1 KORINTUS 3 - KITAB NU TUMPU ALLA LELE MA'IMAI'

To Posa-posaihon nu Tumpu

¹ To Utu-utus, de o'ala i hondonyo madi' moko ala na aku motatae tiba komiu sumo tiba mian anu ko Roh nu Tumpu. Aku ola moko ala motatae tiba beleyum sumo tiba mian anu daagi' tumuu' mombatuki pongka'oho' nu dunia; sumo mian anu daagi' bunga mea' i kapalesaya'annyo hi Kristus.

² U'utu mae aku ola timbali mombee'i komiu kaanon nu bunga mea', misa' kaanon nu mian anu daka'mo; kalana komiu ma'isa moko ala mongkaan aijo',

³ kalana komiu daagi' tumuu' mombatuki sipat miu salaku mian. Kalana de komiu daagi' mongka'ideki tiba mahantuda' hi samian ka' samian, te misa' aijo' mompotiju' taalu' komiu daagi' tumuu' mombatuki sipat nu mian, sumo to mia-mian anu madi' monsumbu' Tumpu?

⁴ De daagi' ko anu motatae, “Kami mombatuki i Paulus”, ka' sangga'at motatae “Aku mombatuki i Apolos”, te misa' aijo' mompotiju' kita Utus mingkalakuan sumo to mia-mian nu dunia?

⁵ De o'ala i hondonyo, ihe na i Apolos aijo'? Ka' ihe na i Paulus? Kami ola to posa-posaihon nu Tumpu, anu nompotiju'mo hi komiu da palesaya hi Kristus. Kami ola mompojalanakon kalaja anu pinotoong nu Tumpu hi kami toto samian.

⁶ Aku na monsu'an, lantas i Apolos na nondudu'i, panyo posi Tumpu na mompotimbali pomulaonnyo tumuu'.

⁷ Jadi anu penting, aijo'mo Tumpu, kalana Ia na mompotumuu'. Anu monsu'an tiba anu mondudu'i madi' penting;

⁸ ua-ua'aha pokakanamo. Toto samian mohumpakje tambo nu lawenyo.

⁹ Kami to mia-mian anu hingga-hinggat mombau kalaja anu nu Tumpu; ka' komiu aijo' sumomo ale' nu Tumpu. To Utu-utus suele sumo gudang nu Tumpu.

¹⁰ Tiba kapandean anu binee'mo nu Tumpu, aku salaku anu pande mombau gudang, aku nombaumo mesen bau pompotinjoan gudang aijo', ka' mianje sangga'at na mompotinjo gudang i bawo nu mesen aijo'. Toto samian tionyo montoa ima-ima' mosia na ia mompotinjo i bawo nu mesen aijo'.

¹¹ Kalana ola sa'a-sa'angu'nyomo i Yesus Kristus na pino'una' nu Tumpu da timbali mesen pompotinjoan gudang aijo'; madi' ko mesen sangga'at.

¹² Daagi' ko anu nompotinjomo i bawo nu mesen aijo' mompake mosoni', daagi' ko anu nompakemo salaka, daagi' ko anu nompakemo batu mainan, daagi' mule' ko anu nompake kau', hemput manggas kabai haat.

¹³ Kalaja nu batu-batu mian otoaje saidi' mae de i Kristus po'ule'mo toka. Kalana i sinaa aijo' apu mokalajamo da toto samian kantoanmo. Apu monguji'mo ka' mompotantumo angga'nyo nu kalaja aijo'.

¹⁴ De gudang anu pipinotinjomo nu mian i bawo nu mesen aijo' madi' mopapu nu apu, mian aijo' mohumpak tambonyo.

¹⁵ Panyo de kalaja nu mian mopapu ia lugi; ia timbali salamat, panyo sumo mian anu moko ala lumajang montulu apu.

¹⁶ Osumbu' nu kita Utus, saba' komiu Laigan nu Tumpu? Ka' saba' Roh nu Tumpu jojoong i uno nu butong miu?

¹⁷ De ko anu mongidei Laigan nu Tumpu, Tumpu suele mongidei mian aijo'. Kalana Laigan nu Tumpu samata-mata ola Tumpu na tumpunyo, ka' laigan aijo' atina'mo komiu.

¹⁸ Boli kosamian pe'e mosi akali butongnyo. De daagi' ko mian itina' hi komiu mongoa'i butongnyo pande sumo kokoonyo nu dunia aiya, mian aijo' tionyo timbali pe'e ponga', da ia totu-totu'u timbali pande.

¹⁹ Kalana anu osangka pande nu dunia, aijo' ponga' de Tumpu Allah na montoa. I uno nu Kitab nu Tumpu tinulismo, “Tumpu Allah mohakop to mia-mian pande i kapandean nu aha.”

²⁰ Daagi' mule' ko anu tinulis sumo uuka, “Nusumbu' nu Tumpu na pikilan nu to mia-mian pande, te pikilan anu madi' kokaliangannyo.”

²¹ Kalana aijo', boli ko samian pe'e lewa' mompuji-puji' mian, kalana iwi-iwi' binee'mo, beleyumo na tumpunyo:

²² I Paulus, i Apolos, i Petrus, dunia aiya, kantumuu'an tiba kasilakan, tempo' uuka, kabai tempo' anu tokaje mae, iwi-iwi' beleyumo na tumpunyo.

²³ Ka' komiu i Kristusmo na tumpunyo, ka' i Kristus, Tumpu Allah na tumpunyo.