1 SAMUEL 1 - KITAB NU TUMPU ALLA LELE MA'IMAI'

I Elkana tiba aha salaigan kiijo' i Silo

¹ Daagi ko samian na mo'ane sanggonyo i Elkana minsoop tulunan nu bansa Efraim. Ia jojoong i kota Rama i da'erah Efraim anu mabungkut. I Elkana anak i Yeroham, makumpu mae i Elihu. Ia monsoop poto'utusan mae i Tohu, gampanyo mae nu aha tulunan i Zuf.

² I Elkana ko bengkele'nyo ua aha, i Hana tiba i Penina. I Penina kino anak, panyo i Hana i madi'.

³ Sataun toka sataun i Elkana mamba lengkat i Rama da monsombah Tumpu kiijo' i Silo ka' monsombahkon koloban hi Tumpu Anu Daka na kuasanyo. Anu tinimbali imam nu Tumpu kiijo' i Silo aijo'mo i Hofni tiba i Pinehas, aha to ana-anak i Eli.

⁴ De i Elkana monsombahkonmo koloban, i Penina tiba iwi-iwi' na to ana-anaknyo toto samian nu paha bee'i bagi antok nyo nu koloban aijo'.

⁵ Panyo i Hana ola sambagian kalana Tumpu madi' nombee'i anak ia. Mau mule' sumo aijo' i Elkana mongkanonongi hondo i Hana.

⁶ I Hana kinyonyoanyo saja' nusakiti i Penina ka' nu popo ambang, kalana ia lengke' ka' mule' Tumpu madi' nombee'i ia anak.

⁷ Han aijo' saja' opo uli-ulit sataun-toka sataun de aha mambamo i Laigan Ponsomban Tumpu, i Penina saja monsakiti kinyonyoa i Hana. Toto minsan i Hana humangmo ka' madi'mo mongka'oho' mongkaan kalana ia o ambangimo.

⁸ Ka' toto minsan mule'langkai' nu aha i Elkana mompokilawamo, “Kadaka' beleyum madi'mo mongka'oho' mongkaan ka' saja'mo susa'? Temisa' aku na lebe ko angganyo hi beleyum molingkudui sampulu' na anak to momo'ane?”

I Hana ka' i Eli

^9-10 Daagi kinosansinaan noko kaan na aha kiijo' i Laigan nu Tumpu i Silo, i Hana nobungkutmo nompala'imo meja' pongkaanan. Tempo'nyo aitu i Imam Eli suele kiijo' i Laigan nu Tumpu hau-haunyo suha-suhang i kadelanyo koko sabatan. Talalomo hondo nolibos na i Hana ka' binalado'amo hi Tumpu ka' i humangmo hondo totu-totu'u.

¹¹ Lapas aijo' i Hana nonjanji'mo, ia notatae, “O Tumpu Anu Daka'na kuasanyo, toakon mae na posaihon nu belento aiya! Toakon mae na kasusa'anku aiya. Inau'akon mae na aku ka' boli mae okolilimi na aku! De belento Tumpu mombee'i mae hi belengku aiya samian na anak mo'ane, aku mojanji ku bee'je na anak aijo' hi belento Tumpu na kantumuu'annyo sidu-sidutu'. Aku mojanji' mule' da ubaknyo madi' timbali ogunting.”

¹² Pinin hondo na i Hana binalado'a ka' saja'mo pinotoakon i Eli na nganga' nu boune aijo'.

¹³ I Hana binalado'a i unonu kinyonyoanyo jadi ola biwinyo na lewa' maha gimu'an, panyo madi' ko onyi'nyo kahongoan. Kalana aitu ia sinangka i Eli nalangumo.

¹⁴ Sahingga i Eli notataemo hi ia, “Teminsoop i akan na beleyum malangumo i aiya! Bolimo monginum anggur!”

¹⁵ Panyo tinaman i Hana, “Aku madi' malangu, kita Tuumangku, aku madi' hondo-hondo nonginum anggur! Madi'mo ko anu kutaha imani, ka' hau-haunyo aku balado'a aku monsisik kasansala'anku hi Tumpu.

¹⁶ Boli osangka na aku aiya ola boune anu lewa' masala'. Aku balado'a susumo aiya kalana talalomo hondo molibos ka' susa' na kinyonyoangku.”

¹⁷ Lantas notataemo na i Eli, “De sumo itina' pinsusule'mo ma'i-ma'ima'. O'amalakon da Tumpu Allah nu Israel mompopo ii'mo apaa na anu nu poita.”

¹⁸ Tinaaman i Hana, “Kutaha imani da aku ositujui mae nu belento Tuumangku.” Lapas aijo' ia nambamo lantas nongkaanmo; ka' ia madi'mo lewa' sinusa' na kinyonyoanyo.

I Samuel i hampemo ka' binee'mo hi Tumpu

¹⁹ Dodododopnyo i Elkana tiba aha salaigan nobulaamo subu-subu ka' salatan noko sombahmo Tumpu, aha ninsusule'mo i Rama. Sahingga i Elkana noduhusmo tiba i Hana bengkele'nyo aijo' ka' pinopo ii'mo nu Tumpu na do'a i Hana aijo'.

²⁰ Boune aijo' pinoboamo ka' nohampeakonmo anak mo'ane. Sinanggohannyomo i Samuel, “kalana koonyo pinoitangkumo hi Tumpu.”

²¹ Tinokamo na tempo'nyo mule' i Elkana tiba aha salaigan po ule'mo mamba i Silo da monsombahkonmo koloban hi Tumpu susumo anu saja' obau sataun toka sataun. Ka' mule' i Elkana binalajanji'mo da monsombahkon koloban anu memang jinanji'nyomo.

²² Panyo tempo'nyo aijo' i Hana madi'mo nombatuki. Ia notatae hi langkai'nyo, “Tanda'i pe'e da ia madi'mo monsusu, i Samuel ku boaje i Laigan nu Tumpu, ka' ia jojoongmo kiijo' mae sidu-sidutu'.”

²³ Tinaaman i Elkana, “Ma'ima'mo, baumo apaa na anu nu oa'i ma' ima'; jojoongmo i laigan sampe tokaje na tempo'nyo beleyum madi'mo momposusu anak to. Ka' o'amalakon da Tumpu momponyata anu jinanji'mo nu beleyum.” Jadi i Hana jinojoongmo i laigan sahingga tinokamo na tempo'nyo anak aijo' madi'mo nonsusu.

²⁴ Salatan i Samuel madi'mo nonsusu ia binoamo nu tinanyo i Laigan nu Tumpu kiijo' mae i Silo. Tempo'nyo aitu ia daagi ise'hondo. I Hana nomboa suele sa'angu' na sapi' lakinyo anu totolu'mo na taun na umunnyo, gandum sampulu' na kilogram, ka' sa'angu' na botutu kilit na binau anu ingisianmo pinobuke nu anggur.

²⁵ Sapi' aijo' kinolot lantas i Samuel binoamo hi Eli.

²⁶ I Hana notataemo hi Eli, “Ampun kita Tuumangku. Ugaat daagi osumbu' nu belento na aku kita Tuumangku aku tinuminjo' i aiya balado'a hi Tumpu.

²⁷ Anakmo ai-aiya na pinoitangku hi Tumpu. Do'angku pinopii Nyomo mae,

²⁸ kalana aijo' anak aiya ku bee'mo hi Tumpu da timbalimo Ia na tumpunyo sidu-sidutu'.” Lapas aijo' aha nonsombahmo Tumpu.