1 SAMUEL 28 - KITAB NU TUMPU ALLA LELE MA'IMAI'

¹ Madi' pinin ilapas na aijo' aha mian nu Filistin nogogaumo mambamo montumbuhi aha mian nu Israel, lantas i Akhis notataemo hi Daud, “Tantu nu sumbu'mo nu beleyum na beleyum atina' tiba to sulu-suludadu nu beleyum tionyo ahi' mahampate monsangaja'i mae aku.”

² Tinaaman i Daud, “Tantumo, otoaje nu belento Tomundo' apaa na anu kubau hi belento Tomundo'.” Lantas i Akhis notataemo, “Ma'ima'mo! Beleyum ku hangkatmo da timbali anu saja' monjagai ka' montoa mae aku sidu-sidutu'.”

I Saul nolagamo bolian da montunde' hi tominuat

³ I Samuel sinilakamo ka' ia ihaanganmo nu aha iwi-iwi' mian nu Israel ka' ilamunmo kiijo' i kinajojoongannyo i kota' Rama. U'utu mae i Saul nolaa'mo iwi-iwi' na anu lewa' montahi'i tiba bolian anu lewa' montunde' tominuat da boli jojoong i Israel.

⁴ Sahingga salatan suludadu nu aha Filistin sinihukmo ka' binakemahmo koko kota' Sunem, i Saul suele nomposihukmo aha mian nu Israel ka' binakemahmo i Bungkutnyo nu Gilboa.

⁵ Salatan i Saul nontoamo suludadu nu aha Filistin aijo' ia nabuhukmo hondo.

⁶ Lantas ia nompoitamo pokinde' lengkat hi Tumpu, panyo Tumpu madi' nontaami, mau pa' ingipi kabai maumo nompake Urim ka' Tumim da osumbu' na kahanda' nu Tumpu kabai pa' nu poto'i nu to nabi-nabi.

⁷ Kalana aijo' pinoto'imo i Saul hi to mia-mian anu monjagai ka' montoa ia, “Soba lio mae samian na boune anu tinimbalimo bolian da montunde'akon hi tominuat, aku kahanda' mamba hi ia da momoita pokinde'.” Tinaaman nu aha, “Kiijo' mae i En-Dor daagi ko bolian anu susumo itina'.”

⁸ Lantas i Saul nimbalu-balu'mo susumo mian sangga'at da madi' nusumbu' nu mian. Ka' sinangaluan nu to momo'ane aha ua aha, ia nambamo ka' tinokamo ilaigan nu bolian aijo' pihi-pihi. Sahingga notataemo na i Saul, “Soba laga mae na tominuat nu mian anu ku sanggoje na sanggonyo, ka' poitakon da nu poto'i mae apaa na anu jadi saidi' mae.”

⁹ Boune aijo' nontaami, “Tantu belento Tuan nonsumbu'mo, saba' i Tomundo' Saul nolaa'mo iwi-iwi' na anu lewa' montahi'i ka' bolian anu lewa' montunde' tominuat da bolimo jojoong i Israel. Kadaka' belento Tuan kahanda'mo monsilakai aku sahingga aku opateimo?”

¹⁰ Lantas i Saul binasumpa'mo, tukoonyo, “I uno nu sanggo nu Tumpu anu tumuu', ku janji'akon bi beleyum saba' beleyum madi'ahi' ohukum kalana nombaumo han anu sumo aijo'.”

¹¹ Boune aijo' nompokilawamo, “Tominuat ihe na ku laga da bau pontunde'an apaa na anu nu palalui nu belento Tuan?” Tinaaman i Saul, “Tominuat i Samuel.”

¹² Salatan tinoamo nu boune aijo' na i Samuel, ia noloboo'mo ka' pinoto'inyomo hi Saul, “Kadaka' belento Tuan nongakalimo aku? I Tuanmo ugaat na i Tomundo' Saul!”

¹³ Tinaaman i tomundo', “Boli mabuhuk! Poto'i mae pa apaa na anu tinoamo nu beleyum!” Tinaaman nu boune aijo', “Aku nontoa santuu' nu mian ilubat mae lengkat i tano'.”

¹⁴ Pinokilawamo i Saul, “Mosia na butongnyo?” Tinaamannyo, “Samian na mo'ane anu ilangkai'mo. Ia i lubat mae nompusok juba'.” Sahingga sinumbu'mo i Saul, na santuu' nu mian aijo' taalu' i Samuel ka' tinolodadupumo na ia nongadati.

¹⁵ Lapas aijo' i Samuel notataemo hi Saul, “Kadaka' beleyum nolingkangmo mae aku? Kadaka' beleyum nolaga mule' mae aku?” Tinaaman i Saul, “Aku biningongmo hondo kalana nu tumbuhimo mae nu aha mian Filistin, padahan aiya Tumpu Allah nompala'imo aku. Aku madi'mo mae tinaaman-Nyo kabai pinot'i-Nyo mae hi to nabi-nabi kabai pinoipi-Nyo mae. Kalana aijo' ku kakaase hi belento Tuuma poto'i mae pa' apaa na anu tionyo ahi' kubau.”

¹⁶ Lantas notataemo na i Samuel, “Apaa na gunanyo beleyum daagi molaga mae aku, padahan Tumpu nompala'imo beleyum ka' tinimbalimo sampo bali' nu beleyum?

¹⁷ Binaumo nu Tumpu hi beleyum susumo apaa na anu pinoto'i-Nyomo mae hi belengku. Ingalamo nu Tumpu hi beleyum na kakuasa'an mompalentah Israel ka' binee'-Nyomo hi Daud.

¹⁸ Beleyum madi'mo nontuluti palentah nu Tumpu ka' madi'mo nongka'oho' nompatei aha mian nu Amalek tiba halata' nu aha. Mokonyo aijo' beleyum binaumo nu Tumpu susumo aiya.

¹⁹ Beleyum tiba aha mian nu Israel nu bee'mo nu Tumpu hi aha mian nu Filistin. Dodop beleyum tiba to ana-anak nu beleyum anu to momo'ane sihukmo tiba aku; ka' mule' iwi-iwi' na suludadu nu Israel nu bee'mo nu Tumpu hi mian nu Filistin.”

²⁰ I sinaamo aijo' na i Saul tinombahangkang i tano' susumo anu sinosakmo nu kilat, kalana ia tinolokengkengmo na nohongo potatae i Samuel aijo'. Ka' mule' ia ilundengmo hondo kalana sinansinaa ka' sinampahu na madi'mo nongkaan.

²¹ Bolian aijo' nokiijo'mo nongohani i Saul, tinoanyo na ia biningongmo hondo; kalana aijo' boune aijo' notataemo hi ia, “Kita Tuanku, aku aiya nongkolobanakonmo apaa na anu pinoitamo nu belento Tuan.

²² Jadi tionyo ahi' belento Tuanku montuluti apaa na anu ku poita; mongkaan sangkiding kaanon anu ku bee' hi belento, da belento Tuan moko ala po ule' lumajang pa' moya na kalambanan.”

²³ I Saul madi' nontuluti ka' notatae tukoonyo, ia madi'mo mongka oho' mongkaan. Panyo salatan suele to mia-mian anu ko pangkatnyo sabole-bolemo nongkakaase ia; tinulutannyomo ahi'. Ia tinuminjomo ka' sinumuhangmo i sambale.

²⁴ Nalia-lia' na boune aijo' nongkolot anak nu sapi'nyo anu molo-molompo' hondo lantas nongalamo labu ka' ginalo'nyo binaunyo roti anu madi' ginalo'annyo ragi.

²⁵ Lapas aijo' tinatuakonnyomo na kaanon aijo' hi Saul ka' hi to mia-mian anu ko pangkatnyo lantas kinaanmo nu aha. Noko lapas aijo' nambamo na aha pihi-pihimo aijo'.