1 TAWARIKH 11 - KITAB NU TUMPU ALLA LELE MA'IMAI'

I Daud tinimbalimo tomundo' nu aha Israel tiba Yehuda

¹ Iwi-iwi' na to pola-polaya' nu bansa Israel tinokamo hi Daud kiijo' hi Hebron ka' nompoto'i, “Kami aiya daagi' julu mae nu Belento Tomundo'.

² Salatan pe'e naipuan mae, ka' mule' tempo'nyo i Saul daagi' nompalentah kami, belentomo Tomundo' na nongkapalai suludadu nu Israel de mambamo na aha mahampate. Ka' ule' Tumpu Allah nu Belento Tomundo' binalajanji'mo tukoonyo belentomo Tomundo' na mompalentah mian anu pinalesayamo hi aha ka' baumo tomundo' nu aha.”

³ Sahingga hi Daud binalajanji'mo tiba to pola-polaya' nu Israel haha aijo'. Lantas i hangkatmo nu aha na ia binau tomundo' nu Israel susumo anu pinoto'imo i Samuel, apaa na anu jinanji'mo nu Tumpu hi ia.

⁴ Daagi' kino minsan i Tomundo' Daud tiba suludadu nu Israel iwi-iwi' nambamo nontumbuhi kota' Yerusalem. Tempo'nyo aitu kota' aijo' sanggonyo i Yebus, ka' tumpu nu lipu' anu jojoong i kiijo' aijo'mo mian nu Yebus.

^5-7 Mian nu Yebus haha aijo' nompoto'imo hi Daud, tukoonyo nu aha ia madi' moko ala mompinsoopi kota' nu aha aijo'. Panyo pinoko alamo i Daud na nongkuasai benteng nu aha anu osa-osanggohi Sion. Tempo'nyo aitu pinoto'imo i Daud momonanyo hi to sulu-suludadunyo tukoonyo ihe na mian anu momona mompatei mian nu Yebus ia na o hangkat bau talenga'. Sahingga kalana i Yoab na anu momona nontumbuhi mian nu Yebus iamo na i hangkat binau talenga'. (Sanggo nu tinanyo i Yoab aijo'mo i Zeruya.) Salatan kinuasanmo na benteng Sion, i Daud jinojoongmo kiijo'. Mokonyo aijo' salatanmo pe'e aitu benteng aijo' sinanggohanmo “Kota' Daud”.

⁸ I Daud po'ule' mule' nombau kota' aijo' mulai pe'e i tampat anu tinambulanmo nu tano' da matangkas, sasu kabete'an i sambiha' nu bungkutnyo; ka' i mihinyo mae po'ule'je mule' binau i Yoab sampe tinimbali.

⁹ I Daud nompaka pahosonmo na kakuasa'annyo kalana Tumpu anu daka' na kuasanyo na montulungi ia.

To sulu-suludadu i Daud anu talasanggo

¹⁰ Aiya na sanggo nu suludadu i Daud anu toto tangka-tangkas na pangkatnyo ka' anu tinalasanggomo. Tiba iwi-iwi' na mian da'isa nu Israel, aha binala'usahamo totu-totu'u da i Daud timbali tomundo', susumo ahi anu jinanji'mo nu Tumpu. Ka' sabole-bole ahi' nusangaja'i nu aha na anu nu palentahkon i Daud.

¹¹ Suludadu anu matangkas na pangkatnyo momona aijo'mo i Yasobam mian nu Makhmoni, iamo na mongkapalai “Triwira”. Daagi' kino minsan aha nahampate, ia nongewa aha 300 na mian ka' nompateimo aha iwi-iwi' nu talombo'nyo.

¹² Mian ko ohua'nyo anu aijo' i Triwira aijo'mo i Eleazar anak i Dodo mian aha sa'anakan i Ahohi.

^13-14 Aha nahampate kiijo' i Pas-Damim ia naninggalum hi Daud nongewa mian nu Filistin. Salatan mian nu Israel lewa'mo nopalai, ia tiba to sulu-suludadunyo na sabole-bole ahi' nongewa i totonga' nu sa'angu' na ale' nu gandum nahampate nongewa mian nu Filistin haha aijo'. Lantas binee'anmo nu Tumpu ka'untungan nahampate anu daka' hondo hi ia.

^15-16 Daagi' kino sansinaan aha 30 na suludadu i Daud anu toto tangka-tangkas na pangkatnyo, aha 3 na suludadu anu talasanggo hondo nosingkabotimo i Daud i tampat pinaninsulukannyo i sa'angu' na bungkutnyo nu batu koko liang adulam. Tempo'nyo aijo' mian nu Filistin binakemahmo i bangka'nyo nu Refaim, ka' sa'angu' na gombuanyo nu suludadu nu aha nonjojoongimo Betlehem.

¹⁷ I Daud saja'mo nonginau' ka' nongidei kampungnyo aijo', ia notatae, “Beh de aku opo'inumi pe'e mae uee nu bubung koko sabatan daka' kiijo' i Betlehem.”

¹⁸ Nohongo potatae aijo' aha totolu' na suludadu anu toto tangka-tangkas na pangkatnyo aijo' nompokiijo'imo kemah nu aha Filistin lantas nontaukmo mae uee i bubung aijo' lantas binoamo nu aha hi Daud. Panyo i Daud madi' nongka'oho' nonginum, ola ahi' binubusakonnyo salaku bau tanda sinombahkonnyomo hi Tumpu.

¹⁹ Ia notatae “I uno nu sanggo nu Tumpu Allah, aku madi' timbali monginum uee aiya! De aku monginum sumomo aku monginum baso' nu to mia-mian anu nonsawanakonmo baso' nu aha!” Jadi i Daud madi hondo-hondo nonginum uee aijo'. Aijo'mo na hahan anu talasanggo, anu binaumo nu aha totolu' na suludadu anu baani hondo aijo'.

^20-21 Aha tolumpulu' na suludadu anu toto tangka-tangkas na pangkatnyo aijo' ka' talasanggo aijo' suele osanggohi “Tridasawira”. Aha kinapalaan i Abisai utus ise' i Yoab. Daagi' kino minsan ia nompatei nu talombo' aha 300 na mian, sahingga ia tinalasanggomo. Panyo ia madi' ahi' sumo ko baani nu aha Triwira aijo'.

²² Samian na suludadu sangga'at anu matangkas na pangkatnyo ka' talasanggo aijo'mo i Benaya anak i Yoyada mian nu Kabzeel. Ia baani hondo. Ua'aha na talenga' nu aha Moab anu talasanggo pinateannyomo. Daagi' kino sansinaan tempo'nyo nu eis, ia nompinsoopimo sa'angu' na liang ka' nompateimo sa'angu' na singa i kiijo'.

²³ Ia toho'mo suele nompatei mian nu Mesir samian anu daka' hondo na butongnyo; ko tangkasnyo molabi ohua' na meten. Mian aijo' ko toongon bau pimuhuk te talombo' anu daka' hondo, panyo ingahopan i Benaya ola amangkun na toongonnyo. Talombo' anu i lima nu mian nu Mesir aijo' ingagoannyo lantas aijo'mo na pinompateinyo mian aijo'.

²⁴ Aijo'mo na hahan anu talasanggo anu binau i Benaya mian gampa mae nu aha Tridasawira.

²⁵ I gombuan nu aha aijo' i Benayamo na anu talasanggo hondo, panyo ia madi' ahi' sumo kobaani nu aha Triwira aijo'. I Daud nohangkatmo i binau kapala nu anu lewa' monsangalui ia.

^26-47 Aiyamo na to sulu-suludadu sangga'at anu toto tangka-tangkas na pangkatnyo ka' talasanggo: i Asael utus ise' i Yoab i Elhanan anak i Dodo mian nu Betlehem i Samot mian nu Harod i Heres mian nu Peloni i Ira anak i Ikes mian nu Tekoa i Abiezer mian nu Anatot i Sibkhai mian nu Husa i Ilai mian nu Ahohi i Maharai mian nu Netofa i Heled anak i Baana mian nu Netofa i Itai anak i Ribai mian nu Gibea i da'erah tulunan nu bansa Benyamin i Benaya mian nu Piraton i Hurai mian anu jojoong i bangka'nyo nu Gaas i Abiel mian nu Araba i Azmawet mian nu Bahurim i Elyahba mian nu Saalbon i Hasyem mian nu Gizon i Yonatan anak i Sage mian nu Harari i Ahiam anak i Sakhar mian nu Harari i Elifal anak i Ur i Hefer mian nu Mekherati i Ahia mian nu Peloni i Hezrai mian nu Karmel i Naari anak i Ezbai i Yo'el utus i Natan i Mibhar anak i Hagri i Zelek mian nu Amon i Maharai mian nu Beerot, anu montoongakon toongon i Yoab i Ira tiba i Gareb mian nu Yetri i Uria mian nu Het i Zabad anak i Ahlai i Adina anak i Siza (sala' samian na tu'a-tu'anyo nu aha tulunan mae nu bansa Ruben anu ko suludadunyo aha 30 na mian.) i Hanan anak i Maakha i Yosafat mian nu Mitni i Uzia mian nu Asytarot i Syama tiba i Yeiel, to ana-anak i Hotam, mian nu Aro'er i Yediael tiba i Yoha, to ana-anak i Simri, mian nu Tizi i Eliel mian nu Mahawim i Yeribai tiba i Yosawya, to ana-anak i Elnaam i Yitma mian nu Moab i Eliel, i Obed tiba i Yaasiel mian nu Mezobaya.