1 SAMUEL 27 - KITAB NU TUMPU ALLA LELE MA'IMAI'

I Daud jinojoongmo hi aha mian Filistin

¹ I Daud binapikinmo i uno nu kinyonyoanyo, “Maumo pa' mosiamo, memang i sinaa sangga'at aku tionyo ahi' nu pateimo i Saul. Jadi madi'mo ko jalan sangga'at na ku ala, ola ahi' mopalaimo mamba i lipu' nu aha mian Filistin.”

² Lantas i Daud tiba aha ano atu na suludadunyo nambamo lia-lia' hi Akhis anak i Moah, tomundo' nu kota' Gat.

³ Sahingga jinojoongmo na ia tiba to sulu-suludadunyo i Gat, toto samian tibamo aha salaigan. I Daud nomboa ua'aha na bengkele'nyo aijo'mo i Ahinoam boune anu lengkat mae i Yizreel ka' i Abigail balu i Nabal boune anu lengkat mae i Karmel.

⁴ Salatan ihongomo i Saul na i Daud nopalaimo nambamo i Gat ia madi'mo kinotanga'an mohakop i Daud.

⁵ Lantas pinoitamo i Daud hi Akhis, “De belento Tomundo' sanang hi belengku bee'i mae na aku sa'angu' na kota' ise' anu majo'on lengkat i kota' daka' da bau kajojoonganku sahingga aku posaihon nu belento Tomundo' madi' jojoong i kota' aiya anu kajojoongan nu belento Tomundo'.”

⁶ Lantas binee'anmo i Akhis kota' Ziklag hi Daud, mokonyo aijo' Ziklag ingalamo nu to tomu-tomundo' nu aha Yehuda sampe tempo uuka aiya.

⁷ I Daud jinojoongmo i lipu' nu aha Filistin sinataun ka' ingopat na bitu'on na kinopinnyo.

⁸ Tempo'nyo aitu i Daud tiba to sulu-suludadunyo toto minsan mamba montumbuhi aha mian nu Gesur, mian nu Girzi tiba mian nu Amalek; bansa haha aijo' pininmo na jinojoong i da'erah aijo'. Ia mamba montumbuhi da'erah haha aijo' tinoka-toka i Sur na kinojo'onnyo ka' mule' nokiijo' i Mesir.

⁹ To momo'ane iwi-iwi' nu patei tiba suele to bou-boune ka' mule' mompahuhuakon domba, sapi', keledai, unta, ka' mule' baju'. Lapas mae ia minsusule'mo ka' mangadapmo hi Akhis.

¹⁰ De nupokilawa i Akhis na ia, “Uuka belemiu mamba montumbuhi iya mae?” Saba' nu taami i Daud hi ia tukoonyo, ia mambamo i bahagian salatan Yehuda kabai i da'erah nu aha mian Yerahmeel, kabai mamba i da'erah tampat kajojoongan nu aha mian Keni.

¹¹ Mau ola samian i da'erah haha aijo' anu tinumbuhannyomo madi' ko anu nu potumuu', da boli ko mian i da'erah haha aijo' lewa' mamba mokiijo' i Gat mompoto'i apaa na anu sahondo-hondonyo binau i Daud tiba to sulu-suludadunyo. Sumo aijo' na anu lewa' nu bau i Daud tempo'nyo ia daagi jonojoong i lipu' nu aha mian Filistin.

¹² Panyo i Akhis mompalesaya hondo i Daud ka' ia binapikin i uno nu kinyonyoanyo, “Ia nu ka'ideki hondo nu posi bansanyo, sahingga ia pakisa binaumo posaihonku sidu-sidutu' i uno nu kantumuu'annyo.”