1 PETRUS 1 - KITAB NU TUMPU ALLA LELE MA'IMAI'

^1-2 To Utu-utus mian anu pinile'anmo nu Tumpu, anu nobagi-bagimo i tano' nu mian i da'erah Pontus, Galatia, Kapadokia, Asia, ka' Bitinia! Aku, i Petrus, anu tinimbalimo posaihon i Yesus Kristus, mongamanakon bisa-bisa' Tumpu mombee'i balakat ka' ka'ima'an hi belemiu molabi-labi. Komiu pinile'anmo tinimbalimo mian anu pinalesayamo hi Tumpu Allah nompotimbalimo komiu mian anu pinalesayamo ka' susi' da baumo samata-mata anu nu Tumpu, da komiu mohongo-hongo i Yesus Kristus ka' pinobelesi'mo nu baso'-Nyo.

Kataha'imanan anu mahoson

³ Imbo' na kita montalima kase hi Tumpu, Tuuma Tumpunto i Yesus Kristus! Ia talalo mongkalibosi kita, aijo' na pu'unnyo Ia nombee'imo kantumuu'an bu'ou hi kita, aijo'mo i Yesus Kristus sinilaka po'ule'mo pinotumuu'. Aiya mompokeman kita da mahoson na montaha'imani.

⁴ Kita montaha'imani da mohumpak to bala-balakat anu tinoukanmo nu Tumpu bau bagi nu mian anu pinalesayamo hi Ia, aijo'mo to bala-balakat anu pino'una'-Nyomo i suluga', sahingga madi' timbali ma'idek kabai mabusik kabai mule' mongabali'.

⁵ Iwi-iwi' aijo' bau bagi miu, kalana komiu pinalesayamo hi Tumpu. Jadi komiu o jagai nu kuasa nu Tumpu da komiu mohumpak kasalamatan anu oponyata'je toka i tempo'nyo saidi' mae.

⁶ Kalana aijo' oposanang na kinyonyoa miu, kalana tempo' uuka mau mule' ola sasaingoni' na tempo' panyo komiu tionyo susa' kalana saidi' mae komiu mongoa'i ngangahan nu soba'an.

⁷ Anu nupatui aijo'mo kahanda' momponyata' pa' komiu totu-totu'u palesaya hi Tumpu kabai madi'. Mosoni' pe'e anu timbali ma'idek, o uji' nu apu. Jadi, palesaya miu anu totu-totu'u molingkudui oli nu mosoni', jadi tionyo ahi' o uji' suele da timbali mahoson. Ka' tiba jalan sumo aijo' komiu o puji' ka' o angga'i tiba opopodaka' toka i sinaa-Nyo de i Yesus Kristus po'ule'mo toka.

⁸ Komiu mongkalibosi Ia mau mule' naipuan mae komiu madi' nontoa Ia. Ka' komiu pinalesayamo hi Ia mau mule' uuka aiya komiu madi' nontoa Ia. Mokonyo aijo' komiu lame' ka' mongoa'i kasanangan anu daka' ka' anu madi' opoko taloakon.

⁹ Kalana patuju nu iman nu beleyum anu totu-totu'u i humpakmo, atina'mo kasalamatan nu santuu' nu beleyum.

¹⁰ Kasalamatanmo ai-aiya na pinopikilakon ka' sinelidikan nu to nabi-nabi, ka' aha nongkila-kilamo balakat anu nubee' nu Tumpu Allah hi beleyum.

¹¹ Aha monselidiki mosia ka' hipian na han aijo' timbali, apaa na anu kokoonyo nu Roh i Kristus anu kiijo' i butong nu aha. Tempo'nyo aitu Roh-Nyo na nompoto'i hi aha mongkona kasansala'an-kasansala'an anu tionyo nu oa'i i Kristus ka' mongkona katalasanggoan-Nyo anu nutalimaje lapas aijo'.

¹² Hi to nabi-nabi haha aijo' Tumpu nompoto'imo tukoonyo apaa na anu nubau nu aha misa' bau kapentingan nu aha, panyo bau kapentingan nu belemiu; atina'mo hahan anu tempo' uuka aiya i hongomo komiu mana-manasa hi to mia-mian anu nompolelemo Lele Ma'ima' mongkona i Yesus Kristus. Aha nomposumbu' hahan aijo' hi belemiu kalana kuasa nu Roh nu Tumpu anu sinai-Nyo mae lengkat i suluga'. To mala-malaikat pe'e mongkahanda'i suele da monsumbu' lele anu nu polele nu aha aijo'.

Olaga da tumuu' belesi'

¹³ Kalana aitu, tionyo ahi' komiu saja' mosadia. Bajaga-jaga ka' otaha'imani ahi' totu-totu'u na balakat anu obee'je mae hi beleyum de i Yesus Kristus po'ule'mo toka saidi' mae.

¹⁴ Otuluti na Tumpu, ka' bolimo tumuu' mombatuki pongka'oho' nu beleyum anu susumo naipuan mae, tempo'nyo belemiu ma'isa pe'e nonsumbu' Tumpu.

¹⁵ Panyo, tionyo ahi' komiu susi' i iwi-iwi' na han anu obau nu belemiu, pokakana sumo Tumpu anu molagamo belemiu aijo' susi'.

¹⁶ I uno nu Kitab nu Tumpu tinulismo, “Tionyo ahi' belemiu susi' kalana Aku susi'.”

¹⁷ Komiu monsanggo Tumpu aijo' Tuuma, de komiu balado'a hi Ia. Saba' Tumpumo ai-aijo' na anu momputusi manusia sitimbang tiba anu binau nu toto samian madi' mompile'i pa' ihe. Kalana aitu de belemiu daagi' i dunia aiya, tionyo ahi' belemiu mompopodaka' Tumpu i uno nu kantumuu'an nu belemiu.

¹⁸ Osumbu' nu belemiu apaa na anu binayanakonmo da bau pompobebas belemiu i kantumuu'an anu madi' ko angga'nyo anu pinotatu-tatusakonmo nu mompolee' miu. Pinombayannyo misa' pa' apaa anu timbali ma'idek sumo salaka kabai mosoni',

¹⁹ panyo anu ko angga'nyo hondo; aijo'mo posi butong i Kristus anu tinimbalimo salaku domba, anu kinolobanakon hi Tumpu anu madi' ko panyakitnyo kabai ko kakulangannyo.

²⁰ I Kristus pinile'anmo nu Tumpu ma'isa pe'e dunia aiya pinotimbali. Ka' i sinaa aiya tempo' nu mongahopimo kakiamatan, Ia tinokamo i dunia da belemiu oposalamat.

²¹ Kalana Ia sahingga komiu pinalesayamo hi Tumpu anu po'ule'mo nompotumuu' Ia sinilaka ka' nompopodaka'mo Ia. Jadi Tumpu Allah ahi' na anu opalesaya nu belemiu, ka' hi Tumpu ahi' na bau kataha'imanan nu belemiu.

²² Kalana komiu tulu-tulutan i pangajalan anu lengkat mae hi Tumpu, jadi belemiu mompolomas ahi' butong, ka' halala' ahi' na mongkalibosi to mia-mian anu bubu'mo pokakana na kapalesaya'an. Kalana aijo' tionyo ahi' kinyonyoa miu mompaha kali-kalibosi totu-totu'u samian ka' samian.

²³ Kalana potatae anu tumuu' ka' sampe toka sidu-sidutu' lengkat mae hi Tumpu aijo', belemiu pinotimbalimo manusia bu'ou anu misa' i hampeakon nu manusia, panyo lengkat mae hi Tuuma anu tumuu' sampe toka sidu-sidutu'.

²⁴ I uno nu Kitab nu Tumpu tinulismo sumo uuka, “Iwi-iwi' na manusia sumo hemput, ka' iwi-iwi na katalasanggoannyo sumo buhak nu hemput. Hemput mangkaluale, buhaknyo suele mohontang;

²⁵ panyo potatae nu Tumpu tataap sampe toka sidu-sidutu'.” Potatae nu Tumpu aijo' Lele Ma'ima' anu binebakonmo hi belemiu.