1 SAMUEL 24 - KITAB NU TUMPU ALLA LELE MA'IMAI'

I Daud madi'mo mongka'oho' mompatei i Saul

¹ Lengkat ikiijo' i Daud nambamo i daerah En-Gedi ka' lewa'mo nainsuluk i liang.

² Salatan i Saul ninsusule'mo mae namba nahampate nongewa mian nu aha Filistin ia nohongomo lele i Daud kiijo'mo mae i padang anu mateges koko En-Gedi.

³ Lia-lia' na i Saul nompile'i totolu' na madala na suludadu anu ahi' otaha imani i songko-songko na Israel lantas nambamo nolio i Daud tiba suludadunyo i sasu kabete'an Bungkutnyo nu Batu Mee' nu Kuhat.

⁴ Sahingga tinokamo na i Saul kiijo' koko to pia-piangkuka na pangkun nu domba i sohipi' nu jalan. Kiijo' daagi ko sa'angu' na liang, ka' i Saul ninsoopmo ningkuhat. Padahan i Daud tiba suludadunyo kiijo' i liang aijo' lebe kiijo' mae i unonyo.

⁵ Lantas notataemo na suludadu i Daud hi ia, “Uukamo aiya na tempo' anu ma'ima' hi belento Tuuma! Te misa' Tumpu nompoto'imo hi belento Tuuma sumo uuka, 'Sampo bali' nu belento Ku bee'mo hi beleyum, baumo pa' apaa na anu nu kahanda'i hi ia!’ ” Lapas aijo' jinolomo i Daud nokiijo' hi Saul ka' sinayu'nyo sangkiding na pani'nyo nu juba' i Saul panyo madi' sinumbu'nyo.

⁶ Panyo lapas aijo' tinutugan i Daud ia sinala'mo kalana nombaumo na ia sumo aijo'.

⁷ Ia notataemo hi suludadunyo, “O'amalakon da Tumpu monjagai mae da boli aku mombau anu ma'idek hi tomundo'ku anu pinile'anmo nu Tumpu. Mau ola sangkiding aku madi' timbali mombau anu ma'idek hi ia, kalana ia tomundo' anu pinile'anmo nu Tumpu!”

⁸ Sumo aijo' na i Daud nongindeko' suludadunyo ka' madi' mompobee' aha montumbuhi i Saul. I Saul nambamo nompala'imo liang aijo', lantas nambamo noyaya.

⁹ I Daud suele nosabatmo i liang aijo' ka' noloboo'akon mo aijo' mae ihiku i Saul, “O Tomundo'!”

¹⁰ I Saul nosiloimo no utu i hikunyo, ka' i Daud nonsombahmo salaku nongadati ka' notatae, “Kadaka' belento Tomundo' nohongomo sisik nu mian anu nompoto'i tukoonyo nu aha aku aiya kahanda'mo mompatei belento Tomundo'?

¹¹ Uuka aiya posi belento Tomundo' nonsumbu'mo taalu' kiijo' i unonyo nu bolo' sabenannyo Tumpu nombee'mo belento Tomundo' hi belengku aiya. Aku sinale'anmo nu sala' samian da opateimo na belento Tomundo' panyo aku aiya madi' nontuluti. Tinaamanku tukoongku aku madi' mongka'oho' mombau anu ma'idek hi Tomundo'ku anu pinile'anmo nu Tumpu.

¹² Soba toa na aiya, kita Tuumangku! Toa mae na juba' nu belento Tomundo' sangkoyot aiya totoong hi belengku! Sabenannyo ku poko alamo ku patei na belento Tomundo', panyo aku ola nongkoyot sangkiding na pani' nu juba' nu belento Tomundo'. Jadi aiya nyata'mo saba' aku aiya madi' ko niat ma'idek kabai uesan. Belento Tomundo' lewa' mololoi' aku kahanda' da opateimo na aku maumo aku aiya madi' kosala'nyo mau ola sangkiding hi belento Tomundo'.

¹³ O'amalakon da Tumpuje na momputusi kita aiya ohua' ihe na anu ko sala'nyo! Tumpuje na mombalosakon apa-apaa na anu binaumo nu belento Tomundo' hi belengku aiya, panyo mau mule' mosiamo aku madi' mombau anu ma'idek hi belento Tomundo'.

¹⁴ Belento Tomundo' tantu monsumbu' basa' nu aha mian anu daagi naipuan mae sumo uuka, 'Kalakuan anu ma'idek, anu mombau ola mian anu ma'idek na kalakuannyo'.' Kalana aijo' aku aiya madi' mombau anu ma'idek hi belento Tomundo'.

¹⁵ Soba toa mae na aku aiya anu kahanda'mo nu patei nu tomundo' nu Israel! Soba toa mae na aku aiya anu lewa'mo nu loloi' nu aha! Aku aiya ola sumo sa'angu' na dedeng anu natemo, ola susumo sa'angu' na somoyu.

¹⁶ Tumpuje na timbali mian kopian momputusi belento Tomundo' tiba aku aiya. O'amalakon da Iaje na mongulus palakala aiya, ka' montinjohi mae aku aiya ka' momposalamat mae aku aiya da boli opatei nu belento Tomundo'.”

¹⁷ Noko taloakon na i Daud potataenyo aijo', notataemo na i Saul, “Tebeleyumo atina' na i Daud anakku?” Lantas i humangmo na ia.

¹⁸ Ka' notataemo na ia hi Daud, “Beleyum na totu'u ka' aku na sinala'mo.

¹⁹ Kalakuanku anu ma'idek hi beleyum ola binalosakon nu beleyum nu ka'ima'an. Sinaa uuka aiya pinotoamo nu beleyum na niat ma'ima' hi belengku, kalana beleyum madi' nompatei aku, binee'mo nu Tumpu sabenannyo na aku hi beleyum.

²⁰ Ma'isa toho' kino samian anu singkabotmo tiba sampo bali'nyo ka' ola pinobakasnyo na ia, tumuu'! Jadi o'amalakon da Tumpu mombalakati beleyum kalana nombaumo han anu ma'ima' hi belengku sinaa aiya!

²¹ Uuka aiya sinumbu'kuje taalu' beleyumo na timbali tomundo' nu Israel ka' timbalimo mahoson na Israel ka' mule' kalaja'an nu Israel sabole-bolemo tataap mahoson de beleyumo na mompalentah.

²² Uuka aiya bajanji'mo mae hi belengku da nu sumbu' nu Tumpu na beleyum madi' ahi' mompatei lee'ku ka' madi' ahi' mongkolilimi sanggo nu to utu-utusku!”

²³ Lantas binasumpa'mo na i Daud da sabole-bole ahi' nu bau apaa na anu tinaloakonnyomo aijo'. Lapas aijo' ninsusule'mo na i Saul nambamo i laigannyo, ka' i Daud tiba to sulu-suludadunyo suele ninsusule'mo i tampat pinaninsulukannyo.