1 SAMUEL 3 - KITAB NU TUMPU ALLA LELE MA'IMAI'

Tumpu nanintoamo hi Samuel

¹ Hau-haunyo aijo' i Samuel anu daagi anak aijo' nokalajamo apaa na anu nu palentahkon nu Tumpu, i Eli na mongatun ka' mompotiju. Tempo'nyo aijo' madi'mo toho kino palentah ka' apa-apaa na anu otoa lengkat mae hi Tumpu.

² Daagi kinosampahuan i Eli anu langkaimo hondo aijo' ka' ohanimo paha aijo' hau-haunyo hoyo-hoyot, i salipi' anu lewa' kamale'annyo,

³ ka'i Samuel ihoyotmo koko Peti Palajanjian nu Tumpu i uno nu Kemah anu Susi. Tempo'nyo aijo'sinaa ma'isa binete'ka' sulu' daagi tongko-tongko.

⁴ Tumpu nolagamo i Samuel lantas tinaamanmo i Samuel, “Apaa kita Tuumangku!”

⁵ Lapas aijo'ia nopadeka'mo nokiijo' hi Eli ka' notatae, Mosia kita Tuumangku! Kadaka' aku ilagamo? Panyo tinaaman i Eli, “Aku madi'nolaga beleyum, lako po ule' hoyot.” Lantas i Samuel po ule'mo namba i hoyot.

^6-7 Lapas aijo' po ule' mule' ilaga nu Tumpu na i Samuel, panyo madi' nu sumbu' i Samuel na anu nolaga aijo' taalu' Tumpu, kalana ma'isa toho Tumpu notatae hi ia. Kalana aijo' ia nobulamo, lantas nambamo hi Eli ka' nompokilawa, “Apaa kita Tuumangku? Kadaka' ilagamo nu belento Tuumangku?” Na koonyo i Eli, “Aku madi' nolaga beleyum, komiu anaku; lako po ule' hoyot.”

⁸ Kinopintolunnyo na Tumpu nolaga i Samuel; lantas nobulamo na i Samuel ka' nambamo hi Eli ka' notatae, “Apaa kita Tuumangku? Kadaka' ilagamo nu belento Tuumangku?” Tempo'nyo aijo' sinumbu'je i Eli taalu' Tumpu na nolaga anak aijo'.

⁹ Kalana aijo' pinoto'imo i Eli hi Samuel, “Lako'mo po ule' hoyot, ka' de beleyum po ule'mule' olaga taloakon, 'Poto'imo mae Tumpu, posaihon nu belento, aiya mompotombihing'.’ ” Lantas po ule'mo namba na i Samuel ka' ihoyotmo.

¹⁰ Lapas aijo' tinokamo na Tumpu ka' tinuminjo i tampat aijo' ka' po ule'mo nolaga, “Samuel, Samuel!” lantas tinaamanmo i Samuel, “Poto'imo mae Tumpu, posaihon nu belento Tumpu, aiya mompotombihing.”

¹¹ Lantas notataemo na Tumpu hi ia, “Aku mombaumo anu opalias hi aha mian Israel, sahingga toto samian na anu mohongo bingungmo.

¹² Isinaa aijo' Ku baumo iwi-iwi' apaa na anu toho' mo pinoto'ing-Ku da okabuhuk nu aha salaigan i Eli lengkat pe'e i momonanyo sampe uuka aiya imihinyo.

¹³ Pinoto'ing-Kumo hi aha tukoong-Ku aha salaigan saidi' mae Ku hukumje sampe toka sidu-sidutu' kalana to ana-anaknyo nongambangimo Aku. I Eli nonsumbu'mo dosa' nu aha haha aijo' panyo ia madi' montambuha'i aha.

¹⁴ Kalana aijo' Ku sumpa'akonmo na aha salaigan i Eli, saba' dosa' nu aha anu talalomo hondo manjoo' aijo' madi'mo opoko ala o'ampuni nu koloban kabai pa' apaa na anu osombahkon sampe toka sidu-sidutu'.”

¹⁵ Lapas aijo' i Samuel po ule'mo i hoyot, ka' nopatas mae subu-subu ia nobulamo ka' nontuhea'akonmo iwi-iwi' tumban nu Laigan nu Tumpu. Ia mabuhuk na mompoto'i anu tinoanyomo aijo' hi Eli,

¹⁶ panyo i Eli nolagamo ia ka' notatae, “Samuel, anaku.” Tinaaman i Samuel, “Mosiamo kita Tuumangku.”

¹⁷ I Eli nompokilawamo, “Apaa na anu pinoto'imo nu Tumpu hi beleyum? Sisik mae iwi-iwi' hi belengku. De daagi nu pohowini, beleyum nu hukumo nu Tumpu Allah.”

¹⁸ Lantas sinisikmo i Samuel iwi-iwi' apaa na anu ihongonyomo aijo' hi Eli. Madi' ko sa'angu' pe'e na anu pinohowininyo. Lapas aijo' notataemo na i Eli, “Ia aijo' Tumpu bakas da Ia mombau apaa na anu kooNyo aijo' ma'ima'.”

¹⁹ I Samuel kinodaka-daka'nyomo. Tumpu saja'mo nombalakati ia, ka' apa-apaa na nu taloakon i Samuel totu-totu'u jadi.

^20-21 Mokonyo aijo' iwi-iwi' na aha mian Israel anu i songko-songko na lipu' mongakuimo i Samuel nabi nu Tumpu. De motataemo na i Samuel iwi-iwi' na bansa Israel mompotombihingmo. Tumpu daagi saja manintoa kiijo' i Silo, anu momonanyo Ia nanintoamo hi Samuel ka' notataemo hi ia.