1 SAMUEL 2 - KITAB NU TUMPU ALLA LELE MA'IMAI'

Do'a i Hana

¹ Lantas i Hana binalado'amo, ia notatae, “Tumpu nompolame'mo kinyonyoangku; anu binau binauNyo nomposanangmo santu'ku. Sinanangmo na aku mompopo ambang sampo bali'ku, kalana totu-totu'u Tumpu Allah nontulungimo mae aku.

² Madi' koanu susi' susumo Tumpu! Ola Ia na moko ala monjagai mae.

³ Bolimo lewa' motatae anu madi' kokaliangannyo! Bolimo lewa' motatae anu madi' ko patunyo! Kalana Tumpu, aijo'mo Tumpu Allah anu monsumbu' hondo iwi-iwi'; anu momputusi iwi-iwi' apaa na anu nu bau nu mian.

⁴ Pompelet nu mian anu baani nopato'mo, panyo mian anu madi' mahoson nompaka pahosonmo.

⁵ Mian anu u'utu mae mobosu, kalana manjoo' na kaanon, tempo' uuka aiya nongala tambomo, ola kalana da mohumpak anu okaan. Mian anu u'utu mae mo'ohop tempo uuka aiya na osamo kalana nanjoo'mo na anu okaan. Bengkele' anu lengke' tempo uuka aiya sinanangmo na kinyonyoanyo, popitu'mo na anaknyo na i hampe! Panyo bengkele' anu manjoo' na anaknyo, pinala ianmo, pinojohokmo da susa'.

⁶ Tumpu mompatei, ka' mule' Ia mompotumuu' I dunia nu mian anu sinilakamo tinau akon-Nyomo na manusia. Ka' mule' Ia na mohangkat lengkat i kiijo'.

⁷ Daagi ko mian anu pinokasiasiNyomo hondo, daagi mule' ko anu pinotimbaliNyomo da kinayamo. Daagi ko mian anu tinau'akonNyomo daagi mule ko mian anu ihangkatNyomo mata-matangkas.

⁸ I uno nu kasusa'an ihangkatNyomo na mian anu madi' ko apa-apaa, i uno nu kasansala'an pinobebasNyomo na mian anu madi' kokaliangannyo. Aha pinotimbalimo sangalu nu to mia-mian tulunan nu mian daka', ka' binee'anmo pangkat anu o angga'i. Paningkokoan nu dunia, nu Tumpu, ka' aita'i buannyo na pinombauanNyo dunia.

⁹ Mian anu tulu-tulutan madi' ko anu mompoposia, Tumpu na monjagai. Panyo mian anu mombau anu ma'idek opatei iwi-iwi' i uno nu pintung ka' pikat hondo. Posi kahosonan madi' otaha imani, kahosonan nu mian madi' mombee'i ka'untungan mahampate.

¹⁰ Anu monsampobali' Tumpu opatei madi' ko anu tontuha', aha mabuhukmo; aita' mae i langit lumontupmo na gohung-Nyo, Tumpu na momputusi palakala nu dunia songko-songko, Ka' mombee'i kuasa anu talasanggo, hi tomundo' anu pinile'an-Nyomo.”

¹¹ Lantas ninsusule'mo na i Elkana tiba aha salaigan nambamo i Rama, panyo i Samuel anak ai-aijo' na jinojoongmo ahi' i Silo ka' lewa'mo mombau apaa na anu nu palentahkon nu Tumpu i uno nu atulan anu nu pojalan i Imam Eli.

To ana-anak i Eli

¹² To ana-anak i Eli ma'idek hondo na kinyonyoa nu aha. Aha madi' mompajuli Tumpu.

¹³ Ka' salaku imam, apa-apaa na anu nu bau nu aha madi' mompajuli bansa Israel. De daagi ko mian anu monsombahkon koloban, aha anu monsampo kalaja imam momboa mae sobang anu ko kakaitnyo totolu'. Hau-haunyo antoknyo aijo' okuluki,

¹⁴ sobang aijo' nususukakonmo nu aha i uno nu kuhon anu pinongkulukian anantoknyo aijo', lantas maumo pa' apaa na ohela' nu sobang ka' anu nu kaitmo mae aijo' nu alamo hi ia. Iwi-iwi' na mian nu Israel anu toka ikiijo' i Silo monsombahkon koloban nu bau nu aha sumo aijo'.

¹⁵ Aitu pe'e totominsan anu monsampo kalaja aijo' toka mae ma'isa pe'e lompo'nyo oposi po iwi'kahanda'nyo da opotunumo, lantas ia motatae hi mian anu monsombahkon koloban aijo', “Bee'i mae antoknyo anu daagi mata' aijo' hi imam da otunui; ia madi' mongka'oho' mongala antoknyo anu okuluki.”

¹⁶ Demian aijo' montaami, “Lebe ma'ima' kita montuluti atulannyo lompo'nyo pe'e aijo' na opotunu, lapas aijo' timbalije beleyum mongala yayamo anu nu kamilui nu beleyum,” sahingga anu monsampo kalaja aijo' motatae, “Madi' uukamo aiya tionyo ahi nu bee'mo mae, de madi'ku posi alamo.”

¹⁷ Sumo aijo'mo na anak i Eli ua-ua aha aijo' binaladosa'mo hondo imata nu Tumpu, kalana aha madi'mo nongangga'i koloban anu sinombahkonmo hi Tumpu.

I Samuel kiijo' i Silo

¹⁸ Hau-haunyo aijo' i Samuel anu daagi anak aijo' saja'mo nokalaja apaa na anu nu palentahkon nu Tumpu. Ia nompusokmo baju' anu opake mokalaja, lenan na kina'ut susumo baju anu nu pusok nu to ima-imam de aha monsombahmo Tumpu.

¹⁹ Sataun toka sataun tinanyo mongka'uti juba' ise' lantas nu bee'mo hi Samuel de boune aijo' mamba hingga-hinggat tiba langkainyo monsombahkon koloban anu saja' obau sataun toka sataun.

²⁰ Sahingga i Eli nombalakatimo i Elkana tiba bengkele'nyo, ka' ia notatae hi Elkana, “O'amalakon da Tumpu po ule' mule' mombee'i anak hi beleyum lengkat hi bengkele' nu beleyum aiya, da bau pombolosi anak anu binee'mo nu beleyum hi Tumpu.” Lapas aijo' ninsusule'mo na aha i Rama.

²¹ I Hana binalakatanmo nu Tumpu Allah, sahingga nohampeakonmo mule' aha totolu' na anak mo'ane ka' ua aha na anak boune. I Samuel kino daka-daka'nyomo ka' ia saja'mo mombau anu nu palentahkon nu Tumpu.

Eli dan anak-anaknya

²² I Eli ilangki'mo hondo. Ia saja'mo nohongo mian anu mompoto'i kalakuan nu to ana-anaknyo apaa na anu lewa' nu bau nu aha hi aha mian nu Israel. I Eli suele nonsumbu'mo to ana-anaknyo haha aijo' male' tiba to bou-boune anu mokalaja i ahop nu sabatan nu kemah nu Tumpu.

²³ Kalana aijo' ia notataemo hi to ana-anaknyo, “Aku nohongomo mian iwi-iwi' nompoto'i mae kalakuan nu belemiu anu ma'idek aijo'. Kadaka' belemiu nombaumo anu sumo aijo'?

²⁴ Boli daagi mombau sumo aijo', belemiu anakku. Ma'idek hondo apaa na anu lewa' nu sisik nu mian anu pinalesayamo hi Tumpu mongkona belemiu!

²⁵ De mian mombau kasala'an hi sangko manusia Tumpu Allah na montimbangi kasala'annyo; panyo de mian baladosa'mo hi Tumpu, ihe na moko ala montulungi?” Panyo aha madi' mompajuli pokinde' nu tuuma nu aha i Eli, kalana tinantukanmo nu Tumpu na aha opateimo.

²⁶ Panyo anak aijo' i Samuel kino daka-daka'nyomo ka' nompaka kinaima'anmo nu Tumpu ka manusia ka' iwi-iwi' na mian.

Apaa na anu saidi' mae jadi hi Eli tiba aha salaigan

²⁷ Daagi kinosansinaan, tinokamo na nabi samian hi Eli ka' nompoto'i potuunon nu Tumpu hi ia. Ia notatae, tempo'nyo mompolee' mae nu beleyum hi Harun tiba to ana-anaknyo timbalimo posaihon nu tomundo' Mesir, Aku nanintoamo hi Harun.

²⁸ Iwi-iwi' na tulunan nu bansa Israel olamo aha sa'anakan na pinile'an-Ku da timbali imam-Ku, anu mokalaja i mezbah, mompapu kamangian, ka' mompusok baju nu imam de motataemo mae hi belengku. Ka' hi aha, ka' mule' lee' nu aha binee'an-Kumo hak mongala sambagian koloban anu osombahkon anu tinunuanmo i mezbah aijo'.

²⁹ Jadi kadaka' beleyum daagi milu ka' ka oho'mo mongkaan de montoamo koloban haha aijo; anu pinalentahkon-Kumo osombahkon nu bansang-Ku hi belengku? Kadaka' beleyum Eli lebemo mongadati to ana-anak nu beleyum ka' madi'mo mongadati Aku, ka' ola mule' mompojohok aha mompolompo' butong nu aha nu bagian antoknyo anu ma'ima' hondo, apaa na anu nu sombahkon nu bansang-Ku hi belengku?

³⁰ Aku Tumpu Allah nu Israel, naipuan mae binalajanji'mo da belemiu salaigan ka' belemiu sa'angu' na tulunan mombau anu Ku palentahkon timbali imam sampe toka sidu-sidutu'. Panyo uuka aiya madi'mo Ku ka'ima'i na anu sumo aijo'! Kalana anu mongadati Aku suele Ku adati, panyo anu mongambangi Aku suele Ku ambangi.

³¹ Potombihing mae, tokaje na tempo'nyo Ku pateimo iwi-iwi' na to ana-anak olitau anu atina' hi belemiu salaigan ka' hi belemiu sa'angu' na tulunan, sahingga mau pe'e ola samian na mo'ane hi belemiu salaigan madi' ko anu mantan na umun.

³² Beleyum susa' ka' madi' sanang na kinyonyoa montoa iwi-iwi' na balakat anu obee' hi aha mian Israel sangga'at, panyo hi beleyum salaigan matemo iwi-iwi' ma'isa pe'elangkai ka' bengkele'.

³³ Panyo samian anu atina' hi lee' nu belemiu na Ku pobee' tumuu' ka' mombau anu Ku palentahkon salaku imam. Panyo ia saidi mae timbali mapisok ka' tumuu' saja' susa'. Iwi-iwi' na lee' nu beleyum sangga'at opateimo.

³⁴ Salaku tanda saba' iwi-iwi' na anu pinoto'ing-Kumo totu'u saidi mae tionyo ahi' jadi, anak nu beleyum ua aha aijo' i Hofni tiba i Pinehas silaka i uno nu sansinaa.

³⁵ Lapas aijo' Aku mompile'ije imam anu tulu-tulutan hi belengku ka' anu mombau apaa na anu Ku palentahkon hi ia. Ku bee'ije na ia tulunan anu saja mombau kalaja nu imam i ahop nu to tomu-tomundo' anu Ku pile'imo.

³⁶ Batu-batu lee' nu beleyum mae anu daagi tumuu' mambaje hi Imam aijo' momoita doi tiba anu okaan. Ia mongkakaseje, “Pobee' mae na aku montulungi to ima-imam da aku timbali mongkaan mau ola sampunju'.”