1 SAMUEL 8 - KITAB NU TUMPU ALLA LELE MA'IMAI'

Aha mian nu Israel nomoitamo samian na tomundo'

¹ Salatan i Samuel ilangkai'mo, ihangkatnyomo na to ana-anaknyo da timbali mian kopian hi aha mian nu Israel.

² Anaknyo tumpe sanggonyo i Yo'el ka' ko ohua'nyo i Abia. Aha binaumo mian kopian i Bersyeba.

³ Panyo aha madi'mo nontiho kalakuan nu tuuma nu aha, panyo ola molio posi kauntungan nu aha. Aha mongala doi bau pontamboi palakala, ka' mongulus palakala nu mian madi' adin.

⁴ Kalana aijo' to pola-polaya' nu aha Israel iwi-iwi' nogombumo ka' nangadap hi Samuel kiijo' i Rama,

⁵ ka'notatae hi ia, “Potombihing mae kita Tuuma, belento tuuma ilangkai'mo ka' mule' to ana-anak nu belento Tuuma madi'mo nontiho kalakuan nu belento Tuuma. Jadi sahanyo belento Tuuma mohangkatmo samian na tomundo' da kami ko tomundo'mo susumo aha bansa sangga'at.”

⁶ Panyo i Samuel madi' sinanang na nohongo apaa na anu pinoita nu aha aijo'. Lantas ia binalado'amo hi Tumpu,

⁷ ka' Tumpu notataemo, “Popo ii'mo na poitaon iwi-iwi' nu aha bansa aijo' hi beleyum. Kalana misa' beleyum na madi'mo nu ala nu aha, panyo Aku ahi'. Aha madi'mo daagi mongala Aku bau tomundo' nu aha.

⁸ Salatanmo pe'e aku nomboa mae aha nosabat lengkat mae i Mesir aha madi'mo pinalesaya hi belengku ka'nonsombahmo to pilo-pilogot ka' uuka aiya apaa na anu nu bau nu aha hi beleyum, aijo'mo na anu binaumo nu aha hi belengku.

⁹ Mokonyo aijo' popo ii'mo na poitaon nu aha; panyo pagala ahi' pokinde'i na aha ka' poto'i mosia na aha saidi'mae de nu palentahmo nu tomundo'.”

¹⁰ Iwi-iwi' na potatae nu Tumpu aijo' pinoto i'mo i Samuel hi aha mian anu nompoitamo samian na tomundo' hi ia, ia notatae;

¹¹ “Sumo uuka de samian na tomundo nu belemiu mompalentahmo belemiu,” sumo uuka na i Samuel nontutuhakon. “Nupakisa na to ana-anak nu belemiu da bau suludadu; sambagian na aha opotimbali suludadu sumake' i kareta, sambagian bau suludadu monsake'i ajahan, ka' sambagian mule' bau suludadu lumajang tengke.

¹² Sambagian nu hangkat mongkapalai suludadu aha samadala na mian, ka' sambagian mule' mongkapalai aha limampulu' na mian. Tomundo aijo' saidi mae mompakisa to ana-anak nu belemiu mompajeko ale'nyo, mongalapakon hasin u ale'nyo, mombau toongon da bau pimuhuk ka' pakakas nu kareta anu opake mahampate.

¹³ To ana-anak nu belemiu anu to bou-boune opalentah mombau minya-minya' da nu ala bau kapalaluannyo ka' mokalaja tukang mongunjangi ka'tukang mombau roti.

¹⁴ Nu alamo na ale' nu belemiu, ale' nu anggur nu belemiu, tiba ale' nu zaitun nu belemiu anu molumba'hondo ka' nu bee'mo hi to mia-mian anu ko pangkatnyo anu mokalaja hi ia.

¹⁵ Ale' sangga'at ka' mule' ale' nu anggur nu belemiu opokonaimo hasin sambagian anu o ala i sampulu' na bagian na isinyo nu ale' aijo', lantas nu bee'mo hi to kapa-kapala nu suludadu' ka' hi to mia-mian anu kopangkatnyo mokalaja hi ia.

¹⁶ Nu alamo na posaihon nu belemiu, potuu'on nu belemiu, anu molompo' hondo tiba keledai nu belemiu ka' nu pakemo mokalaja hi ia.

¹⁷ Mee' nu belemiu anu sampulu' na bagian, sambagian na nu alamo, domba nu belemiu nu alamo hi ia. Ka' belemiu suele timbalimo posaihonnyo.

¹⁸ De tokamo na tempo'nyo aijo' belemiu mompele-pele'mo kalana tomundo' anu pinile'anmo nu belemiu aijo', panyo Tumpu madi'mo mongka'oho' mohongo pompele-pele' nu belemiu aijo'.”

¹⁹ Panyo bansa Israel haha aijo' madi'mo mongka'oho mompajuli potatae i Samuel, ola mule' ahi' aha notatae, “Bakasmo! Maumo pa' mosia kami mongkahanda'imo tomundo'.

²⁰ Kami mongkahanda'imo da pokakana tiba aha bansa sangga'at, tomundo' mami tionyo ahi' mompalentah kami ka' molaya' kami i uno nu pahampatean.”

²¹ Salatan ihongomo i Samuel na potatae nu aha aijo' iwi-iwi' pinotokanyomo hi Tumpu.

²² Tinaaman nu Tumpu, “Pobee'mo na pongka'oho' nu aha ka' hangkatmo na samian bau tomundo' nu aha.” Lapas aijo' pinalentahmo i Samuel na aha mian nu Israel haha aijo' da minsusule'mo i laigan nu aha toto samian.