1 SAMUEL 20 - KITAB NU TUMPU ALLA LELE MA'IMAI'

I Yonatan nontulungimo i Daud

¹ Sahingga nalaimo na i Daud nompala'imo Nayot koko Rama ka' nambamo siningkabot i Yonatan, lantas pinokilawanyomo, “Pa' apaa na kasala'anku? Apa na han anu talalo ma'idek anu binaungkumo ka' apaamo na dosa'ku hi tuuma nu beleyum sahingga ia kahando'mo mompatei aku?”

² Tinaaman i Yonatan, “Boli sumo itina'! Tumpuje na monsumbu', beleyum madi' opatei. Tuumangku saja' mompoto'i hi belengku iwi-iwi' na tanga'annyo, mau anu penting kabai mule' anu madi' penting. Jadi madi' ahi' ia mompohowini tanga'annyo aijo' hi belengku. Kalana aijo' apaa na anu tinaloakonmo nu beleyum itina' madi' totu'u!”

³ Tinaaman i Daud, “Tuuma nu beleyum nonsumbu'mo hondo saba' beleyum mongkalibosi hondo aku. Jadi tantu ia madi' mongka'oho' mompoto'i han aijo' hi beleyum da beleyum boli susa' na kinyonyoa. Maumo pa' mosia, Tumpu anu tumuu' na monsumbu' kantumuu'anku aiya totu-totu'u sumomo nggalau' i tuntungnyo nu tanduk!”

⁴ Lantas i Yonatan notataemo, “Maumo pa' apaa na anu nu poita nu beleyum tionyo ku bau.”

⁵ Tinaaman i Daud, “Sumo uuka, dodop Molame'akonmo Bitu'on Bu'ou ka' sabenannyo ahi' aku mongkaanmo hingga-hinggat tiba i tomundo'. Panyo de beleyum mongka'oho' ahi' aku mambamo ka' maninsulukmo i padang sampe toka hipuan malom.

⁶ De tuuma nu beleyum mompokilawa kadaka' aku madi' tinoka, poto'i hi ia, saba' aku nompoitamo siloloa hi beleyum da madi' toka, kalana minsusule'mo i Betlehem, ikiijo' mae to utu-utusku iwi-iwi' mongkolobanakonmo koloban anu saja' obau sataun toka sataun.

⁷ De i tomundo' motatae, 'Ii'mo',' yo aku madi' opoposia, panyo de ia motambuha', aijo' osumbu'mo taalu' ia nontantukanmo mompateimo aku.

⁸ Ku poita da beleyum montulungi mae aku, kalana kita binajanji'mo i ahop nu Tumpu. Panyo de aku ahi' nombaumo kasala'an, yo pateimo mae ahi' na aku, asan boli nu bee' na aku hi tuuma nu beleyum.”

⁹ Tinaaman i Yonatan, “Boli bata-bata! De kusumbu'mo totu-totu'u na tuumangku kahanda'mo mompatei beleyum tantu tionyo ahi' kupoto'imo hi beleyum.”

¹⁰ Lapas aijo' pinokilawamo i Daud, “Ihe na saidi' mae mompoto'i hi belengku de bisuanyo tuuma nu beleyum motambuha'mo na montaami beleyum?”

¹¹ “Imbo' da kita mambamo i padang,” na koonyo i Yonatan. Saba' aha nambamo hingga-hinggat i padang.

¹² Lantas i Yonatan notataemo hi Daud, “O amalakon da Tumpu, Tumpu Allah nu aha mian Israel na timbali sakisinto! Dodop subu-subu kabai hipuan kila-kila sumo uuka aiya, kupagalamo kuselidiki pa' mosia na isi nu kinyonyoa nu tuumangku. De ia ko gau' ma'ima' hi beleyum kupoleleje mae hi beleyum.

¹³ De ia ko kahanda'mo mompatei beleyum maka tionyo ahi' suele kupoto'i hi beleyum da mopalai. O'amalakon da Tumpu mompatei aku de han aijo' madi' kubau. O'amalakon da Tumpu montulungi beleyum susumo ia suele tinulungan-Nyomo!

¹⁴ Ka' de aku daagi tumuu' o'inau na palajanjianto i ahop nu Tumpu ka' ohongo-hongo mae na aku; panyo de madi'mo ko akunyo,

¹⁵ yo potoa mae na kanonongan nu beleyum hi lee'ku sampe toka sidu-sidutu'. Ka' de nupateimo nu Tumpu iwi-iwi' na sampo bali' nu beleyum,

¹⁶ boli olapasakon na palajanjian nu kita ohua'. De olapasakonmo nuhukumo nu Tumpu na beleyum.”

¹⁷ Jadi kinopinduannyo i Yonatan nompoitamo hi Daud da balajanji' mongkalibosi ia, kalana ia nongkalibosimo i Daud susumo posi butongnyo.

¹⁸ Lapas aijo' i Yonatan notataemo hi ia, “Dodop Molame'akonmo Bitu'on Bu'ou. Tantu osumbu'mo na beleyum madi' tinoka kalana kasuhangan nu beleyum madi' ko anu monsuhangi i meja' pongkaanan;

¹⁹ lebe-lebe mule' hipuan! Kalana aijo' lako'mo jojoong ipaninsulukan nu beleyum anu u'utu mae, ka' tandongi ihiku nu tambunan batu ititina'.

²⁰ Hipuan kupana'akonmo mo itina' totolu' na hihis nu pana' i batu susumo au'aitu daagi ko anu pinana'.

²¹ Lantas kupokaumo na posaihonku montoluki hihis haha aijo', ka' de kupoto'i hi ia, 'Ee hihisnyo aijo' ohani hondo aiya mae; lako' mae toluki,' aijo' alati'nyo beleyum madi' opoposia ka' timbalimo mosabat. Aku basumpa' hi sanggo nu Tumpu anu tumuu' saba' beleyum madi' ko balaa' apa-apaa anu montokai mae.

²² Panyo de kupoto'i hi posaihonku 'Ee hihisnyo aijo' mae lebe majo'on,' aijo' alati'nyo Tumpu nonsaimo beleyum da mambamo; jadi lako'mo.

²³ O'amalakon da Tumpu saja' monjagai mae da kita saja' montoongi palajanjian nu kita ohua'.”

²⁴ Sahingga i Daud nambamo nainsuluk i padang. I Lamean Bitu'on Bu'ou aijo' i Tomundo' Saul tinokamo nongkaan.

²⁵ Susumo kabiasa'annyo ia sumuhang koko pimpi; i Yonatan sinumuhang isasu ahopnyo, i Abner sasu aijo' hi Saul, panyo kadela i Daud madi' ko anu nonsuhangi.

²⁶ Panyo i Saul madi' nontaloakon han aijo' i sinaa aitu; kalana ugaat koonyo, “Ihe na monsumbu' ia daagi kino apa-apaanyo, sahingga ia madi' susi' susumo koonyo nu atulan nu agama.”

²⁷ Kino uansinaanyo mule' kakonamo ko uansinaanyomo na Bitu'on Bu'ou, kadela kasuhangan i Daud bei madi' ahi' ko anu monsuhangi, lantas pinokilawamo i Saul hi Yonatan, “Kadaka' nabongi tiba sinaa uuka aiya i Daud madi' tinoka nongkaan?”

²⁸ Tinaaman i Yonatan, “Ia nomoitamo siloloa hi belengku da opobee' pe'e mamba i Betlehem.

²⁹ Pinoto'inyo tukoonyo, 'Pobee' pe'e mae na aku mamba, kalana to utu-utusku daagi mombau bau-bauon koloban kiijo' i Betlehem ka' aku ilaga mae nu to utu-utusku tu'a da mamba. Kalana aijo' de nu pobee' mae da aku mamba pe'e singkabot tiba to utu-utusku.' Mokonyo aijo' ia madi' tinoka nongkaan aiya, kita Tuuma.”

³⁰ Nohongo aijo' i Saul notambuha'mo hondo hi Yonatan ka' notataemo hi ia, “Anak bule! Uukaje ka' sinumbu'ku taalu' beleyum monsangaja'i i Daud ka' mongambangimo butong nu beleyum tiba tina nu beleyum!

³¹ Madi' nusumbu' saba' de i Daud daagi tutuu' beleyum madi' sida ohangkat bau tomundo' ilipu' aiya? Uuka aiya palentah na mian mamba molio ia ka' boa mae mo uuka, kalana ia tionyo ahi' opateimo!”

³² Jadi tinaamanmo i Yonatan, “Kadaka' ia tionyo ahi' opateimo? Apaamo na dosa'nyo?”

³³ Nohongo aijo' binunu'akonnyomo na talombo'nyo nokiijo' hi Yonatan kahanda' mompateimo ia. Jadi sinumbu'mo i Yonatan na tuumanyo taalu' totu-totu'umo ahi' ko kahanda'mo mompatei i Daud.

³⁴ Kalana i Yonatan pinusamo hondo sahingga pinala'iannyomo na meja' pongka-pongkaanan ka' ia madi'mo nongkaan apa-apaa isinaa ko ohua'nyo nu Lamean Bitu'on Bu'ou aijo'. Ia talalomo hondo nonginau' i Daud anu talalomo hondo ingambangan i Saul, tuumanyo.

³⁵ Dodododopnyo i Yonatan nambamo i padang da singkabot tiba i Daud susumo anu sinale'akonmo nu aha hingga-hinggat. Ia nomboa samian na anak mo'ane posaihonnyo.

³⁶ Lantas pinoto'inyomo hi ia. “Donganmo, toluki na hihis haha aijo' anu kunana'akonje.” Hau-haunyo anak aijo' nopadeka'mo, i Yonatan nompana'akonmo sa'angu' na hihisnyo noliu-liu anak aijo'.

³⁷ Salatan anak aijo' tinokamo i tampat pinanabu'annyo nu hihis aijo', i Yonatan noloboo'mo nokiijo'hi ia, “Ee, hihis aijo' daagi lebe majo'on aijo' mae!

³⁸ Palia-lia' sangkiding, boli tongo!” Anak aijo' nontolukmo hihis aijo' ka' po ule'mo ninsusule' hi tuannyo.

³⁹ Ia madi' hondo-hondo monsumbu' alati'nyo nu potatae i Yonatan aijo', ola i Yonatan tiba i Daud na monsumbu'.

⁴⁰ Lapas aijo' binee'mo i Yonatan na pana' aijo' hi anak aijo' ka' sinainyomo na ia da minsusule'mo i kota.

⁴¹ Salatan anak aijo' nambamo, i Daud nosabatmo mae i sambiha' nu tambulan nu batu aijo', lantas nonsombahmo pinintolun. Ia tiba i Yonatan ua-ua aha aijo' ihumangmo hau-haunyo aha nompaha o'okimo. Kasusa'an anu nu oa'i i Daud lebe daka' molingkudui kasusa'an anu nu oa'i i Yonatan.

⁴² Lapas aijo' notataemo na i Yonatan hi Daud, “O'amalakon da Tumpu Allah montulungi beleyum. Tumpu saja' mombee'i kahosonan kita tiba lee'to da saja' montoongi palajanjian nu kita ohua' i ahop nu Tumpu Allah.” Lapas aijo' nambamo na i Daud, ka' i Yonatan suele ninsusule'mo i kota.