1 SAMUEL 5 - KITAB NU TUMPU ALLA LELE MA'IMAI'

Peti' Palajanjian kiijo'mo hi aha mian nu Filistin

¹ Salatan ingagoanmo nu aha mian Filistin na Peti' Palajanjian nu Tumpu Allah, lantas binoamo nu aha lengkat mae i Eben-Heizer namba i kota Asdod.

² Tinoka ikiijo' pinosoopmo i Dagon anu bau ponsomban pilogot nu aha ka' pinokokomo nu aha i sohipi'nyo nu patong nu pilogot anu ikiijo'.

³ Salatan dodododopnyo subu-subu aha mian nu Asdod tinokamo i ponsomban aijo' tinoa nu aha patong Dagon nanabu'mo daha-dahapa i tano' i ahop nu Peti' Palajanjian nu Tumpu! I hangkat nu aha na patong aijo' ka' poule' pino ana'nyo i tampatnyo.

⁴ Panyo dodododopnyo subu-subu tinoa nu aha na patong aijo' unanabu'mo mule' daha-dahapa i ahop nu Peti' Palajanjian aijo'. Kinopinduannyo aijo' ubak nu patong aijo' tiba limanyo ohu-ohua' nopato'mo ka natitimpasmo i ahop nu sabatannyo; Ola butongnyo nu patong aijo' na daagi sa'a-sa'angu'. (

⁵ Mokonyo aijo' sampe sinaa uuka aiya to ima-iamam nu pilogot nu Dagon ka' iwi-iwi'na anu toka mae monsombah kiijo' i Asdod malalampang na motulu i ahop nu sabatan ponsomban Dagon ka' madi' timbali opeja' na kiijo'.)

⁶ Lapas aijo' Tumpu nohukummo mian anu jojoong i Asdod tiba daerahnyo iwi-iwi', butong nu aha singkapmo binisulon.

⁷ Salatan tinoa nu aha apaa na anu jinadimo hi aha aijo' notataemo na aha, “Tumpu Allah nu aha mian Israel nohukumo kita tiba pilogot Dagon. Kita madi' timbali mompojoong Peti' Palajanjian nu aha aiya hi kita lebe pin.”

⁸ Kalana aijo' aha nomposihukmo oli-olima' na tomundo' nu aha Filistin da sihuk, lantas binasale'mo. “Peti Palajanjian nu Tumpu Allah Israel aijo' oposiantomo?” Tinaaman nu tomundo' haha aijo' “Olalin mokiijo' i kota' Gad.” Jadi Peti' aijo' ilalinmo nokiijo' i kota' Gat, sa'angu'na kota' nu aha Filistin sangga'at.

⁹ Panyo salatan Peti' aijo' tinokamo i kiijo', Tumpu nohukum mule' kota aijo', aijo'mo nombau mule' anu talalo hondo okabuhuk. Anu jojoong i kota aijo' mau anu daagi to ana-anak mau anu to tu'a-tu'anyomo kinonamo nu hukuman bisun i butong nu aha.

¹⁰ Lantas Peti' Palajanjian aijo' binoamo i Ekron kota' sangga'at mule' nu aha mian Filistin. Salatan Peti' aijo' tinokamo i kiijo' anu jojoong i kiijo' lewa'mo, no loboo' aha notatae, “Peti' Palajanjian nu Tumpu Allah Israel aijo' binoamo mae no uuka da opateimo na kita iwi-iwi'.”

¹¹ Kalana aijo' aha nolagamo iwi-iwi' na tomundo' nu aha mian Filistin da mogombu, lantas notatae, “Sule'akon na Peti' Palajanjian nu Tumpu Allah Israel aijo' i pinompo una'an momona da boli opatei na kita tiba to utu-utusto.” I songko-songko na kota' jinadimo na anu okabuhuk hondo kalana Tumpu Allah no hukumo anu jojoong i kiijo' ma'idek hondo.

¹² To mia-mian anu madi' sinilaka pinahakonamo nu bisun sahingga anu jojoong i kota' aijo' lewa'mo noloboo'i to pilo-pilogot nu aha momoita tulung.