na tempo' anu matantu hondo. Aha tulunan nu bansa Zebulon: 50.000 na mian anu pande hondo na mompake ngangahannyo nu toongon ka' madi' manjoo' na kabalatan de mahampatemo, aha to mia-mian anu tulu-tulutan ka' opalesaya. Aha tulunan nu bansa Naftali: 1.000 na to pola-polaya'nyo tibamo to sulu-suludadunyo aha 37.000 na suludadu sasadiamo na kanta ka' talombo' nu aha. Aha tulunan nu bansa Dan: 28.600 na mian anu memang ingajanmo totu-totu'u. Aha tulunan nu bansa Asyer: 40.000 na mian anu madi' manjoo' na kabalatan de mahampatemo. Aha iwi-iwi' na tulunan nu bansa i sasu kabete'an Yordan, aijo'mo, i Ruben, i Gad ka' sambagian na tulunan nu bansa Manasye: 120.000 na mian anu pande hondo na mompake iwi-iwi' na ngahan nu toongan bau pahampate.

³⁸ Iwi-iwi' na suludadu haha aijo' nambamo i Hebron ka' nontoukaimo ahi' mahampate ka' sabole-bolemo ahi' mohangkat i Daud da timbali tomundo' nu aha Israel iwi-iwi'. Ka' iwi-iwi' na mian nu Israel sangga'at suele nosa'angu'mo na kinyonyoa da han aijo' obaumo.

³⁹ Tinolun sinaa na kinopinnyo na suludadu haha aijo' jinojoong i kiijo' hi Daud ka' lewa'mo nolame-lame' nongkaan ka' nonginum anu pinosadiamo nu aha mian nu Israel sangga'at da bau pompokaan aha.

⁴⁰ Aha to tulu-tulunan nu bansa sangga'at anu jojoong i sasu utara maumo majo'on aijo'mo tulunan nu bansa Isakhar, Zebulon tiba Naftali singkapmo mae tinoka na aha nonsake'i mae keledai, unta, bagal, ka' sapi' ka' manjoo' hondo na anu okaan pinaha posake' mae nu aha: labu, buah nu ara, kismis, anggur, ka' lanya' nu zaitun. Aha mule' nomboa mae sapi' ka' domba da o kolot ka' okaan. Iwi-iwi' aijo' bau pomponyata' kalana talalomo hondo sinanang na kinyonyoa nu aha mian Israel iwi-iwi'.