1 SAMUEL 26 - KITAB NU TUMPU ALLA LELE MA'IMAI'

Daud menolak lagi membunuh Saul

¹ Daagi kino sansinaan aha to mia-mian anu lengkat mae i Zif tinokamo mae hi Saul kiijo' i Gibea, ka' nompoto'i hi ia tukoonyo nu aha i Daud kiijo' naninsulukmo i Bungkutnyo nu Hakhila i habe nu padang anu mateges kiijo' i Yehuda.

² Sahingga nalia-lia' na i Saul namba sinangaluan nu to sulu-suludadunyo anu otaha imani kiijo' i Israel aha totolu' na madala na nambamo nokiijo' i padang anu mateges Zif molio i Daud.

³ I Saul binakemahmo isohipi' nu jalan koko Bungkutnyo nu Hakhila aijo'. I Daud anu kiijo' i padang anu mateges nohongomo taalu' i Saul nontuntunimo mae sampe tinoka i padang anu mateges.

⁴ Lantas ia nonsaimo anu mamba mondoyoni sahingga sinumbu'nyomo taalu' i Saul memang kiijo'.

⁵ Nalia-lia' na i Daud namba nokiijo' i binakema'an i Saul, tinokannyo na i Saul hoyo-hoyot koko hi Abner anak i Ner kiijo' i kemahnyo. Kemah i Saul tinotonga'an nu kemah nu aha to sulu-suludadunyo.

⁶ Lapas aijo' pinokilawamo i Daud hi Ahimelekh mian nu aha Het, ka' hi Abisai utus i Yoab (tina nu aha i Zeruya), “Ihe na baani minsoop tiba aku mokiijo' i uno nu kemah i Saul?” Tinaaman i Abisai, “Akumo!”

⁷ Sahingga pihi-pihi aitu i Daud tiba i Abisai nonjolomo nokiijo' i uno nu kemah aijo' ka' nontoamo i Saul i hoyotmo i totonga' nu kemah, talombo'nyo pinotujaknyo i tano' koko ubaknyo. I Abner tiba suludadunyo hoyo-hoyot montikubi i Saul.

⁸ Lantas notataemo na i Abisai hi Daud, “Tumpu Allah nombee'mo sampo bali' nu belento hi belento pihi aiya. Pobee' mae na aku da ku popasokmo na talombo'nyo aitu hi butongnyo lampasan toka-toka i tano', ku pateimo na ia ola minsan na aku monjalo'akon, madi' pilenje pinduan!”

⁹ Panyo notatae na i Daud, “Boli nu poposia na ia! Tumpu mohukum mian anu mombau kalakuan anu ma'idek hi tomundo' anu pinile'anmo nu Tumpu.

¹⁰ I uno nu sanggo nu Tumpu anu tumuu' ku sumpa'akon saba' Tumpuje na mompatei i Saul de ukunnyo tokamo mae kabai de ia matemo i uno nu pahampatean.

¹¹ Kase' boli mae nu pobee' nu Tumpu na aku aiya mompatei tomundo' anu pinile'an-Nyomo! Ola talombo'nyo na o ala ka' pongisian uee lantas kita mambamo.”

¹² Sahingga ingalamo i Daud na talombo'nyo tiba pongisian uee i Saul aijo' anu koko ubak i Saul lantas aha nambamo. Mau pe'e ola samian madi' ko anu nontoa kabai nonsumbu' apaa na anu jinadimo aijo' kabai pe'e ko anu nobula, kalana Tumpu na nompobobogonmo aha.

¹³ Lantas i Daud nambamo i habe' nu bangka'nyo sangga'at ka' tinokamo i bawo nu bungkutnyo, sahingga najo'onmo na ia i kemah i Saul.

¹⁴ Lapas aijo' iloboo'akonmo i Daud nokiijo' hi Abner ka' hi suludadu i Saul, tukoonyo, “Abner! Pa' ihongomo nu beleyum na potataengku?” I Abner suele noloboo'mo nokiijo', “Ihe na beleyum anu lewa' mae moloboo'i itina'?”

¹⁵ Tinaaman i Daud, “Abner, temisa' beleyumo na mian anu baani hondo i Israel? Kadaka' beleyum madi'mo nonjagai tuan nu beleyum, i tomundo'? Sala'je ko mian ninsoop i kemah nu belemiu kahanda' da mompateimo tuan nu belemiu.

¹⁶ Beleyum madi' moko ala mombau apaa na anu pinalentahkonmo, o Abner! I uno nu sanggo nu Tumpu anu tumuu', belemiu iwi-iwi' sahanyo silakamo kalana madi' monjagai tuan nu belemiu tomundo' anu pinile'anmo nu Tumpu. Soba toa! Pa' iyamo na talombo' i tomundo'? Pa' iyamo na pongisian uee anu koko ubaknyo?”

¹⁷ Nusumbu' i Saul na potatae i Daud sahingga pinokilawanyomo, “Daud, beleyum na itina' anaku?” Tinaaman i Daud, “Ii' Tomundo'.”

¹⁸ Lantas ia po ule' mule' notatae “Kadaka' belento Tomundo' daagi sabole-bole mololoi' mae aku? Apaamo na kasala'anku?

¹⁹ O Tomundo' potombihing mae pe'e na potataengku aiya. De belento Tomundo' pinokau nu Tumpu mongewa mae aku yo anu osombahkon na koloban timbali momposabaan kinyonyoa-Nyo da bolimo montambuha'i mae aku. Panyo de anu nompokau belento Tomundo' aijo' manusia, o'amalakon da aha nu kutuki nu Tumpu! Kalana palabuatan nu aha aijo' sahingga aku ilaa'mo da nompala'imo tano' anu nu Tumpu, sahingga nambamo ahi' ilipu' sangga'at sahingga aku nonsombahmo to pilo-pilogot nu aha anu isalipu'an.

²⁰ Boli opojohok na aku silaka i tano' nu aha mian anu i salipu'an majo'on lengkat hi Tumpu. Apaa na gunanyo tomundo' nu Israel toka mae mompatei sa'angu' na kutu susumo aku aiya? Apaa na gunanyo ia pagalamo mololoi' mae aku susumo mian pagalamo mololoi' louyu'?”

²¹ Tinaaman i Saul, “Aku nombaumo kasala'an pinsusule'mo Daud, Anaku! Aku madi'mo daagi mombau anu ma'idek hi beleyum kalana beleyum nohalala'akonmo aku sinampahu na utu. Kalakuanku memang pinonga'mo. Aku totu-totu'u sinala'mo!”

²² Panyo tinaaman i Daud, “Aiyamo na talombo' nu belento Tomundo' saimae samian na suludadu nu belento Tomundo da toka mae mongala.

²³ Tumpu nombalakatimo mian anu tulu-tulutan tiba anu madi' tageo' na kinyonyoanyo. Kalana sinaa aiya Tumpu mombee'mo mae belento Tuanku hi belengku, panyo aku madi' mombau anu ma'idek hi belento Tomundo', tomundo' anu pinile'anmo nu Tumpu.

²⁴ Jadi susuma belento Tomundo' ihalala' akonkumo tumuu' sinaa aiya, sumo aitu mule' de timbali da nu jagai mae nu Tumpu na aku ka' mule' mompopalia mae iwi-iwi' na balaa'!”

²⁵ Lantas i Saul notataemo hi Daud, “Tumpu nombalakatimo beleyum, Anaku! Apaa na anu nu bau nu beleyum nu humpak iwi-iwi' na hasinnyo!” Lantas i Daud nambamo ka' i Saul suele ninsusule'mo i laigannyo.