1 SAMUEL 12 - KITAB NU TUMPU ALLA LELE MA'IMAI'

I Samuel siniloloamo ka' nompokinde'imo

¹ Lantas notataemo na i Samuel hi aha bansa Israel iwi-iwi'. “Pinopo'ii'kumo na anu pinoitamo nu belemiu ka' nohangkatmo samian na anu bau tomundo' nu belemiu.

² Otampu'uni uuka aiya iamo na mompalentah belemiu. Toa mae aku aiya ilangkai'mo ka' inguanonmo. Aku pininmo hondo na nompalentah belemiu – daagi pe'e aku olitau sampe uuka aiya. Anu bau pontoan aijo'mo to ana-anaku anu singkapmo dinaka' aitu.

³ Uuka aiya aku tuminjo i ahop nu belemiu! De aku nombaumo kasala'an, pisala'i na aku i ahop nu Tumpu ka' i ahop nu to tomu-tomundo' anu pinile'an-Nyomo. Pa' toho'mo aku nongala sapi' kabai keledai nu aha mian sangga'at? Pa' toho'mo aku nongakali kabai nonsakisa kabai nongala doi anu pinontamboi da mombau anu ma'idek. Poto'i mae da mau pa' apaa na anu ingalangkumo po ule' ku sule'akon.”

⁴ Mian haha aijo' nontaami, “Imadi', madi' toho' belento Tuuma nongala apa-apaa, kabai nongakali, kabai nonsakisa kami; madi' toho' maumo pa' hihe.”

⁵ Lantas notataemo na i Samuel, “Sinaa uuka aiya Tumpu ka' tomundo' anu pinile'an-Nyomo na timbali sakisi saba' aku memang madi' ko kasala'an maumo ola ise-ise'.” “Memang totu'u Tumpu na bau sakisinto,” tinaaman nu aha.

⁶ Lantas po'ule' mule' notatae na i Samuel, “Tumpu na nompile'imo i Musa tiba i Harun ka' anu nomboamo mae mompole' nu belemiu nosabat lengkat mae i Mesir.

⁷ Uuka aiya boli pe'e mamba. Ku posala' mo na belemiu i ahop nu Tumpu. Soba tutugi na kalibosan nu Tumpu iwi-iwi' anu pinotoa-Nyomo hi belemiu ka' hi mompole' nu belemiu.

⁸ Tempo'nyo i Yakub tiba aha salaigan tinoka i Mesir, ka' aha mian nu Mesir nonsakisamo aha, mompole'nu belemiu nomoitamo tulung hi Tumpu lantas sinaimo nu Tumpu na i Musa tiba i Harun. Ua aha na mian aijo' nomboamo mompole'nu belemiu nosabat lengkat mae i Mesir ka' nontulungimo aha jinojoongmo i lipu' aijo'.

⁹ Panyo imihinyo mae aha nongkolilimimo Tumpu, Tumpu Allah nu aha, mokonyo aijo' pinojohok-Nyomo na aha ilumambanan ka' pinatundu'mo i Sisera, kapala nu suludadu anu matangkas hondo na pangkatnyo kiijo' i Hazor ka' mule' mian nu Filistin tiba tomundo' nu aha Moab.

¹⁰ Lapas aijo' aha binalado'amo hi Tumpu ka' nongakuimo dosa' nu aha; koonyo nu aha, 'Kami binaladosa'mo kalana madi'mo pinalesaya hi belento, o Tumpu ka' nonsombahmo to pato-patong Pilogot Baal tiba Asytoret. Panyo uuka aiya posalamat mae na kami da boli nu poposia nu sampo bali' mami, sahingga kami palesayaje hi belento!'

¹¹ Lapas aijo' Tumpu nonsaimo i Gideon, lapas aijo' i Barak, ka' lapas aijo' mule' i Yefta, ka' imihinyo mae akumo. Kami toto samian nompobebasmo belemiu da boli nu poposia nu sampo bali' nu belemiu sahingga belemiu noko alamo tinumuu' madi'mo ko anu nompoposia.

¹² Panyo salatan belemiu nontoamo taalu' belemiu nu tumbuhimo i Nahas tomundo' nu aha Amon, belemiu madi'mo nongakui Tumpu salaku tomundo' nu belemiu ka' nompoto'imo hi belengku, 'Kami mongka'oho' mo da opalentahmo nu samian na tomundo.'

¹³ Uuka aiya soba toa aiyamo na ia, tomundo' anu pinile'anmo aijo'. Pinoitamo nu belemiu na ia ka' Tumpu nombee'mo hi belemiu.

¹⁴ Higahiakon na belemiu de belemiu mongadatimo Tumpu ka palesayamo hi-Ia, ka' mule' mompotombihingmo ka' mohongo-hongomo palentah-Nyo, apaa mule' de belemiu tiba tomundo' nu belemiu aijo' sabole-bole ahi' tulu-tulutan hi Tumpu Allah nu belemiu.

¹⁵ Panyo sumo aitu mule' de belemiu madi' mohongo-hongo Tumpu ka' mule' monggagakon palentahNyo, memang belemiu tiba tomundo' nu belemiu nu ewamo nu Tumpu.

¹⁶ Uuka aiya potombihing mae! Otoa hondo-hondo na anu talalo okabangangi anu nu bauje nu Tumpu i ahop nu mata nu belemiu.

¹⁷ Kupoitakonje hi Tumpu sahingga maumo uuka tempo'mo nu posinaa, nu tudunakonje nu Tumpu na gohung tiba ujan salaku bau pontaami-Nyo do'angku. Tokaje na tempo'nyo aijo' belemiu sinsumbu'je mosia na kodaka'nyo na dosa' nu belemiu hi Tumpu kalana nompoitamo samian na tomundo.”

¹⁸ Lantas binalado'amo na i Samuel ka' i sinaamo aijo' na Tumpu nontudunakon mae gohung tiba ujan. Iwi-iwi' na bansa aijo' nabuhukmo hi Tumpu ka' hi Samuel.

¹⁹ Lantas notataemo na aha hi Samuel, “Tulungi mae kita Tuuma, do'akon mae na kami aiya hi Tumpu Allah nu belento da kami madi' silaka. Uuka aiya sinumbu'mo mami taalu' kami po'ule'mo nombau dosa susumo dosa' mami naipuan mae kalana nompoitamo samian na tomundo'.”

²⁰ I Samuel po'ule'mo nontaami, “Boli mabuhuk maumo belemiu nombaumo kalakuan anu ma'idek aijo', boli okolilimi na Tumpu, panyo ola ahi sabole-bole otuluti na Ia totu-totu'u nu kinyonyoa miu.

²¹ Boli montuluti to pilo-pilogot anu madi'moko ala montulungi ka' momposalamat belemiu, kalana aha sabenannyo imadi'an.

²² Tumpu binasumpa'mo, tukoonyo, Ia madi' mompala'i belemiu kalana tinantukan-Nyomo da belemiu opotimbalimo mian anu palesayamo hi Ia.

²³ Mongkona butongku ku amalakon da aku boli sampe baladosa' hi Tumpu kalana madi' mondo'akon belemiu, panyo ola ahi' aku suele saja' sabole-bole mombee'i pokinde' hahan anu ma'ima' ka' anu totu'u.

²⁴ O adati na Tumpu ka' otuluti na Ia, ka' ohongo-hongo ka' okinyonyoai ahi' nu belemiu totu-totu'u. Sabole-bole o inau' na hahan anu daka' anu binaumo nu Tumpu hi belemiu.

²⁵ Panyo de belemiu saja'ahi' mombau dosa' yo belemiu tiba tomundo' nu belemiu tantu osilakaimo ahi'.”