1 SAMUEL 21 - KITAB NU TUMPU ALLA LELE MA'IMAI'

I Daud nopalaimo pinala'iannyomo na i Saul

¹ Sahingga nambamo na i Daud hi Imam Ahimelekh kiijo' i Nop. Tinolokengkeng na i Ahimelekh ka' nosabat mae nonsingkaboti i Daud ka' pinokilawanyo hi ia, “Kadaka' belento nambamo mae no uuka ola mae sausa'?”

² Tinaaman i Daud, “Aku binee'anmo sa'angu' na kalaja i tomundo' ka' madi' timbali osisik maumo pa' hihe na kalaja aijo'. Kalana aijo' suludadungku pinalentahngkumo da mamba montanda'i, i sa'angu' na tampat.

³ Panyo tabea' pe'e, aku aiya kahanda' mompokilawa kaanon apaa na anu daagi hi belento Tuumangku! Bee'i mae na aku olima' na batuan nu roti kabai maumo pa' apaa na anu daagi' i uuka.”

⁴ Lantas koonyo nu imam aijo', “Aku madi' ko roti anu biasa okaan i laigan, ola roti anu sinombahkonmo na daagi; belento timbali mongala asan ahi' suludadu nu belento madi' noduhus tiba boune sala-salaje' uuka.”

⁵ Tinaaman i Daud, “Tantumo aha madi' nombau anu ititina'. De kami mombaumo anu opalentahkon, suludadungku mondoso'akonmo hondo aijo' na aha da susi' susumo koonyo nu atulan nu agama, padahan aijo' ola palentah anu bisa saja' obau sansina-sinaa; ka' lebe-lebe mule' de palentah anu maboat susumo anu pinalentahkonmo aiya!”

⁶ Lantas imam aijo' nombee'imo i Daud roti anu sinombahkonmo aijo', kalana anu daagi hi ia olamo roti aijo' anu sinombahkonmo hi Tumpu Allah, ka' madi'mo pino una' i mezbah kalana obolosimo nu roti anu daagi bu'ou. (

⁷ Tempo'nyo aitu kakona kino i Do'eg mian nu aha Edom anu mongkapalai to pola-polaya' nu potuu'on i Saul suele kiijo' sinaa aitu, mombau apaa na anu nu palentahkon nu agama.)

⁸ Lapas aijo' pinokilawamo i Daud hi Ahimelekh, “Pa' belento Tuumangku daagi ko talombo' anu pino una' kabai bajak, anu timbali ku toong? Palentah i tomundo' kiijo' pinotolokengkengnyo mae, sahingga aku namba mae kinosia-sia' hondo mae ka' madi'mo kinotempo' nogogau nongala bajak kabai toongon sangga'at anu bau pahampate.”

⁹ Lantas tinaamanmo i Ahimelekh, “Aku uutu nompo'una' bajak i Goliat, mian nu aha Filistin anu pipinatean nu belento kiijo' i Bangka'nyo nu Ela; bajak uutu kiijo' isambiha' nu baju' nu imam, binalunan nu hude. De nuka'ima'i nu beleyum yo alamo kalana ola uutu na toongon anu bau pahampate.” I Daud notatae, “Bajak itina'atina'mo na bajak anu ma'ima' hondo i songko-songko na lipu', bee'mo mae hi belengku!”

¹⁰ I sinaamo aitu na i Daud nopalai nompala'imo i Saul, lantas tinokamo hi Akhis tomundo' nu kota' Gat.

¹¹ Hi Akhis pinoto'i nu to mia-mian anu kopangkatnyo, tukoonyo nu aha sumo uuka, “Temisa' aiyamo ia, na i Daud tomundo' i lipu' nu aha? Ka' temisa' iamo aiya na anu sinalelean nu to bou-boune tempo'nyo aitu ka' lewa' nonyanyi, 'Koonyo nu aha, i Saul nompateimo momada-madala na sampo bali' panyo i Daud mopulu-pulu' na madala?’ ”

¹² Potatae aijo' nonsaduakonmo pikilan i Daud madi'mo sinanang sahingga ia nabuhukmo hondo hi Tomundo' Akhis.

¹³ Kalana aijo' i ahop nu mian da'isan i Daud nombau-bau sumo anu ulawon. Salatan aha nompisobamo nontoongi ia da boli mamba, ia nombau-bau au'aitu ia pinonga'mo; ia lewa'mo nongkakali tumban nu sabaatan nu kota' ka' binau-baunyomo na ilunyo tinontanyekmo i jangkutnyo.

¹⁴ Lantas i Akhis nompoto'imo to mia-mian anu kopangkatnyo, “Temadi' otoa nu belemiu na mian atina' ulawon? Kadaka' belemiu nomboamo mae mo uuka?

¹⁵ Te' ma'isa manjoo' na mian anu ulawon aiya i da'erangku, sahingga belemiu nompaka boamo mae samian na anu ulawon i laiganku aiya?”