1 SAMUEL 22 - KITAB NU TUMPU ALLA LELE MA'IMAI'

To ima-imam pinaha pateanmo

¹ Lapas aijo' i Daud nompala'imo kota Gat ka' nambamo naninsuluk iliang koko kota' Adulam. Salatan ihongomo nu to utu-utusnyo tu'a tiba to utu-utusnyo iwi-iwi' sangga'at taalu' ia kiijo' mo mae, tinokamo mae na aha hi ia.

² Tiba suele to mia-mian anu saja'mo osansala, ka' mian anu ko samaya'nyo anu pagalamo otage, ka' anu madi' sanang hi sangko manusia. Iwi-iwi' nosa'angu'mo hi Daud, ka' i Daudmo na binau polaya' nu aha. Konjoo'nyo nu aha mian anu nosangaja'mo tiba i Daud kila-kila aha 400 na mian.

³ Lengkat iliang aijo' i Daud nambamo i Mizpa kiijo' mae i Moab, ka' nompoto'imo hi tomundo' nu aha lipu' Moab, “De timbali da tuuma tiba tinangku aiya jojoong pe'e hi belento Tuanku, sampe saidi' mae kusumbu' pa' mosia na koonyo nu Tumpu Allah hi belengku.”

⁴ Lapas aijo' tuumanyo tiba tinanyo aijo' binoanyomo hi tomundo' nu aha Moab, ka' aha jinojoongmo kiijo' mae tempo'nyo i Daud daagi saja' lewa' maninsuluk i liang.

⁵ Daagi' kino sansinaan samian na nabi sanggonyo i Gad tinokamo hi Daud ka' nompoto'i, “Bolimo jojoong i liang aiya, lako'mo lia-lia' mamba i daerah nu aha Yehuda.” Lantas nambamo na i Daud ka' ninsoopmo i alas anu kiijo' i Keret.

⁶ Daagi kino sansinaan i Saul hau-haunyo suha-suhang i patu nu kau' tamariska anu aita i bungkutnyo nu Gibea; talombo'nyo tinoongannyo, ka' iwi-iwi' na kapala nu suludadunyo paha-paha tinjo montikubi ia. Salatan ihongonyomo na najojoongan i Daud tiba to sulu-suludadunyo sinumbu'nyomo,

⁷ ia notataemo hi to kapa-kapala nu suludadunyo haha aijo', “Soba potombihing mae belemiu to mia-mian nu Benyamin! Te i Daud aijo' mombee'imo belemiu tano' tiba ale' nu anggur? Te belemiu iwi-iwi' ohangkatmo bau kapala nu suludadunyo?

⁸ Mokonyo aijo' belemiu sinangaja'mo mongewa mae aku, sahingga tiba mau pe'e samian madi' ko anu nompoto'i mae hi belengku mongkona anaku anu naninggalummo hi Daud aijo. Mau pe'e ola samian na anu aiya hi belemiu madi'mo ko anu nonginau' mae butongku kabai nompoto'i mae hi belengku i Daud, ia aijo' suludadungku, panyo uuka aiya hau-haunyomo molio kasampatan da mompateimo mae aku ka' mule' i Yonatan anaku na nombee'i tanga'an hi ia!”

⁹ I Do'eg anu mongkapalai to pola-polaya' nu potuu'on i Saul, suele kiijo' tiba to kapa-kapala nu suludadu i Saul, lantas notataemo na i Do'eg, “Aku nontoamo i Daud nambamo hi Abimelekh anak i Ahitub kiijo' i Nob.

¹⁰ I Ahimelekh nompoitamo pokinde' hi Tumpu pa' apaa na anu tionyo ahi' nu bau i Daud. Ka' mule' i Daud binee'anmo mantu tiba bajak i Goliat, mian nu aha Filistin aijo'.”

¹¹ Lantas pinalentahmo i tomundo' da molaga i Imam Ahimelekh tiba iwi-iwi' na to utu-utusnyo anu binau imam kiijo' i Nob; sahingga nangadapmo na aha hi ia.

¹² Koonyo i Saul hi Ahimelekh, “Potombihing mae belemiu to ana-anak i Ahitub!” Tinaaman nu aha, “Ii na koonyo nu aha hi Tomundo'.”

¹³ I Saul nompokilawamo hi ia, “Kadaka' beleyum nosangaja'mo tiba i Daud mongewamo mae aku? Kadaka' binee'anmo nu beleyum mantu na ia roti tiba bajak ka' mule' beleyum nomoitamo pokinde' hi Tumpu Allah. Jadi ia tempo uuka mongewamo mau aku, me molio kasampatan nu pateimo mae na aku.”

¹⁴ Lantas tinaamanmo i Ahimelekh, “Panyo te ia misa' i Daud kapala nu suludadu nu belento Tomundo' anu mongkapalai suludadu anu talalo hondo tulu-tulutan. Ia monian nu belento Tomundo' ka' anu mongkapalai suludadu, anu monjagai belento Tomundo' ka' anu talalo hondo o angga'i nu mian iwi-iwi' i laigan nu belento Tomundo'.

¹⁵ Memang aku aiya nompoitakonmo pokinde' hi Tumpu Allah kona hi ia, panyo misa'je ola minsan aijo' na aku aiya nombau anu susumo aijo'. Mongkona kasangaja'an mongewa belento Tomundo; boli belento Tomundo' monsangka aku kabai pa' samian na to utu-utusku. Aku madi' hondo-hondo monsumbu' apana palakala itina'!”

¹⁶ Panyo i tomundo' notatae, “Ahimelekh! Beleyum tiba to utu-utus nu beleyum memang silakamo!”

¹⁷ Lantas pinalentahnyomo na to sulu-suludadunyo anu monjagai ia, anu tinjo-tinjo koko hi ia, “Donganmo patei na to ima-imam nu Tumpu haha aijo'! Aha sinangaja' mo tiba i Daud. Sinumbu'mo nu aha saba' i Daud nopalaimo, panyo aha madi' nompoto'i mae hi belengku.” Panyo to sulu-suludadu anu monjagai i tomundo' aijo' madi' nongka oho' nompatei imam haha aijo'.

¹⁸ Kalana aijo' notataemo na i Saul hi Do'eg, “Donganmo lia-lia'! Beleyumo na mompatei aha!” Sahingga nokiijo'mo na i Do'eg ka' pinateannyo na imam haha aijo'. Sinaa aijo' pinateannyo aha ualumpulu' ka' olima' na imam anu kohaknyo mompusok baju' nu imam.

¹⁹ I Saul nompalentahmo mule' da opatei suele na mian iwi-iwi' anu jojoong i Nob, kota nu imam haha aijo'; to momo'ane, to bou-boune, to ana-anak tiba bungamea', ka' suele sapi', keledai, tiba domba iwi-iwi' o ingkoti na nyawanyo.

²⁰ Ola i Abyatar, anak i Ahimelekh na noko ala nopalai. Ia no palai namba hi Daud,

²¹ lantas nompoto'i tukoonyo i Saul nompateimo to ima-imam nu Tumpu.

²² Sahingga notataemo na i Daud hi ia, “Salatan tinoangkumo na i Do'eg kiijo' mae i sinaa aitu, sinumbu' kumo tantu nu kalakmo hi Saul. Jadi to utu-utus nu beleyum anu sinilakamo akumo na montanggung jawapi.

²³ Jojoongmo tiba aku ka' boli mabuhuk. I Saul kahanda'mo mompatei beleyum, ka' mule' suele kahanda'mo ahi' mompatei aku. Jadi madi' ko anu mompoposia beleyum i tampat kajojoonganku aiya.”