1 SAMUEL 14 - KITAB NU TUMPU ALLA LELE MA'IMAI'

Yonatan sebagai pahlawan

¹ Daagi kino sansinaan, i Yonatan notataemo hi samian na olitau anu nomboakon toongonnyo bau pahampate, “Donganmo da kita mambamo mokiijo' i ponjaga'an nu aha mian Filistin aijo' mae i santoanyo!” Panyo ia madi' nompoita da nu pobee' nu tuumanyo.

² Tempo'nyo aijo' i Saul kiijo' i patu nu kau' dalima anu kiijo' i Migron, madi' majo'on lengkat i Gibea. Mian da'isan anu nombatuki ia kila-kila aha 600 na mian na konjoo'nyo. (

³ Imam anu nomboa baju' nu imam aijo'mo i Ahiya anak i Ahitub, utus ise' i Ikabod anak i Pinehas, ka' i Pinehas anak i Eli, imam nu Tumpu kiijo' i Silo.) Mian da'isan suele madi' monsumbu' i Yonatan taalu' nambamo nompala'i tampat i kiijo'.

⁴ Da ohumpak na ponjaga'an nu aha mian Filistin aijo', i Yonatan tionyo ahi' montului sa'angu' na olotnyo nu bungkutnyo anu poti-potimbiha' daagi ko batu anu minggahanggan, toto sa'angu' Bozes ka' Sene.

⁵ Batu gahanggan anu i sasu Utara mo'ahop mokiijo' i Mikhmas, ka' anu i sasu Selatan mo'ahop mokiijo' i Geba.

⁶ Sahingga notataemo na i Yonatan hi olitau aijo', “Imbo' da olambanintomo mokiijo' i ponjaga'an nu aha mian Filistin anu daagi halipulu aijo'. Ihe na monsumbu' nu tulungi mae nu Tumpu na kita. Kalana Tumpu moko ala mombee'i mae ka untungan mahampate mau da'isan na mian maumo ola sangkiding na mian.”

⁷ Olitau aijo' nontaami, “Maumo pa' apaa na anu okahanda'i obau nu belento Tuan, posaihon nu belento aiya monsitujui.”

⁸ “Ma'ima'mo,” na koonyo i Yonatan. “De motaapmo kita manintoamo hi aha mian nu Filistin haha aijo'.

⁹ De koonyo nu aha hi kita tanda'i ka' otanda'into sampe toka mae na aha hi kita, jadi kita tataapmo saintinjo' kiijo' ka' bolimo motaap.

¹⁰ Panyo de nu laga nu aha na kita mamba hi aha, kita mambamo mokiijo', kalana aijo'mo na tandanyo aha nu bee'mo nu Tumpu hi kita.”

¹¹ Salatan aha ua-ua aha nanintoamo hi aha mian nu Filistin anu kiijo' i ponjaga'an, notataemo mae na aha mian nu Filistin haha aijo', “Soba toa daagi ko aha to mia-mian nu Ibrani anu nosabatmo mae lengkat i bolo' anu pinaninsulukan nu aha!”

¹² Ka' mule' aha nolobo'mo nokiijo' hi Yonatan ka' hi posaihonnyo “Imbo' po uuka mae da opotoa mami na apa-apaa aiya hi belemiu!” Lantas notataemo na i Yonatan hi olitau aijo', “Batuki mae na aku kalana aha binee'mo nu Tumpu hi Israel.”

¹³ Tiba olitau anu nombatuki aijo' i Yonatan dinumadangkangmo nokiijo'. Salatan i Yonatan tinokamo i kiijo' noduale'mo na to mia-mian nu Filistin pinahan tabasakonnyo, ka' aitu mae suele ihikunyo olitau aijo' nompateimo aha.

¹⁴ Aituje momona na i Yonatan nontumbuhi tiba olitau aijo' nompateimo kila-kila aha uampulu' na mian i da'erah anu ko ewanyo sa'angu' na hektar obagi opat sambahagian na kajojoongan nu aha.

¹⁵ Apaa na anu jinadimo aijo' nompotolokengkengmo aha mian nu Filistin anu kiijo' i binakemah'an ka' anu jojoong i tampat anu ola saja' padang. Iwi-iwi' na aha mian nu Filistin tibamo iwi-iwi' na ponjaga'an ka' mule' gombuan iwi-iwi' nu tololang nabuhukmo sadaang tano' ginayu'an ka' pikilan nu aha mule' kinalangkabutmo.

Aha mian nu Filistin i hungku'anmo

¹⁶ Hau-haunyo aijo' suludadu i Saul anu nosa'angu'mo kiijo' i Gibea i daerah nu aha mian nu Benyamin notataemo koonyo aha mian nu Filistin naha popadeka'anmo ka'biningongmo.

¹⁷ Sahingga notataemo na i Saul hi to sulu-suludadunyo, “Soba bilang na to sulu-suludadu ka' otoa pa' ihe na anu imadi'mo.” Binaumo nu aha na palentah aijo' lantas sinumbu'mo nu aha saba' i Yonatan tiba olitau anu nomboa toongonnyo bau pahampate na i madi'anmo.

¹⁸ “Boa mae na baju' nu imam aijo' na koonyo i Saul hi Imam Ahia. (Sinaa aijo' i Ahia nomboamo baju' nu imam i ahop nu aha mian nu Israel.”)

¹⁹ Hau-haunyo i Saul notatae hi imam aijo' aha mian nu Filistin i kiijo' i kemah nu aha nompaka pabuhukmo. Sahingga i Saul notataemo hi imam aijo', “Kita madi'mo ko tempo' mompoita pokinde' hi Tumpu!”

²⁰ Lantas i Saul tiba to mia-mian anu nonsangalui ia nambamo lia-lia' i tampat pahampatean. Ikiijo' mae tinoamo nu aha na mian nu Filistin nosungkehetmo; madi'mo nompahasumbu-sumbu' na aha pa'ihe na opahampateiakon; posi-posi aha nompaha pate-pateimo samian ka' samian.

²¹ Mian nu aha Ibrani anu jojoong i da'erah nu aha mian Filistin ka' naninggalumo tiba suludadu nu aha suele po ule'mo naninggalum hi Saul ka' hi Yonatan.

²² Ka' suele aha to mia-mian nu Israel anu naninsulukmo i to puge-puge'nyo nu Efraim anu nohongomo taalu' mian nu Filistin nalaimo, natigalumo ka' nontumbuhimo babali'i aha mian nu Filistin haha aijo'.

²³ Aha nahampate nontuusakon jalan tinoka-toka noliu-liu Bet-Awen. Tumpu nomposalamatmo Israel sinaa aitu.

Han anu jinadi noko lapas na nahampate

²⁴ I sinaa aijo' aha to mia-mian nu Israel kahomo i lundeng kalana no'ohopmo, kalana i Saul binasumpa'mo sumo uuka, “Mohumpak kutuk na mian de mongkaan maumo pa' apaa, sinaa aiya de ma'isa pe'e ku balosakon na sampo bali'ku.” Kalana aijo' madi'mo kino samian pe'e na nongkaan i sinaa aijo'.

²⁵ Lapas aijo' tinokamo na aha iwi-iwi' i sa'angu' na alas ka' nohumpakmo manjoo' hondo na juu' nu uani',

²⁶ panyo mau pe'e ola samian madi' nongkaan ka' nonginum juu'nyo aijo' kalana mabuhuk dumo nu kona nu kutuk anu tina-tinaloakon i Saul.

²⁷ Panyo i Yonatan madi' nonsumbu' tuumanyo taalu' nompopobuhukmo mian da'isan nu kutuk aijo'; kalana aijo' sinusukakonnyomo na tokonnyo i juu' nu uani' aijo' lantas ingalanyomo ka' inginumnyomo na juu'nyo aijo'. Sinangkinihap na ia, nongoa' imo butongnyo na ima'mo ka' nompaka pahosonmo.

²⁸ Lapas aijo' sala' samian na suludadu haha aijo' notataemo hi ia, “Kami iwi-iwi' madi' mo moko ala mombau apa-apaa kalana no'ohopmo. Panyo tuuma nu belento Tuan nompopobuhukmo kami nu sumpa'nyo, tukoonyo, 'Nukona nu kutuk na mian anu mongkaan sinaa aiya.’ ”

²⁹ Tinaaman i Yonatan, “Talalomo hondo na palentah nu tuumangku aijo' hi bansanto! Soba toa mae na butongku aiya nompaka pa'ima'mo salatan aku nongkaanmo ka' nonginumo juu' nu uani' aijo'.

³⁰ De mian da'isan sinaa aiya opobee' mongkaan kaanon anu pinahuhuakon salatan nompatundu'mo sampo bali' tantu lebe manjoo' na aha mian nu Filistin anu pinateanto!”

³¹ I sinaa aijo' aha mian nu Israel nompatundu'mo mian nu Filistin salatan nahampatemo nontuusakon jalan lengkat mae i Mikhmas tinoka-toka i Ayalon. Panyo i lapas aijo' aha nalawemo hondo.

³² Sahingga aha toto samian nongalamo to langke-langke anu i humpak hi sampo bali', aha nongalamo domba, ka' sapi' lantas kinolotnyomo i tampat aijo' suele, ka' kinaanmo nu aha na antoknyo anu daagi kobaso'nyo.

³³ Lantas pinoto'imo hi Saul sumo uuka, “Kita Tomundo', mian da'isan binaladosa'mo hi Tumpu kalana nongkaanmo antok nu binatang anu daagi' kobaso'nyo.” “Belemiu nambaumo anu madi' nu ka'i ma'i nu Tumpu!” sumo aijo' na iloboo'akon i Saul. “Lingginakon mae na batu mo uuka anu daka'.”

³⁴ Lapas aijo' po ule' mule' notatae na ia hi to mia-mian anu nomboa mae lele aijo', “Lako'mo na belemiu mamba dai-daiti na to mia-mian da'isan ka' pokau mae na aha momboa mae sapi' ka' domba nu aha i aiya da okolot i batu aiya ka' okaan i aiya; da boli aha mongkaan antoknyo susumo aijo' anu daagi kobaso'nyo ka' madi'mo baladosa' hi Tumpu.” Pihi-pihimo aijo' na aha mian da'isan nomboa mae binatang anu pinahuhuakonnyo ka' kinolotnyomo ikiijo'.

³⁵ Lantas pinotinjomo i Saul na mezbah da bau ponsomban Tumpu; aijo'mo na mezbah anu momona binaunyo.

³⁶ Lapas aijo' notataemo na i Saul hi to sulu-suludadunyo, “Imbo' kita mambamo montumbuhi aha sampe toka dodop subu ka' mompatei aha iwi-iwi'.” Tinaaman nu aha. Ma'ima'mo Tomundo' baumo pa' apaa na anu o tutugi nu belento Tomundo' ma'ima'. Panyo i imam notatae, “Imbo' da kita mompoita pe'e pokinde' pa' mosia na koonyo nu Tumpu Allah.”

³⁷ Lantas pinokilawamo i Saul hi Tumpu Allah, “Pa' timbali na aku montumbuhimo aha mian nu Filistin?” Pa' aha obee'mo nu belento hi aha mian nu Israel? Panyo sinaa aijo' madi' tinaaman nu Tumpu Allah.

³⁸ Kalana aijo' notataemo na i Saul hi to pola-polaya' nu aha mian da'isan, “Po uuka mae iwi-iwi' ka' toa pa' apaa na dosa' anu binaumo sinaa uuka.

³⁹ Aku bajanji' tiba sanggo nu Tumpu anu tumuu', anu nombee'imo ka untungan nahampate hi aha mian nu Israel, saba' mian anu kosala'nyo tionyo ahi' ohukum mate, mau mule' ia i Yonatan anaku momo'ane.” Panyo mau pe'e samian madi' ko anu nontaami ia.

⁴⁰ Lantas notataemo na i Saul hi aha iwi-iwi' mian da'isan aha Israel. “Belemiu iwi-iwi' tinjo i sasu aiya mae.” Tinaaman nu aha, “Tionyo ahi' obaumo nu belento Tomundo' pa' apaa na anu otutugi nu belento Tomundo' ma'ima'.”

⁴¹ Lapas aijo' binalado'amo na i Saul, “O Tumpu, Tumpu Allah nu aha Israel, kadaka' sinaa aiya belento madi'mo nontaami mae aku? Tumpu, taami mae na aku, potoa mae na tandanyo hi batu anu susi' haha aiya. De kasala'an aiya hi belengku kabai hi Yonatan taami mae hi batu Urim aiya, panyo de kasala'an aijo' hi aha mian nu Israel anu pinalesayamo hi belento, yo taami mae hi batu Tumim aiya.” Sahingga tinaamanmo nu Tumpu, nompoto'i kona hi Yonatan ka' hi Saul na ko kasala'an sahingga mian da'isan na madi' ahi' kosala'nyo.

⁴² Lantas notataemo na i Saul, “O Tumpu, tantukan mae pa'aku kabai i Yonatan.” Sahingga i Yonatan na inyata' pinosala'nyo.

⁴³ Lantas notataemo na i Saul hi Yonatan, “Apaa na anu binaumo nu beleyum?” Tinaaman i Yonatan, “Aku nongkaanmo ka' nonginumo sangkiding na juu' nu uani' anu ingalangku sinusukku nu puusnyo nu tokonku; bakasmo da aku silakamo.”

⁴⁴ I Saul notataemo hi ia, “Sahanyo aku na ohukum nu Tumpu Allah de beleyum Yonatan na madi' mohumpak hukuman osilakai!”

⁴⁵ Panyo mian da'isan notataemo hi Saul, “Te toho' mule' i Yonatan na mohumpak hukuman osilakai? Yo aitu iamo na nomboa mae ka'untungan nahampate anu daka' aiya? Madi'! Kami bajanji' tiba sanggo nu Tumpu anu tumuu', saba i Yonatan madi' timbali mohudu' na ubaknyo mau pe'e ola sahamba. Kalana ola samata-mata ola Tumpu na nontulungi sahingga ia nohumpakmo ka'untungan na nahampate sinaa aiya.” Sumo aijo' na i Yonatan pinotumuu' nu aha mian da'isan da boli nohumpak hukuman o silakai.

⁴⁶ Lapas aijo' aha mian nu Filistin ninsusule'mo i posi da'erah nu aha kalana i Saul madi'mo nololoi' aha.

Tempo'nyo i Saul nompalentah ka' mongkona aha salaigan

⁴⁷ Salatan i Saul tinimbalimo tomundo' nu aha Israel, ia nahampatemo iyaya mae nongewa iwi-iwi' na sampo bali' nu aha Israel, aijo'mo mian nu aha Amon tiba mian nu aha Edom, to tomu-tomundo' nu aha lipu' Zoba ka' mian nu aha Filistin. Mau iya mae na pahampateannyo ia saja' mohumpak ka untungan na mahampate.

⁴⁸ Ia nahampate binaanimo hondo ka' nompatundu'mo aha mian nu Amalek, ka' nompobebasmo mian nu aha Israel da madi'mo kinuasan nu tololang.

⁴⁹ Anak anu to momo'ane i Saul aijo'mo, i Yonatan, i Yismi tiba i Malkisua. Anaknyo boune anu tumpenyo sanggonyo i Merab, ka' tuenyo sanggonyo i Mikhal.

⁵⁰ Bengkele'nyo sanggonyo i Ahinoam anak i Ahimaas; kapala nu suludadunyo anu matangkas na pangkatnyo aijo' mo i Abner anak i Ner, aijo'mo babo i Saul.

⁵¹ I Kis tuuma i Saul ka' i Ner tuuma i Abner, to ana-anak mae i Abiel.

⁵² Tempo'nyo ia daagi tutuu' saja' hondo nahampate totu-totu'u nongewa mian nu aha Filistin. Mokonyo aijo' de i Saul montoamo mian anu mahoson ka' baani, lia-lia' na nu hangkat da bau suludadunyo.