1 SAMUEL 25 - KITAB NU TUMPU ALLA LELE MA'IMAI'

I Samuel sinilakamo

¹ Madi' pinin sinilakamo na i Samuel. Iwi-iwi na mian nu aha Israel sinihukmo ka' nohangimo. Lapas aijo' ilamunmo kiijo' i Rama. Lapas aijo' i Daud nambamo kiijo' mae i padang anu mateges anu kiijo' i Paran.

I Daud tiba i Abigail

^2-3 Kiijo' i kota' Maon daagi ko samian na mo'ane lee' mae i Kaleb sanggonyo i Nabal. Ia daagi ko tano' anu pompotuu'annyo binatang koko kota' Karmel. Ia kaya hondo ka' ko domba 3.000, ka' mee' 1.000. I Abigail na bengkele'nyo, pande ka' mule' handa hondo panyo i Nabal buhingison ka' kalakuannyo ma'idek. Daagi kino sansinaan i Nabal hau-haunyo monggunting bulu nu dombanyo kiijo' i Karmel.

⁴ Salatan i hongomo i Daud na han aijo', tempo'nyo aijo' ia kiijo' mae i padang anu mateges,

⁵ ia nonsaimo mian aha sampulu' na olitau namba i Karmel,

⁶ monsingkaboti i Nabal da mompotoka salando'a i Daud hi ia. Ia nonsai aha mompoto'i sumo uuka hi Nabal, “Salando'angku da mohumpak ka'ima'an na belento ka' mule' belemiu salaigan tiba iwi-iwi' apaa na anu nu belento.

⁷ Aku nohongomo belento nongguntingmo bulu nu domba nu belento. Da osumbu' nu belento saba' to pola-polaya' nu belento anu aiya mae i da'erah mami, madi' toho' pinoposia mami, ka' sumo uukamo na kinopinnyo na aha kiijo' mae i Karmel madi' toho' ko anu nolapus.

⁸ Soba pokilawa hi aha tantu nu pototu'uje nu aha. Kalana aijo' ku kakaase da suludadungku timbali otalima na toka i laigan nu belento boli opoposia kalana kakona i sinaa daka' aiya na kami tinoka mae aiya. Bee'i mae na to posa-posaihon nu belento aiya ka' suele hi belengku, i Daud, sangalu nu belento anu mompahakona hondo tiba belento, yayamo pa' apaa na anu ohalala'akon mae nu belento.”

⁹ Salatan tinokamo i Karmel suludadu i Daud nompoto'imo potuunon aijo' hi Nabal mosia na koonyo i Daud, lantas tinanda'anmo nu aha.

¹⁰ Panyo tinaaman i Nabal, “I Daud? Ihe na ia? Ihe na itina' anak i Isai? Ma'isa aku toho' nohongo lelenyo. Tempo' uuka manjoo'mo na to posa-posaihon anu mopalai mae mompala'i mo tuannyo mambamo mae ilipu' aiya!

¹¹ Madi' timbali aku mongala roti ka' uee anu ku inum tiba ponoha' anu ku potouka bau bagi nu to mia-mian anu mongguntingakon, lantas aijo' iwi-iwi' ku bee'mo hi mian anu madi' osumbu-sumbu' pa' nolengkat mae iya!”

¹² Sahingga suludadu i Daud aijo' ninsusule'mo hi Daud ka' nompoto'i hi ia apaa na anu tinaloakonmo i Nabal aijo'.

¹³ “Takos na bajak nu belemiu totosamian!” na koonyo nu palentah i Daud. Malia-lia' na to sulu-suludadunyo nontuluti apaa na anu pinalentahkonmo i Daud aijo'. I Daud suele nontakosmo bajaknyo ka' nomboamo suludadunyo kila-kila aha 400 na mian panyo aha 200 na mian jinojoongmo monjagai pakakas nu aha.

¹⁴ Tempo'nyo aijo' pinoto'imo nu samian na posaihon i Nabal hi Abigail bengkele' i Nabal, sumo, uuka, “Belento Bengkele' i tuan nohongomo i Daud, ia nompalentahmo mae pa' aha sangkuka na mian lengkat mae i padang anu mateges nompotoka salando'a hi tuan, panyo ola lewa' kinuon i tuan na aha.

¹⁵ Padahan aha manonong hondo hi kami. Madi' toho' pinoposia nu aha na kami, ka' madi' toho' ko anu nolapus maumo pa' apaa na anu mami tempo'nyo kami nosangalu kiijo' mae i padang anu mateges.

¹⁶ Pihi ka' malom na aha monjagai kami tempo'nyo kami namba nolaya' mee' tiba domba koko hi aha.

¹⁷ Kalana aijo', soba tutugi pe'e na han aijo' ka' tantukan apaa na anu nu bau nu belento Bengkele' i tomundo'. Kalana tokamo mae na balosnyo hi tuanto ka' hi sa'anakannyo iwi-iwi'. Tuanto madi' hondo mompajuli maumo pa' ihe sahingga i tuan madi' opoko ala o endei da basale'!”

¹⁸ Lantas lia-lia' na i Abigail nongala roti ua'atu na angu'annyo ka' ohua' na botutu kilit pinobuke'an nu anggur, olima' na domba anu tinunuanmo, gandum sampulu' ka popitu' na kilogram anu ginolengmo, sa'atu na pumpungan nu anggur anu nahamo, ka' ua'atu na kukis. Iwi-iwi' aijo' pinosake'nyomo i to kele-keledainyo.

¹⁹ Lantas pinoto'inyomo hi to posa-posaihonnyo, “Belemiu na mamba momona; aku imihije mombatuki belemiu.” Panyo ia madi' nompoto'i apa-apaa hi langkai'nyo.

²⁰ I Abigail nonsake'i keledainyo ka' salatan ia tinokamo i sa'angu' na poselean i sohipi' nu bungkutnyo siningkabotmo na ia tiba i Daud ka' to sulu-suludadunyo anu nintudunmo mae ka' suele nambamo i tampat anu bubu' otujui.

²¹ Tempo'nyo aitu i Daud binapikinmo, “Madi' kokaliangannyo na aku monjagaiakon apa-apaa na anu nu mian aijo' i padang anu mateges aijo'! Mau ola sangkiding na anu nu mian aijo' madi' ko anu nolapus; panyo uuka aiya binalosannyo na ka'ima'anku nu ka'idekan!”

²² Sahanyo pateimo mae na aku Tumpu Allah de madi' ku patei iwi-iwi' na to momo'ane anu kiijo' mae ma'isa pe'e bete' na sinaa.

²³ Salatan tinoamo i Abigail na i Daud ia sampamo nintatau' i keledainyo lantas tinolodadupumo i tengke i Daud,

²⁴ ka' notatae hi ia, “O Tuanku potombihing pe'e mae! Bakas kasala'an aijo' akumo na montanggungi!

²⁵ Bolimo kita Tuanku mompopikinakon i Nabal mian anu madi'mo kinokaliangannyo aijo'! Ia mian anu ponga' – pokakanamo susumo alati'nyo nu sanggonyo. Aku madi' nontoa to posa-posaihon anu sinai mae nu belento Tuanku.

²⁶ Ka' uuka aiya o Tuanku, i uno nu sanggo nu Tumpu anu tumuu', aku basumpa' da uka' da mian iwi-iwi' anu monsampo bali' belento Tuanku ka' toto samian na anu ko kahanda' mompatei belento Tuanku pokakanamo susumo uka' i Nabal.

²⁷ Alamo na anu binoangkumo mae aiya obee' hi belento Tuanku ka' hi to sulu-suludadu nu belento Tuanku.

²⁸ Ampuniakon mae na kasala'anku. Nu potimbalije nu Tumpu na belento Tuanku tiba lee' nu belento timbali tomundo' hi aha Israel, kalana belento Tuanku mahampate mo da bau katalasanggoan nu Tumpu; ka' belento Tuanku madi' mombau anu ma'idek sampe toka sidu-sidutu' i uno nu kantumuu'an.

²⁹ De ko samian montumbuhi belento Tuanku ka' monsoba-soba mompatei belento Tuanku saba' belento Tuanku na nu jagai ahi' nu Tumpu Allah susumo halata' anu nu jagai nu tumpunyo. Panyo sampo bali' nu belento Tuanku o alinmo jo'o-jo'on nu Tumpu, salambeta na pongalin jo'o-jo'on.

³⁰ Nu baumo nu Tumpu na anu ma'ima' iwi-iwi' anu jinanji'-Nyomo hi belento Tuanku, ka' madi'mo daagi pin na belento Tuanku nu potimbalimo tomundo' hi aha Israel.

³¹ Tokaje i tempo' aijo' na belento Tuanku tonginau'mo taalu' belento Tuanku madi' ahi' nompatei de madi' kino sababnyo kabai nosi alamo tanga'an sahingga belento Tuanku boli susa' ka' mompele-pele'. Ka' de belento Tuanku nu balakatimo nu Tumpu boli belento Tuanku mongkolilimi mae aku aiya.”

³² Lantas notataemo na i Daud hi ia, “O puji' na Tumpu Allah Israel anu nonsaimo mae beleyum nonsingkaboti aku sinaa aiya!

³³ O puji' na kapandean nu beleyum ka' opuji' suele na beleyum kalana nontewa'mo aku da boli mompatei ka'mosi alamo kaputusan.

³⁴ Tumpu nontewa'mo aku da boli mombau anu ma'idek hi beleyum. Tiba sanggo nu Tumpu, Tumpu Allah nu Israel anu tumuu', de beleyum madi' ampa mae nonsingkaboti aku tantu iwi-iwi' na to posa-posaihon i Nabal i natemo salatan binete'mo na sinaa!”

³⁵ Lapas aijo' i Daud nongalamo apaa na anu binoa mae i Abigail lantas pinoto'inyomo hi ia, “Pinsusule'mo i laigan nu beleyum ka' bolimo bata-bata. Apaa na anu pinoitamo nu beleyum ku bee'je.”

³⁶ Salatan i Abigail ninsusule'mo hi Nabal tinokannyo kinobau-bauonmo anu kada' hondo i laigan nu aha sumomo bau-bauon nu tomundo'. Jadi kalana i Nabal nalangumo ka' talalomo i lame' na ia, sahingga bengkele'nyo ma'isa nompoto'i apa-apaa sampe tinoka dodododopnyo.

³⁷ Dodododopno subu-subu salatan i Nabal madi'mo nalangu, pinoto'imo nu bengkele'nyo hi ia, iwi-iwi' na kalakuan anu ma'idek aijo'. Lantas i Nabal kinonamo nu sakit kiijo' i sulenyo sahingga songko-songko na butongnyo kinapi'mo.

³⁸ Kila-kila sinampulu'an na kinopinnyo, i Nabal po ule' mule' kinona nu sakitnyo anu kiijo' i sulenyo lengkat mae hi Tumpu sahingga ia sinilakamo.

³⁹ Salatan i hongomo i Daud na i Nabal sinilakamo notataemo na ia, “O puji' na Tumpu! Ia nombalosakonmo i Nabal anu saja' mongambangi aku, ka' nontewa'mo posaihon-Nyo aiya da bolimo mombau anu ma'idek. Tumpu nohukumo i Nabal kalana ia saja' mombau anu ma'idek.” Lapas aijo' i Daud nonsaimo mian da mamba hi Abigail mondutakon de timbali da baumo bengkele'nyo.

⁴⁰ Sahingga tinokamo ikiijo' na mian anu sinai i Daud hi boune aijo' kiijo' mae i Karmel ka' pinoto'inyomo hi ia, “Kami pinokau mae i Daud mangadap hi belento Pontina'on, kalana ia ko kahanda' monduta belento Pontina'on da baumo bengkele'nyo.”

⁴¹ I Abigail tinuminjo ka' tinolo dadupumo ka' notatae, “Aku aiya posaihon i Daud, aku sanang na mondudu'i tengke nu to posa-posaihonnyo.”

⁴² Lapas aijo' ia nosadiamo lia-lia'. Ia naninsake'mo i keledainyo ka' sinangaluanmo nu aha olima' na boune to posa-posaihonnyo, ia nambamo ka' nombatukimo anu pinokau mae i Daud, sahingga ia tinimbalimo bengkele' i Daud.

⁴³ Padahan i Daud polo-polo'mo ko bengkele'nyo i Ahinoam anu lengkat mae i Yizreel, ka' uuka mule' i Abigail suele binaumo bengkele'nyo.

⁴⁴ Tempo'nyo aitu i Saul nompo osoakonmo i Mikhal anaknyo boune, u'utu mae boune aijo' bengkele' i Daud pino osoakonnyomo tiba i Palti anak i Lais anu lengkat mae i kota' Galim.