1 SAMUEL 7 - KITAB NU TUMPU ALLA LELE MA'IMAI'

¹ Sahingga mian anu jojoong i Kiryat-Yearim nongalamo Peti' Palajanjian nu Tumpu aijo' ka' binoanyomo i uno nu laigannyo nu mian anu sanggonyo i Abinadab; laigan aijo' binau aita i bawo nu bungkutnyo. Lapas aijo' nohangkatmo ka nombalakatimo i Eleazar anak i Abinadab da monjagai Peti' Palajanjian nu Tumpu aijo'.

I Samuel nompalentahmo Israel

² Pinin suele na Peti' Palajanjian nu Tumpu aijo' inguna' kiijo' i Kiryat-Yearim, kila-kila inguampulu' na taun. Tempo'nyo aijo' iwi-iwi' na aha mian nu Israel saja'mo nomoita tulung hi Tumpu.

³ Lantas notataemo na i Samuel hi aha mian nu Israel, “De belemiu po ule'mo monsombah Tumpu, ka' totu-totu'u ahi na kinyonyoa nu belemiu monsombah Ia, saba' tionyo ahi' belemiu mongalin iwi-iwi' na pilogot nu aha mian anu lengkat mae i salipu'an tiba patong nu Pilogot Boune Astoret. Bee'mo na butong nu belemiu totu-totu'u hi Tumpu ka' olamo Ia na osombah sahingga belemiu madi'mo opoposia nu aha mian Filistin.”

⁴ Jadi aha mian nu Israel nontibahakonmo madi'mo nongkali-kalinga Pilogot Baal tiba patong Pilogot Boune Asytoret, lantas olamo ahi' Tumpu na opalesaya.

⁵ Lapas aijo' notataemo na i Samuel, “Posihuk mae na bansa Israel iwi-iwi' i Mizpa, da ku do'akon na belemiu hi Tumpu.”

⁶ Lantas aha sinihukmo iwi-iwi' kiijo' i Mizpa. Aha nontauk uee ka' mule' binubusakon salaku palasombahan hi Tumpu, ka' mule aha binapuasa'mo sinansinaa isinaamo aijo'. Aha notatae, “Kami binaladosa'mo hi Tumpu.” (Kiijo' i Mizpa i Samuel lewa'mo nongulus iwi-iwi' na palakala po ualian nu aha mian Israel.)

⁷ Salatan ihongomo nu aha mian Filistin na mian nu Israel sinihukmo kiijo' i Mizpa, aha oli-olima' na tomundo' nu Filistin nambamo no kiijo' tiba suludadu nu aha ka' nontumbuhimo aha mian nu Israel. I hongo nu aha mian Israel na han aijo' aha nabuhukmo.

⁸ Aha notataemo hi Samuel, “Sabole-bole pe'e mae balado'a hi Tumpu Allah-nto da kita nu posalamat boli nu poposia nu aha mian Filistin.”

⁹ Kalana aijo' i Samuel nongkolotmo sa'angu' na anak nu domba anu daagi bata'nyo lantas sinombahkonnyomo salaku bau koloban hi Tumpu anu opotunu. Lapas aijo' ia binalado'amo hi Tumpu da otulungi mae na mian nu Israel, ka' do'anyo aijo' tinalima-Nyomo.

¹⁰ Tempo'nyo i Samuel nonsombahkonmo koloban anu pinotunu aijo' aha mian nu Filistin nontumbuhimo mae; panyo tempo'nyo aijo' suele Tumpu nompotokamo mae gohung aita i langit nokiijo' hi aha. Aha naha popadeka'anmo madi'mo sinumbu-sumbu' pa' moya moyamo na kalambanan.

¹¹ Suludadu nu aha Israel nosabatmo mae kiijo' i Mizpa lantas nololoi'mo aha mian nu Filistin, kojo'onnyo me sangkiding tinokamo i Bet-Kar, ka' nohopu'imo aha anu iloloi' aijo'.

¹² Lapas aijo' i Samuel nompotinjomo sa'angu' na batu i potempasan nu Mizpa tiba Sen. Ia notatae, “Tumpu nontulungimo kita totu-totu'u” – lantas batu aijo' sinanggohannyomo “Batu Nontulungi.”

¹³ Sumo aijo' na aha mian nu Filistin ihungku'an. Tumpu madi'mo nompobee' aha ninsoop i daerah Israel, tempo'nyo i Samuel daagi tutuu'.

¹⁴ Kota' nu aha Israel iwi-iwi' anu pinatundu'mo nu mian Filistin, lengkat pe'e mae i Ekron tinoka-toka i Gad, sinule'akonmo hi aha mian Israel. Jadi po ule'mo i humpak nu aha Israel na daerah nu aha. Mian nu Israel tiba aha mian nu Amori nahandamemo.

¹⁵ I Samuel nompalentah aha mian nu Israel sampe ia sinilaka.

¹⁶ Sataun toka sataun ia mamba monsongkohi Betel, Gilgal, tiba Mizpa. Ka' itampat haha aijo' ia mongulus palakala po ualian sampe jadimo ma'ima'.

¹⁷ Saja' sumo aijo' na nu bau, ka' de lapasmo ia minsusule'mo ilaigannyo kiijo' i Rama. Ikiijo' mae ia tinimbalimo mian kopian nu aha mian Israel, ka' mule' nompotinjomo sa'angu' na mezbah ponsomban Tumpu.