1 KORINTUS 16 - KITAB NU TUMPU ALLA LELE MA'IMAI'

Pontulungi sangko sangalu mian Kristen

¹ Uuka aiya mongkona doi anu kahanda' obee' miu pontulungi sangko sangalu mian Kristen, kupoto'i da aijo' obau miu pokakana sumo sonto' anu pinoto'ingkumo hi to jama-jama'at kiijo' mae i Galatia.

² Sinaa momona anu i sa'angu' na duminggu aijo', kita Utus iwi-iwi' toto samian montoukaimo ahi' doi anu oposi po'iwi'mo sitimbang tiba polioannyo. Po'una na doi aijo' sampe aku toka, da toka i tempo'nyo madi'mo palalu molimu' doi na komiu.

³ De aku tokamo kusaije na to mia-mian anu sinitujuanmo miu. Kubee'ije na aha sulat pongantan, da nu boa nu aha na doi anu bau pontulungi aijo' kiijo' mae i Yerusalem.

⁴ Otoaje de maluanyo tionyo ahi' mamba tiba aku yo aku mambaje hingga-hinggat tiba aha.

Tanga'an i Paulus

⁵ Aku mambaje hi komiu de aku moko lapasmo sonsoo' i Makedonia, kalana aku ko niat sonsoo' i kiijo' mae.

⁶ Ihe na monsumbu' ugaat aku daagi' jojoong sasaingoni' tiba komiu, kugantang kopinnyo otoaje i tempo' nu bakin. Lapas aijo' tulungije miu mae na aku molausakon kalambanan i tampat sangga'at.

⁷ Aku madi' mamba hi komiu ola asan sonsoo'. De nusitujui nu Tumpu gagalanku jojoong gagana pin tiba komiu.

⁸ Hau-haunyo aijo' aku jojoong pe'e i kota Efesus aiya, sampe toka i Sinaa nu Pentakosta.

⁹ Manjoo' na kasampatan i aiya mombau kalaja anu mingguna, mau mule' manjoo' suele na anu madi' mongka'ima'i.

¹⁰ De i Timotius tokamo itina', otalima na ia ma'i-ma'ima' da ia mongoa'i sanang itina' hi komiu, kalana ia pokakanamo sumo aku suele mokalaja mompojalan palentah nu Tumpu.

¹¹ Boli ko anu ola montee ia. Tulungi na ia da ia timbali moko ala molausakon lajangnyo minsusule' mae hi belengku ma'i-ma'ima' kalana aku montanda'i katokaannyo tiba to Utu-utus sangga'at.

¹² Mongkona utusto i Apolos, saja'mo kupoto'i na ia, da ia tiba to Utu-utusto sangga'at mamba molenga komiu. Panyo ia ma'isa talalo junjuhi' na mamba uuka aiya. Panyo de ko tempo'mo tantu ia tokaje itina'.

Pontudui sulat

¹³ O jaga mae ahi' na komiu ka' opohoson na kapalesaya'an i uno nu kantumuu'an salaku mian Kristen. Obau babaani ka' boli mabuhuk na palesaya.

¹⁴ Iwi-iwi' na anu obau miu, obau kalana mongoa'i molibos.

¹⁵ Kita Utus tantu monsumbu' i Stefanus ka' aha sa'anakan; aha na momonanyo tinimbali Kristen i Akhaya. Buke-buke' na kinyonyoa nu aha nokalaja samata-mata mongatun mian anu palesayamo hi Tumpu Allah.

¹⁶ Totu-totu'u kupoto'i da komiu mohongo-hongo pongatun nu to mia-mian anu sumo aijo', tiba to mia-mian sangga'at anu mompahakalaja mompolele Lele Ma'ima' ka' mongatun hingga-hinggat tiba aha.

¹⁷ Sanang na aku kalana tinokamo na i Stefanus, i Fortunatus ka' i Akhaikus. Aha sumo-sumomo komiu na tinoka mae hi belengku.

¹⁸ Aha nompolame'mo kinyonyoangku, sumo aha nompolame'mo kinyonyoa miu. To mia-mian anu susumo aijo' tionyo ahi' o'angga'i.

¹⁹ To jama-jama'at i Asia mompotoka salan do'a nu aha hi komiu. I Akwila ka' i Priskila tiba Jama'at anu sinihuk i laigan nu aha suele nompakatu mae salan do'a daka-daka' salaku salan do'a nu mian Kristen.

²⁰ Iwi-iwi' na to Utu-utus i aiya mompotoka salan do'a hi komiu. Mompaha sala-salan do'ai nu kalibosan susumo poto utusan nu mian Kristen.

²¹ Kupaka tuangi i aiya nu salan do'a anu pinosi tulisku: Salan do'a lengkat hi belengku, i Paulus.

²² Mian anu madi' mongkalibosi Tumpu, nukutuki nu Tumpu na ia! Maranatha – Tumpu mami, tinokamo!

²³ O amalakon da Tumpunto i Yesus mombalakati kita Utus.

²⁴ Ka' mule' kalibosanku toka hi komiu Utus iwi-iwi' anu nosa'angu'mo tiba i Kristus Yesus. Tabea' mami, I Paulus 47