1 SAMUEL 18 - KITAB NU TUMPU ALLA LELE MA'IMAI'

^1-2 Noko lapas na i Saul tiba i Daud binasale', i Daud ihangkatmo i Saul binee'annyomo pangkat mokalaja hi ia, ka' mulai sinaa aitu ia madi'mo pinobee' ninsusule' ilaigan nu tuumanyo. Anu sinale'akon nu aha aijo' ihongomo i Yonatan anaknyo momo'ane. Ia suele mongka'ima'i i Daud ka' mongkalibosi ia sumomo ia mongkalibosi posi butongnyo.

³ Kalana aijo' i Yonatan binasumpa'mo da mobela'mo tiba i Daud sampe toka sidu-sidutu'.

⁴ Ingukat i Yonatan na juba'nyo ka' binee'nyomo hi Daud, ka' suele baju'nyo anu nu pusok mahampate ka' mule' bajaknyo, pana'nyo tiba pombutu'nyo.

⁵ Anu pinalentahkon i Saul binaumo iwi-iwi' i Daud totu-totu'u. Kalana aijo' i Daud ihangkatmo i Saul binaumo kapala nu suludadu ka' i Daud nu ka'i ma'i nu aha to sulu-suludadu iwi-iwi' ka' mule' to posa-posaihon i Saul.

I Saul madi'mo sinanang na kinyonyoanyo hi Daud

⁶ Salatan i Daud ninsusule'mo mae noko lapas na ia nompatundu' i Goliat mian nu Filistin aijo', hingga-hinggat tiba to sulu-suludadunyo nobalismo mae na aha ninsoop ikota', to bou-boune no sabatmo mae i to kota-kota' nu aha Israel iwi-iwi' nolabot i Tomundo' Saul. Aha nonyanyimo nyanyian anu moko lame ka' nonsaleleimo ka' nohapa'imo gandang, ka' nongkuti'mo kasapi'.

⁷ Hau-haunyo to bou-boune monsalelei, aha nonyanyimo sumo uuka, “I Saul nompateimo momada-madala na sampo bali', panyo i Daud mopulu-pulu' na madala.”

⁸ Nohongo aijo' i Saul notambuha'mo hondo. Kalana tinutugannyo, “I Daud tantu nu sumbu' nu mian nompateimo mopulu-pulu' na madala, panyo aku ola momada-madala. Tantu saidi' mae ia ohangkatmo bau tomundo' nu aha!”

⁹ Lengkat pe'e i sinaa aijo' ia madi'mo sinanang na kinyonyoanyo hi Daud.

¹⁰ Dodododopnyo i Saul kiijo' ilaigannyo hau-haunyo montoongi talombo'nyo, monti-montiik ia sinoku'anmo nu roh anu ma'idek, anu sinai mae nu Tumpu Allah, sahingga ia notomuhukmo susumo mian anu ingulawonmo. Tempo'nyo aitu i Daud hau-haunyo nongkuti'mo kasapi' susumo anu lewa' nu bau.

¹¹ “Kubunu'akonmo na talombo' aiya hi Daud sampe lampasan toka-toka mokiijo' ipimpi'!” Sumo aijo' na koonyo i Saul i uno nu kinyonyoanyo lantas binunu'akonnyomo na talombo' aijo' pininduan hi Daud, panyo pinoko ala pinedas i Daud.

¹² Sinumbu'mo i Saul tukoonyo taalu' i Daud nu jagai nu Tumpu, panyo ia na pinala'ianmo ahi nu Tumpu kalana aijo' kinabuhuknyomo na i Daud.

¹³ Sahingga madi'mo pinojoongnyo na i Daud i hi laigan nu tomundo', ka' ihangkatnyomo binau kapala nu suludadu hi aha mian anu samadala na suludadu. Tiba jalan anu sumo aijo' i Daud saja'mo nompalentah suludadunyo da mamba mahampate.

¹⁴ Ia saja mingkaliangan de mompojalanmo kalajanyo kalana Tumpu na montulungi ia.

¹⁵ Salatan tinoa i Saul taalu' i Daud saja'mo mingkaliangan na anu nu bau nompaka pabuhukmo na i Saul hi Daud.

¹⁶ Panyo aha iwi-iwi' na mian nu Israel tiba Yehuda mongkalibosi hondo i Daud, kalana ia sa'angu' na polaya' anu nanjoo'mo na anu binaunyo.

I Daud no osoamo tiba anak langkoyang i Saul

¹⁷ I Saul binatanga'mo da nu pateimo nu aha mian Filistin na i Daud i uno nu pahampatean da boli ia na mosi patei. Jadi daagi kino sansinaan pinoto'imo i Saul hi Daud, “I Merab anaku lalangkoyang anu tumpenyo ku po osoakonmo tiba beleyum, panyo ku poita da beleyum tionyo ahi' mompotoa kabaanian na mahampate salaku bau pompopo daka' sanggo nu Tumpu.”

¹⁸ Tinaaman i Daud, “Ihemo ahi' na aku aiya ka' suele ihemo ahi' na toutu-utus nu tuumangku anu madi' mingkaliangan hi aha mian nu Israel, sahingga aku aiya timbalimo monian nu belento Tomundo?”

¹⁹ Panyo salatan tinokamo na tempo'nyo, i Merab kahanda'mo opo osoakon tiba i Daud, mamanga ahi' langkoyang aijo' pino osokonnyomo tiba i Adriel anu lengkat mae i Mehola.

²⁰ I Mikhal anak langkoyang i Saul anu sangga'at nongka'ima'imo i Daud. Salatan ihongomo i Saul na aijo' ia suele sinitujumo.

²¹ Binapikin na ia, “Sahanyo ku sale'imo na i Mikhal da mongalamo i Daud, da tiba jalan aijo' i Daud opoko alamo nu patei nu aha mian Filistin.” Jadi pinduanmo na i Saul notatae hi Daud, “Uuka aiya beleyum baumo monianku.”

²² Lantas ia nonsaimo to mia-mian anu ko pangkatnyo da mamba mompoto'i hi Daud, panyo opohowini, sumo uuka “Tomundo' mongkalibosi beleyum ka' sumo aitu mule' na anu ko pangkatnyo iwi-iwi'; jadi uukamo aiya na tempo'nyo beleyum monika'imo anaknyo anu lalangkoyang”.

²³ Panyo salatan pinotokamo nu aha hi Daud na tanga'an susumo aijo' tinaamannyomo, “Konto dengke na timbali monian nu tomundo'? Aku aiya mian anu kasiasi ka' mule' madi' kokaliangannyo!”

²⁴ Aha to mia-mian anu kopangkatnyo nompoto'imo hi Saul mosia na koonyo i Daud aijo'.

²⁵ Lantas sinaimo i Saul na aha da mompoto'i hi Daud sumo uuka, “Anu nu poita i tomundo' salaku sompa'nyo ola 100 na kilit nu kamo anean anu nu aha mian Filistin salaku bau pombalosi sampo bali' i tomundo.” (Sumo aijo' na i Saul nombau tanga'an da i Daud opateimo nu aha mian Filistin.)

^26-27 Aha to mia-mian anu kopangkatnyo mokalaja i Saul nompotokamo potuunon aijo' hi Daud, ka' i Daud nontulutimo apaa na anu sinale'mo i tomundo' aijo'. Kalana aijo' mau ma'isa pe'e tinoka i tempo'nyo ia nambamo tiba to sulu-suludadunyo i daerah nu aha Filistin. Pinateannyo aha 200 na mian nu Filistin lantas ingalanyomo na kilit nu kamo anean nu aha ka binee'nyomo hi Saul iwi-iwi' madi' gina'an mau ola sa'angu'. Lapas aijo' pino osoakon mo i Saul na i Mikhal hi Daud.

²⁸ Sumo aijo' na Saul sininsumbu'je taalu' i Daud nu jagai nu Tumpu ka' suele nu ka'ima'i i Mikhal anak i Saul lalangkoyang.

²⁹ Sahingga pinaka kabuhuknyomo na i Daud ka' saja'mo kina idekannyo, sampe sidu-sidutu' i uno nu kantumuu'annyo.

³⁰ De suludadu nu aha Filistin tokamo mae montumbuhi, i Daud na lebe manjoo' mompatei aha molingkudui to sulu-suludadu i Saul anu matangkas na pangkatnyo sangga'at. Sahingga nompaka talasanggomo na i Daud.