1 SAMUEL 6 - KITAB NU TUMPU ALLA LELE MA'IMAI'

Peti' Palajanjian sinule'akonmo

¹ Salatan Peti' Palajanjian nu Tumpu popitu'mo na bitu'on na kinopinnyo kiijo' i Filistin,

² aha mian nu Filistin nolagamo to ima-imam ka' anu pa'ilimu' lantas pinokilawamo nu aha, “Peti' Palajanjian nu Tumpu aijo' oposiantomo? De osule'akontomo i una'annyo momona mosia na kita mombau?”

³ Lantas tinaamanmo nu aha, “Peti' Palajanjian nu Tumpu Allah Israel aijo' ola da asan osule'akonmo, panyo tionyo ahi' otoukai na tambonyo bau pontokong dosa' nu belemiu. Da tiba jalan anu sumo aijo' ma alinmo na panyakit nu belemiu, da osumbu' nu belemiu kadaka' Tumpu Allah nu aha Israel aijo' saja'mo nohukum belemiu.”

⁴ “Apaa na anu tionyo obee'to bau pontokong aijo' hi aha, pinokilawa nu mian haha aijo'. Imam haha aijo' nontaami?” “Olima' na komponan nu mosoni' otiho susumo bisun ka' olima' mule' na komponan nu mosoni' obau susumo bokoti', sumo konjoo'nyo nu to tomu-tomundo' nu aha Filistin. Temisa' balaa' kinona nu bisun ka' suele bokoti' anu nontuda'imo balaa' belemiu u'utu mae, mau mian da'isan, mau mule suele tomundo'?

⁵ Jadi belemiu tionyo ahi' mombau anu susumo bisun tiba anu susumo bokoti' anu nompoko idekmo lipu' nu belemiu. Tiba jalan anu sumo aijo' belemiu mongadatimo Tumpu Allah nu aha Israel. Ihe na monsumbu' da Ia madi'mo mohukum mae belemiu. Ka' to pilo-pilogot ka' mule' tano' nu belemiu.

⁶ Apaa na gunanyo belemiu panggaga susumo tomundo' ka' mian nu Mesir naipuan mae? Boli okolilimi mosia na Tumpu Allah lewa' nombia-biangakon aha sampe aha madi' mo noko ala nombau apa-apaa ka' aha mian nu Israel nu Israel pino bee'mo nu aha nompala'i Mesir.

⁷ Kalana aijo' potoukamo na loda sa'angu' anu daagi bu ou ka' ohua' na sapi' anu daagi momposusu ka' anu ma'isa toho' nohela' loda. Popasang na sapi' haha aijo' ohu-ohua' i loda aijo' ka' boa na anaknyo nu sapi' haha mokiijo' i pangkunnyo.

⁸ Lapas aijo alamo na Peti' Palajanjian nu Tumpu posake' i loda aijo' ka' potimpas i sohipi'nu peti' ise-ise' anu pinongisian pakakas mosoni' anu tionyo ahi' osombahkon nu belemiu hi Ia salaku bau pontobus dosa' nu belemiu. Ka' pobakas da loda tiba sapi' haha aijo' mosi lumajang.

⁹ Opotoakon na kajalanannyo; De Peti' Palajanjian aijo'nu boa mompanjolongi posi lipu'nyo, aijo'mo kota' Bet-Semes, aijo' onyata'mo taalu' Tumpu Allah nu aha mian Israel mompotokamo mae balaa' anu daka' hondo hi kita. Panyo de loda aijo' madi' mokiijo' atina' osumbu'tomo saba balaa' aijo' misa nolengkat mae hi Tumpu Allah nu aha mian Israel, panyo nosi toka mae.”

¹⁰ Mian haha aijo' nohongo-hongomo; aha nongalamo ohua' na sapi' anu daagi mompo susu lantas pinopasangnyomo i loda, ka' anak nu sapi' haha aijo' pinosoopmo nu aha i pangkunnyo.

¹¹ Lantas Peti' Palajanjian aijo' pinosake'nyomo i loda ka' suele peti' ise-ise' pinongisian mosoni' anu binau susumo bokoti' ka' anu mule' binau susumo bisun.

¹² Sapi' haha aijo' ilumajangmo nompanjolongimo Bet-Semes; binatang haha aijo' nolonga'mo ka' ilumajangmo lau-laus, madi' nosele ikowikabai i koanan i jalan daka'. Aha oli-olima' na tomundo' nu mian Filistin aijo' saja'mo nombatuki tinoka-toka i potempasan nu Bet-Semes.

¹³ Tempo'nyo aitu mian anu jojoong i Bet-Semes hau-haunyomo mompadak gandum i bangka'nyo. Salatan tinoa nu aha na Peti' Palajanjian aijo', aha ilame'mo na nolabot.

¹⁴ Loda aijo' madi'mo i lumajang salatan tinokamo i batu anu daka-daka' koko ale' i Yosua mian nu aha Bet-Semes. Mian anu jojoong ikota' aijo' nombiha-biha'mo kau' nu loda aijo' lantas nongkolotmo sapi' aijo' ohu-ohua' binau koloban anu opotunu ka' sinombahkonmo hi Tumpu.

¹⁵ Lapas aijo' aha mian nu Lewi nontau'akonmo Peti' Palajanjian nu Tumpu tiba peti' ise-ise' anu pinongisian pakakas mosoni' haha aijo' lantas pinotimpasnyomo i bawo nu batu daka-daka' aijo'. Lapas aijo' aha mian nu Bet-Semes nonsombahkonmo koloban anu opotunu tiba koloban sangga'at hi Tumpu.

¹⁶ Salatan aha oli-olima' na tomundo' nu mian Filistin nontoamo han iwi-iwi' aijo' ninsusule'mo na aha namba i Ekron i sinaamo aijo' suele.

^17-18 Sumo aijo' na aha mian nu Filistin nompakatumo hi Tumpu anu osombahkon da bau pontokong dosa' nu mian anu jojoong i kota anu nu palentah nu tomundo' aha olima' aijo'. Kota haha aijo'; aijo'mo: Asdod, Gaza, Askelon, Gad, tiba Ekron. Daagi ko anu ko bentengnyo, daagi ko anu madi' ko bentengnyo. Toto sa'angu' na kota haha aijo' nompakatu sa'angu' na mosoni' susumo bisun tiba sa'angu' na mosoni' anu susumo bokoti' na binau. Sa'angu' na tanda saba' memang totu'u na han aijo', batu daka-daka' anu pinompotimpasan nu aha Peti' Palajanjian nu Tumpu. Sampe sinaa uuka aiya batu aijo' daagi kiijo' hi ale' i Yosua mian nu aha Bet-Semes.

¹⁹ Panyo kalana aha mian nu Bet-Semes haha aijo' nontoamo apaa na anu i unonu Peti' Palajanjian nu Tumpu, aha pitumpulu' na mian pinateanmo nu Tumpu. Sahingga mian da'isan nohangimo ka' sinusa'mo kalana Tumpu nompotokamo hi aha balaa' anu daka' hondo aijo'.

Peti' Palajanjian kiijo'mo i Kiryat-Yearim

²⁰ Lantas aha mian nu Bet-Semes notataemo, “Ihe na moko ala tuminjo i ahop nu Tumpu, Tumpu Allah Anu Susi' aijo'? Iya na pomboan Peti' aijo' da majo'on lengkat hi kita?”

²¹ Lantas aha nonsaimo mian namba hi aha mian nu Kiryat-Yearim ka' nompotun sumo uuka, “Mian nu Filistin nonsule'akonmo mae Peti' Palajanjian nu Tumpu. Tokamo mae ka' boamo na Peti' aijo' hi kajojoongan nu belemiu.”