1 SAMUEL 16 - KITAB NU TUMPU ALLA LELE MA'IMAI'

I Daud pinipi'anmo lanya' kalana ohangkatmo bau tomundo'

¹ Madi' pinin lapas aijo' pinoto'imo nu Tumpu hi Samuel, “Tedaagi sangkuka na kopinnyo na beleyum susa' na kinyonyoa kalana monginau' i Saul? Temisa'ia madi'mo ingakuan salaku tomundo' nu aha mian Israel? Uuka aiya ala na lanya' nu zaitun ka' lako'mo i Betlehem, hi mian sanggonyo i Isai kalana sala'samian na anaknyo pinile'an-Kumo da bau tomundo.”

² Panyo tinaaman i Samuel, “Mosia na aku tionyo ahi' mombau? De lele aijo' nu hongo i Saul tantu aku nu pateimo!” Tinaaman nu Tumpu, “Boa sa'angu' na sapi' anu daagi bata'nyo ka' poto'i hi aha mian da'isan saba' beleyum mamba mokiijo' monsombahkon koloban hi Tumpu.

³ Lantas olaga na i Isai da mamba i tampat pongkolobanakonan koloban aijo'. Kupoto'ije apaa na anu tionyo ahi' nu bau nu beleyum. Mian anu Kupotiju' hi beleyum tionyo ahi' nu hangkat ka' obalakati da timbalimo tomundo'.”

⁴ I Samuel nombaumo susumo anu pinoto'imo nu Tumpu. Salatan ia tinokamo i Betlehem, to pola-polaya' kiijo' i kota' kinobanga-bangangmo na nolabot ia, ka' nompokilawa, “Pa' katokaan nu belento Tuuma aiya momboa mae kasalamatan?”

⁵ Tinaaman i Samuel, “Memang totu'u aku toka monsombahkon koloban hi Tumpu. Jadi posusi' pe'e na butong nu belemiu da timbali mamba i tampat pongkolobanakonan koloban aijo'.” I Isai tiba to ana-anaknyo suele pinokaunyo da momposusi' butong nu aha toto samian ka' ilaganyo suele da mamba i tampat pongkolobanakonan koloban aijo'.

⁶ Salatan sinihukmo ka' tinoamo i Samuel na i Eliab anak i Isai tantu koonyo, “Aiyamo na anu pinile'anmo nu Tumpu.”

⁷ Panyo pinoto'i nu Tumpu hi Samuel, “Boli beleyum ola montoa kalana ia olitau ka' butongnyo mule' matangkas, misa' ia na anu Ku kahanda'i. Aku madi' mongangga'i susumo pongangga'i nu manusia. Manusia montoa ola tambongnyo nu butong, panyo aku montoa kinyonyoa.”

⁸ Lapas aijo' i Isai nolagamo i Abinadab, anaknyo lantas pinokaunyomo da mangadab hi Samuel. Panyo i Samuel notatae, “Ia suele madi' pinile'an nu Tumpu.”

⁹ Lantas i Syama pinokaumo i Isai da toka mae, panyo pinoto'i i Samuel, “Ia suele madi' pinile'an nu Tumpu.”

¹⁰ Sumo aijo' na i Isai nompokau anaknyo popi-popitu' namba toto samian nangadap hi Samuel, panyo pinoto'i i Samuel hi ia, “Aha madi' pinile'an nu Tumpu.”

¹¹ Lantas pinokilawamo i Samuel hi ia, “Te ola aiya na anak nu beleyum anu to momo'ane iwi-iwi'?” Tinaaman i Isai, “Daagi samian, anu tatampalui'nyo, panyo ia kiijo' mae molaya' domba.” I Samuel notatae, “soba pokau na mian da molaga mae ia, kalana kita ma'isa timbali mongkaan de ma'isa ia toka mae.”

¹² Lantas pinokaumo i Isai na mian da mamba molaga aijo'. Taalu' ia samian anu olitau hondo ka' mahoson na butongnyo ka' matanyo mule' ma'ima' na otoa. Lantas notataemo na Tumpu hi Samuel, “Aiyamo na ia; hangkatmo ka' balakatimo na ia!”

¹³ Lia-lia' na i Samuel nongala lanya' nu zaitun aijo' ka' nohangkatmo ka' nombalakatimo i Daud, lanya' aijo' na pinipi'akon hi ia i ahop nu to utu-utusnyo tu'a. Tempo'nyo aijo' i Daud kinuasanmo nu Roh nu Tumpu. Sinaa aijo' Roh nu Tumpu saja'mo lewa' nongkuasai ia. Lapas aijo' i Samuel ninsusule'mo namba i Rama.

I Daud jinojoongmo i laigan nu Tomundo' hi Saul

¹⁴ I Saul pinala'ianmo nu Roh nu Tumpu, ka' uuka aiya ia saja'mo nu soku'i nu roh anu ma'idek anu nu sai mae nu Tumpu.

¹⁵ Kalana aijo' to posa-posaihon i Saul notataemo hi ia, “Osumbu' mami roh ma'idek anu nu sai mae nu Tumpu saja'mo monsoku'i belento Tomundo'.

¹⁶ De belento Tomundo' situju, da kami molio samian anu pande na mongkuti' kasapi'. Da saidi' mae de belento Tomundo' nu soku'imo nu roh anu ma'idek, mian aijo' mongkuti'mo kasapi'nyo ka' belento Tomundo' mompo'ule'mo ma'ima' na butong.”

¹⁷ Lantas pinalentahmo i Saul na aha, “Lioi mae samian na anu pande mahaik musik, ka' boa mae na ia mo uuka.”

¹⁸ Nohongo aijo' samian na posaihonnyo notataemo, “I Isai mian anu jojoong i kota' Betlehem ko anak mo'ane samian anu pande na mahaik musik. Ia mian anu baani hondo salaku suludadu anu timbali otaha'imani. Ka' mule' ia mahoson ka' pande na babisala, ka' Tumpu saja' montulungi ia.”

¹⁹ Sahingga i Saul nonsaimo mian namba hi Isai nomboa potuunon sumo uuka, “Sai mae na anak nu belento i Daud anu molaya' domba nu belento haha itina' mangadap hi belengku.”

²⁰ Lapas aijo' i Isai nontoukaimo sa'angu na keledai, lantas pinosake'nyomo na anak nu mee' sa'angu', roti tiba botutu kilit anu ingisianmo buke-buke' nu anggur. Iwi-iwi' aijo' binee'nyo hi Daud da osombahkon hi Saul.

²¹ Sumo aijo' na i Daud tinoka hi Saul ka' tinimbalimo posaihonnyo. Ia nu kalibosi hondo i Saul ka' ihangkatnyomo lewa' momboakon toongonnyo.

²² Lapas aijo' i Saul nompotuunmo hi Isai, “Ku ka'ima'i na i Daud. Pobee' mae na ia da jojoongmo sidu-sidutu' i aiya ka' mombau apaa na anu ku pokauhakon hi ia.”

²³ Mulai pe'e aitu de i Saul nu soku'imo nu roh anu ma'idek aijo' i Daud mongalamo kasapi'nyo ka' nu pahaikakonmo. Lantas po ule'mo nu oa'i i Saul ma'ima'mo na butongnyo, kalana nu pala'imo nu roh anu ma'idek aijo'.