1 PETRUS 4 - KITAB NU TUMPU ALLA LELE MA'IMAI'

Kantumuu'an anu bu'ou

¹ Kalana i Kristus nongoa'imo kasansala'an salaku butongnyo, belemiu suele tionyo ahi' mompohoson butong nu belemiu nu tanga'an anu sumo aijo'. Kalana mian anu nongoa'imo kasansala'an salaku butong madi'mo mombau dosa'.

² Kalana aijo', saja' ahi' komiu tumuu' i dunia aiya mombatuki pongka'oho' nu Tumpu, ka' misa' mombatuki pongka'oho' nu manusia.

³ Tempo' anu i hikuhakonmo, sampemo na kinopinnyo na belemiu nombaumo anu nuka'ima'i nubau nu to mia-mian anu madi' monsumbu' Tumpu. Komiu tumuu' madi' ma'ima'. Komiu montuluti napisu, lewa' malangu, mompopodaka' bau-bauon, lewa' batawa' ka' monsombah pilogot tiba jalan mombau anu o kahenyui.

⁴ Tempo' uuka mian anu madi' monsumbu' Tumpu, mongkabangangi kalana komiu madi'mo mombatuki tumuu' sumo aha, mombau dosa' madi' ko batasnyo. Mokonyo aijo' aha monjojoa belemiu.

⁵ Panyo aha saidi' mae tionyo mosadia bau pontaami apaa na anu binaumo nu aha hi Tumpu anu sasadiamo momputusi mian tumuu' ka' anu sinilakamo.

⁶ Mokonyo aijo' Lele Ma'ima' binebakonmo suele hi to mia-mian anu sinilakamo. Makisutnyo da aha anu pinutusanmo salaku butongnyo – susumo hannyo iwi-iwi' na mian saidi' mae o putusi – timbali tumuu' salaku rohani mombatuki pongka'oho' nu Tumpu.

Monggunakon anu binee'mo nu Tumpu

⁷ Iwi-iwi na apaa mongahopi ka'ahenannyo, mokonyo aijo' okuasai ahi' na butong miu ka' balajaga-jaga, da belemiu moko ala timbali balado'a.

⁸ Mompaha kali-kalibosi totu-totu'u samian ka' samian, aijo' na lebe molingkudui iwi-iwi' kalana de mompaha kali-kalibosi belemiu suele timbali mompaha ampu-ampuni.

⁹ O talima ahi' na anu sonso' momoita male' i laigan nu belemiu toto samian, boli motusa'.

¹⁰ Belemiu toto samian nohumpakmo taju anu madi' pokakana lengkat mae hi Tumpu. Kalana aijo' salaku mian anu nonggunakonmo ima-ima' apaa na anu binee'mo nu Tumpu, ogunakon ahi' na kahosonan aijo' bau kapalaluan hingga-hinggat.

¹¹ Mian anu mompotokakon lele, tionyo ahi' mompotokakon lele anu lengkat mae hi Tumpu; mian anu mongkalesang kapalaluan nu mian sangga'at, tionyo mongkalesang nu kahosonan anu lengkat mae hi Tumpu, da i uno nu iwi-iwi na han, Tumpu na opopodaka' kalana i Yesus Kristus. Ia na anu ko kuasa ka' patut opopodaka' sampe toka sidu-sidutu'. Amin.

Mongoa'i kasansala'an salaku mian Kristen

¹² To Utu-utus anu okanonongi! Komiu tempo' uuka aiya nongoa'imo hondo kasansala'an kalana hau-haunyomo o'uji'. Panyo boli bangang, au'aitu daagi' ko apa-apaa anu tahahumo pa' apaa na tinimbali hi belemiu.

¹³ Ola ahi' komiu sabenannyo mongoa'i sanang kalana sansalamo hingga-hinggat tiba i Kristus. Sahingga de saidi' mae katalasanggoan i Kristus opotoamo, komiu balame-lame'je.

¹⁴ Komiu mohumpakmo dale' de komiu o jojoa, kalana komiu anu saja' mombatuki i Kristus. Aijo' alati'nyo Roh anu opopodaka', aijo'mo Roh nu Tumpu anu daagi'mo itina' hi belemiu.

¹⁵ Boli ko samian itina' hi komiu mongoa'i kasansala'an kalana ia topo patei, kabai pambuling, kabai anu saja' mombau idek, kabai kalana ia monggalo'i ulusan nu mian sangga'at.

¹⁶ Panyo de komiu mongoa'i kasansala'an kalana komiu mian Kristen, boli ma'ambang kalana han aijo'. Ola ahi' montalima kase hi Tumpu, kalana komiu momboa sanggo i Kristus.

¹⁷ Tinokamo na tempo'nyo Tumpu momputusimo dunia. Ka' mian anu pinalesayamo hi Tumpu na anu o putusi momonanyo. Jadi, de nutampu'unimo nu Tumpu hi kita, mosiamo ahi' na katimbaliannyo saidi' mae tiba to mia-mian anu madi' palesaya i Lele Ma'ima' anu lengkat mae hi Tumpu aijo'?

¹⁸ I uno nu Kitab nu Tumpu tinulismo sumo uuka, “De to mia-mian anu ma'ima' susa'mo na oposalamat, pa' mosiaje na katimbaliannyo tiba to mia-mian anu baladosa' anu madi' monsumbu' Tumpu!”

¹⁹ Kalana aijo', de daagi' ko to mia-mian anu mongoa'i kasansala'an kalana sumo aijo' na nu kahanda'i nu Tumpu, jadi bala usaha ahi' da mian haha aijo' tumuu' i uno nu kahondoan ka' mompalesayakonmo ahi' butong nu aha hi anu Nompotimbalimo aha. Ia saja' mongganapi janji'-Nyo.