1 SAMUEL 19 - KITAB NU TUMPU ALLA LELE MA'IMAI'

I Daud saja'mo nu loloi i Saul

¹ I Saul nompoto'imo hi anaknyo momo'ane i Yonatan ka' hi iwi-iwi' mian anu ko pangkatnyo tukoonyo, i Daud nu pateimo. Panyo i Yonatan mongkalibosi hondo i Daud,

² kalana aijo' i Yonatan nompoto'imo hi Daud tukoonyo, “Tuumangku ko kahanda'mo mompatei beleyum; jadi bala ingati! Dodop subu-subu lambamo paninsuluk i tampat anu madi' opoko ala ohumpak ka' jojoongmo ikiijo'.

³ Aku mambamo ipadang tiba tuumangku ka' detokamo kiijo; kami tuminjomo koko tampat paninsulukan nu beleyum. Lantas aku basale'je tiba ia mosia na tanga'annyo mongkona beleyum, ka' apaa na anu osale'akon aijo' kupoto'ije hi beleyum.”

⁴ Lantas apa-apaa na anu ma'ima' hi Daud sinisikmo i Yonatan hi Saul, tukoonyo, “Papa' boli ko niat ma'idek hi Daud posaihon nu belento Tuuma.

⁵ Ia nombatoni'akonmo nyawanyo tempo'nyo ia kahanda'mo mompatei i Goliat ka' Tumpu nombee'mo ka untungan nahampate anu daka' hondo hi Israel kalana ia. Belento Tuumangku nontoamo apaa na anu jinadimo aijo', ka' belento Tuumangku binilahimo tempo'nyo aitu. Jadi kadaka' uuka aiya belento Tuumangku kahanda'mo mongkabisa'i mian nau madi' kosala'nyo, ka' kahanda'mo mompatei i Daud anu madi' kosala'nyo apa-apaa?”

⁶ Potatae i Yonatan pinangalati'anmo i Saul, ka' ia binasumpa'mo hi Tumpu tukoonyo ia madi'mo mompatei i Daud.

⁷ Lapas aijo' ilagamo i Yonatan na i Daud ka' sinisiknyomo iwi-iwi' apaa na anu binisalakonmo nu aha u'uka. Lapas aijo' binoanyomo na i Daud hi Saul, ka' i Daud po ule'mo nombau apaa na anu nu palentahkon i Saul, susumo u'utu mae.

⁸ Lapas aijo' po ule'mo nahampate tiba aha mian nu Filistin. I Daud nontumbuhimo ka' nompatundu'mo aha iwi-iwi' sahingga aha nopalaimo.

⁹ Gaagi kino sansinaan i Saul hau-haunyo suha-suhang kiijo' i laigannyo totoong na talombo'nyo monti-montik i Saul sinoku'anmo mule' nu roh anu ma'idek anu sinai mae nu Tumpu. Tempo'nyo aitu i Daud hau-haunyo mongkuti' kasapi'nyo.

¹⁰ Lantas i Saul binatanga'mo mombunu'akon talombo'nyo mokiijo' hi Daud anu aijo' koko pimpi'. Panyo pinoko ala pinedas i Daud sahingga talombo' aijo' nanintotonmo i pimpi'. I Daud nopalaimo da madi' opatei na ia.

¹¹ Pihi-pihi aijo' i Saul nonsaimo mian tinopia-piangkuka namba hi laigan i Daud mondoyoni da opateimo daagi subu. Panyo i Mikhal bengkele'nyo nompoto'imo hi ia, “De beleyum madi' mopalai pihi uuka aiya, dodop subu-subu beleyum opateimo.”

¹² Lantas inguluakonmo i Mikhal na i Daud nontulu tolongan ka' nopalaimo na i Daud sahingga madi' pinatean.

¹³ Lapas aijo' i Mikhal nongalamo patong nu pilogot anu kiijo' i laigan nu aha lantas pinomale'nyomo i tampat kahoyotan i Daud. Lantas aijo' i ubaknyo pinotangonannyo tangonan anu bulu nu mee' na binau, ka' mule' sinabutannyomo na patong aijo' nu sabut.

¹⁴ Salatan aha anu pinalentah mae i Saul tinokamo mae da mohakopmo i Daud, notataemo na i Mikhal, “I Daud nasakitmo.”

¹⁵ Panyo aha po ule'mule' pinalentah i Saul namba nokiijo' montoa i Daud da nutoa ahi' nu mata nu aha. Pinalentahnyo sumo uuka; “Boa mae na ia mo uuka, iwi-iwi' tiba tampat kinamale'annyo da ku pateimo.”

¹⁶ Lantas aha anu pinalentahnyo mae aijo' ninsoopmo isalipi' panyo anu tinokannyo ikiijo' i tampat kinamale'annyo ola ahi patong na timpa-timpas ikinamale'annyo ka' tangonan bulu nu mee' na isasu ubaknyo.

¹⁷ Koonyo i Saul hi Mikhal, “Pande hondo na beleyum nongakalimo aku susumo aiya! Sampo bali'ku tinulunganmo nu beleyum da mopalai!” Tinaaman i Mikhal, “Pinopobuhuknyomo na aku nu patei de madi' kutulungi na ia da mopalai.”

¹⁸ Salatan i Daud noko popalaimo, ia nambamo hi laigan i Samuel kiijo' mae i Rama ka'pinoto'inyomo iwi-iwi' apaa na anu binaumo i Saul hi ia. Lapas aijo' i Daud tiba i Samuel hingga-hinggat nambamo i Nayot ka'jinojoongmo kiijo' mae.

¹⁹ Panyo pinoto'imo hi Saul na i Daud kiijo' mae i Nayot koko Rama.

²⁰ Kalana aijo' i Saul nonsaimo tinopia-piangkuka na mian anu mamba mohakop i Daud. Panyo tinokan nu aha sanggombu na to nabi-nabi anu hau-haunyo lewa' monsalelei ka' lewa' molo ais hingga-hinggat, i Samuel na nongatun aha sumo aijo'. Lantas aha anu sinai mae i Saul aijo' kinuasanmo nu Roh nu Tumpu Allah, sahingga aha suele lewa'mo nonsalele ka' lewa'mo nolo ais.

²¹ Salatan lele aijo' tinokamo hi Saul, ia nonsaimo sangga'at mule' ka' aha mule' suele lewa'mo nosalele ka' lewa'mo nolo ais. Kinopintolunnyo i Saul po ule' mule' nonsai ka' sinumo aitu mule' na jinadi hi aha.

²² Kalana aijo' i Saulmo na namba i Rama. Salatan tinokamo ikiijo' i bubung daka-daka' anu kiijo' i Sekhu pinokilawanyomo pa' iya mae na kajojoongan i Samuel tiba i Daud, lantas pinoto'imo nu mian anu jojoong ikiijo' hi ia, tukoonyo, aha kiijo' mae i Nayot.

²³ Jadi ia ilau-laus no kijo', panyo' ia kinuasaan mo nu Roh Allah, sahingga nonsalelei ka' sa' malobo tutus jalan mokijo i Nayot.

²⁴ Salatan tinokamo kiijo' mae, ia nongukatakonmo baju'nyo ka' lewa'mo nonsalele ka' mule' suele lewa'mo nolo ais hi ahop i Samuel lantas tinombahangkangmo i tano' langgo'-langgo' sinansinaa ka' sinampahu. (Aiyamo na pinolengkatan momona nu sisik anu nontaloakon, “Pa' ugaat suele i Saul tinimbali nabi?”)