1 SAMUEL 10 - KITAB NU TUMPU ALLA LELE MA'IMAI'

¹ Lapas aijo' i Samuel nongalamo boton anu ko isinyo minya-minya' zaitun lantas dinudu'akonnyomo na minya-minya' aijo' hi ubak i Saul ka' ingokannyomo na i Saul ka' notatae, “Tumpu nohangkatmo ka'nombalakatimo beleyum da timbalimo tomundo' hi aha mian Israel anu pinalesayamo hi Ia. Beleyum mompalentahmo mian anu pinalesayamo hi Ia ka' montoamo aha da boli nu kabisa'i nu sampo bali' nu aha. Aiya na timbali tanda saba' beleyum pinile'anmo nu Tumpu, beleyum timbalimo tomundo' hi aha mian anu pinalesayamo hi Ia.

² De beleyum mompala'imo aku sinaa aiya, beleyum singkabotmo tiba ua aha na mo'ane koko piningkubunan i Rahel kiijo' i Zelzah daerah nu aha Benyamin. Nu poto'ije nu aha hi beleyum sumo uuka, Keledai haha itina'anu nu lio nu beleyum ihumpakmo. Tempo uuka tuuma nu beleyum madi'mo bata-bata na lewa' mongianau' binatang haha itina', panyo saja' sabole-bole moleleki pa' apaa na anu tionyo obau da okabot na beleyum.”

³ I Samuel po'ule mule notatae, “Lengkat itina' beleyum lajangmo lau-laus sahingga toka ikau' tampat ponsomban kiijo' i Tabor. Kiijo' mae beleyum singkabotje tiba aha totolu' na to momo'ane anu mamba i Betel monsombahkon koloban hi Tumpu Allah. Samian montaka' totolu' na anak nu mee' ka' samian mule' nomboa tolumbatu na roti, ka' samian mule' nomboa botutu kilit anu ko isinyo anggur.

⁴ Aha monsalando'aije beleyum ka' nu bee'ije nu aha na beleyum uambatu na roti anu tionyo ahi' nu ala nu beleyum.

⁵ Lapas aijo' beleyum tionyo ahi' mambamo ibungkutnyo nu Tumpu Allah kiijo' i Gibea, tampat binakemah'an nu aha mian Filistin. Isabatan pinsoopan mokiijo' i kota', beleyum mojajalanmo tiba aha sanggombu na to nabi-nabi anu nintudunmo mae lengkat i bungkutnyo anu ponsombahkonan koloban. Aha lewa' monsalelei ka' lewa' molo'ais, mongkuti' gambus, mohapa'i gandang, mompuuhi puloit ka' mongkuti' kasapi'.

⁶ Ikiijo' suele beleyum nu kuasaimo nu Roh nu Tumpu sahingga beleyum suele monsaleleimo, ka' suele molo'aismo, tiba aha ikiijo', lantas beleyum mongabali'mo madi'mo susumo mian sangga'at.

⁷ De iwi-iwi' aijo' jadimo, lantas baumo mau mule' pa' apaa na anu nu oa'i nu beleyum ma'ima', kalana Tumpu Allah na monsangalui beleyum.

⁸ Lapas aijo' beleyum tionyo ahai' mambamo i Gilgal ka' otanda'i kiijo' mae pitunsinaa. Tokaje na aku monsombahkon koloban bau pompodame ka' mompoto'i hi beleyum apaa na anu tionyo ahi' nu bau nu beleyum.”

⁹ Salatan i Saul nompala'imo i Samuel, i Saul ingabali'mo nu Tumpu Allah na kinyonyoanyo. Ka' anu pinoto'imo iwi-iwi' i Samuel hi Saul aijo' suele jinadimo i sinaa aijo'.

¹⁰ Salatan i Saul tiba posaihonnyo tinokamo i Gibea aha siningkabotmo tiba sanggombu na to nabi-nabi. Tempo'nyo aijo' i Saul kinuasanmo nu Roh nu Tumpu Allah sahingga ia suele lewa'mo nonsalelei ka' nolo'ais susumo nabi haha aijo'.

¹¹ Mian anu monsumbu' ia u'utu mae, nontoamo kalakuannyo aijo' lantas nompaha lele-lelekimo hi samian ka' samian, “Nosiamo na anak i Kish aijo'? Ugaat i Saul suele tinimbalimo nabi?”

¹² Lantas daagi ko samian anu jojoong ikiijo' nompokilawamo, “Mosia na nabi haha aijo' sangga'at – pa' osumbu' nu belemiu ihe na tuuma nu aha?” Aijo'mo na pinolengkatan momonanyo nu potatae, “Ugaat i Saul suele tinimbalimo nabi?”

¹³ Noko lapas na i Saul lewa' nonsalelei ka' lewa nolo'ais nambamo na ia i mezbah anu kiita i bungkutnyo.

¹⁴ Babo' i Saul nontoamo ia tiba posaihonnyo lantas pinokilawanyomo hi aha, “Lengkat mae iya na belemiu?” Tinaaman i Saul, “Molio keledai anu nolapusmo, ka' salatan madi'mo i humpak mami, kami nambamo hi Samuel.”

¹⁵ “Ka' apaa na anu pinoto'inyomo hi belemiu?” pinokilawa nu babo'nyo.

¹⁶ Tinaaman i Saul, “Pinoto'inyo tukoonyo binatang haha itina' i humpakmo.” Panyo i Saul madi' nonsisik hi babo'nyo na ia i hangkatmo ka' binalakatanmo i Samuel da timbali tomundo'.

Saul dipilih menjadi raja

¹⁷ Lantas i Samuel nolagamo aha mian da'isan Israel da sihuk i Mizpa,

¹⁸ ka' ia notataemo hi aha, “Sumo uuka na anu pinoto'i nu Tumpu, Tumpu Allah nu aha Israel, 'Aku nomboamo mae belemiu nosabat lengkat mae i Mesir ka' nompobebasmo belemiu da boli nu kuasai nu aha mian nu Mesir ka' iwi-iwi' na bansa sangga'at anu nonsansalamo belemiu.

¹⁹ Aku nompobebasmo belemiu da boli sansala ka' mongoa'i kasusa'an, panyo uuka aiya belemiu madi'mo nompajuli Aku, Tumpu Allah nu belemiu, kalana belemiu nompoitamo da Aku montiju' samian anu bau tomundo' nu belemiu. Jadi ma'ima'mo sihukmo mae aiya i ahop-Ku Tumpu Allah nu belemiu iwi-iwi' na tulunan nu bansa gampa mae nu belemiu.’ ”

²⁰ Lantas i Samuel nompokaumo iwi-iwi' na tulunan nu bansa da mo ukamae i ahop lantas tulunan nu bansa Benyamin na kinonanyo salatan nompile'imo aijo'.

²¹ Salatan to au-auan nu tulunan nu bansa Benyamin aijo' pinokaumo nokiijo' i ahop, lantas auan i Matri na kinonanyo salatan nompile'imo. Lapas aijo' nokiijo'mo na to momo'ane anu hi auan i matri, ka' i Saulmo anak i Kish na kinonanyo salatan nompile'imo. Lantas iliomo nu aha na i Saul panyo madi' ko ianyo.

²² Kalana aitu to mia-mian nompokilawamo hi Tumpu, “O Tumpu, ugaat mian utu daagimo ko anu i aiya?” Tinaaman nu Tumpu, “I Saul natisulukmo kaiyong mae i padut i tampat pompo'una'an to paka-pakakas posadiaon.”

²³ Lantas lia-lia' nambamo ingala nu aha na i Saul ikiijo', ka' binoamo mae nu aha i totonga'nyo nu aha mian da'isan. Jadi tinuminjomo na i Saul i totonga' nu aha ka' iamo na anu talalo matangkas hondo; mian sangga'at ola toka i bekoangnyo.

²⁴ Lapas aijo' i Samuel notataemo hi aha mian da'isan, “Aiyamo na mian anu pinile'anmo nu Tumpu, madi' ko anu pokakana aiya hi kita iwi-iwi.” Iwi-iwi' na bansa haha aijo' nolobo'akonmo, “Higahiakon mae na i tomundo'!”

²⁵ Lapas aijo' i Saul nontutuhakonmo hi bansa aijo' mongkona hak ka' anu nu kalaja nu tomundo', lantas tinulisnyomo i sa'angu' na kitab ka' pino'una'mo i tampat Susi'. Lapas aijo' i Samuel nonsaimo bansa aijo' iwi-iwi' da minsusule'mo i laigannyo toto samian.

²⁶ I Saul suele ninsusule'mo ilaigannyo kiijo' mae i Gibea, sinangaluan nu aha to pia-piangkuka na mian anu mahoson ka' baani ka' anu pinokaumo nu Tumpu na kinyonyoa nu aha.

²⁷ Panyo to pia-piangkuka na mian anu ma'idek na kinyonyoanyo notatae, “Te kokaliangannyo mule' na mian aiya hi kita?” Aha madi' mongadati i Saul ka' madi' mombee'i palasen apa-apaa hi ia. Panyo ia mingadi-adi'au' aitu madi' nu sumbu'.