1 SAMUEL 31 - KITAB NU TUMPU ALLA LELE MA'IMAI'

I Saul tiba anaknyo anu toto momo'ane sinilakamo

¹ Tempo'nyo aitu hau-haunyomo aha mian nu Filistin nahampatemo nongewa mian nu Israel i bungkutnyo nu Gilboa. Manjoo' hondo na aha mian nu Israel sinilaka ikiijo', lantas i Saul ka' mule' anaknyo anu to momo'ane, nopalaimo.

² Panyo aha iloloi'mo nu mian Filistin ka' aha totolu' na anak to momo'ane i Saul pinateanmo; aijo'mo i Yonatan, i Abinadab tiba i Malkisua.

³ Anu talalomo hondo pinoko idek nu sampo bali' aijo'mo sasu hi Saul, sahingga ia binelaonmo kinona nu pana' nu sampo bali' ka' memang tinadokmo hondo.

⁴ Lantas pinoto'inyomo hi olitau nau lewa' momboakon toongonnyo, “Keat na bajak nu beleyum ka' tabas mae na aku, da aku boli nu kabisa'i ka' nu patei nu mian haha aijo' anu madi' monsumbu' Tumpu.” Panyo olitau aijo' madi' mongka'oho' nontabas, kalana talalo hondo nu adati. Kalana aijo' i Saul nongalamo posi bajaknyo ka' pinota'annyo ka'ihampabakonnyomo na butongnyo nokiijo' i bajaknyo.

⁵ Salatan tinoa nu olitau aijo' taalu' i Saul sinilakamo ia mule' suele nompo ta'anmo bajaknyo ka' nohampabakonmo butongnyo i posi bajaknyo aijo lantas sinilakamo i sohipi' i Saul.

⁶ Sumo aijo' na i Saul tiba aha totolu' na anaknyo anu toto momo'ane tiba iwi-iwi' na suludadunyo tiba olitau aijo' sinilaka i sinaamo ai-aitu.

⁷ Salatan aha mian nu Israel haha aijo' anu jojoong i santoa nu Bangka'nyo Yizreel tiba anu i sasu kabete'an Kaunyo nu Yordan nohongomo taalu' suludadu nu Israel nopalaimo ka' taalu i Saul tiba to ana-anaknyo anu toto momo'ane sinilakamo, aha nopalaimo nompala'imo kota' nu aha haha aijo'. Lantas jinojoonganmo nu aha mian Filistin na kota' haha aijo'.

⁸ Dodododopnyo aha mian nu Filistin nambamo nontoa pa' ko anu opahuhuakon hi mian anu sinilakamo haha kiijo', ihumpak nu aha na bangke' i Saul tiba aha totolu' na anaknyo anu to momo'ane sinilakamo i bungkutnyo nu Gilboa.

⁹ Pinolo nu aha na ubaknyo i Saul ka' ingala nu aha na baju'nyo anu pinusoknyo nahampate lantas aha mian nu Filistin nonsaimo mian da mamba hi lipu' nu aha Filistin songko-songko mompoto'i lele ma'ima' aijo' hi aha mian da isan ka' hi pilogot nu aha.

¹⁰ Lapas aijo' baju' anu pinusok i Saul nahampate pino una'mo i kuil tampat kajojoongan nu pilogot boune Asytoret ka' bangke'nyo pinopaku'mo i pagan mesen nu kota Bet-Sean.

¹¹ Panyo mian anu jojoong i Yabesh anu kiijo' mae i Gilead nohongomo apaa na anu binaumo nu aha mian Filistin hi Saul,

¹² lantas to mia-mian anu to babaani nambamo lengkat ikiijo' sinampahu i jalan namba i Bet-Sean. Tinau'akon nu aha na bangke' i Saul tiba bangke' nu to ana-anaknyo anu to momo'ane aijo' i pagan mesen nu kota' ka' binoa nu aha i Yabesh ka' pinapuan nu aha.

¹³ Iwi-iwi' na bukunyo pinolimu' nu aha ka' ilamun nu aha ipatuu nu kau' tamariska anu kiijo' i kota' aijo', lapas aijo' aha binapuasa'mo pinitunsinaa na kinopinnyo.