1 KORINTUS 15 - KITAB NU TUMPU ALLA LELE MA'IMAI'

I Kristus sinilaka po'ule' pinotumuu'

¹ Ka' uuka aiya, to Utu-utus, gagalanku komiu po'ule' pe'e monginau' Lele Ma'ima' lengkat mae hi Tumpu anu pinolelengkumo u'utu mae hi belemiu. Komiu nontalimamo ka' nompalesayamo i Kristus, kalana Lele Ma'ima' aijo'.

² De komiu montoongi dodo-dodo apaa na anu pinolelengkumo aijo', yo Lele Ma'ima' aijo' momposalamat komiu; asan ahi' boli ola kita Utus palesaya padahan madi' mangalati'.

³ Apaa na anu pinotokangkumo hi to Utu-utus, atina'mo na anu titinalimangkumo suele. Anu penting, sumo anu tinulismo i Kitab nu Tumpu, pinotokangkumo hi komiu saba' i Kristus sinilaka kalana to dosa-dosa'to;

⁴ saba' Ia i lamun panyo ilapas mae Ia po'ule'mo pinotumuu' i sinaa kino itolunnyo. Aijo' suele tinulismo i uno nu Kitab nu Tumpu.

⁵ Pinoto'ingku mule' hi belemiu tukoongku i Kristus anu po'ule'mo pinotumuu' aijo' nompotoa suele butong-Nyo hi Petrus, ka' ilapas mule' hi sampulu' ka' ohua' na rasul.

⁶ Lapas aijo' Ia nompotoa butong-Nyo mule' hi lima atu na anu saja' mombatuki Ia, aitu pe'e ugaat molabi tempo'nyo aitu. Kanjoo'annyo na mian haha aijo' daagi' tumuu' tempo' uuka aiya, ola toto sangga'at na sinilakamo.

⁷ Lapas aijo' i Kristus nompotoa mule' suele butong-Nyo hi Yakobus, ka' ilapas aijo' hi iwi-iwi' na rasul.

⁸ Pupuusnyomo hondo Ia nompotoa butongnyo suele hi belengku – aku anu susumo bungamea' i hampe misa' pe'e tempo'nyo!

⁹ Aku te Rasul nu Tumpu anu talalo i aluknyo. Aku misa' konanyo na osanggohi rasul, kalana aku nonsakisamo jama'at nu Tumpu.

¹⁰ Panyo kalana balakat nu Tumpu aku tinimbalimo susumo tinuu'ku uuka aiya. Ka' madi' pinalasuma na Tumpu nongampunimo aku. Pakalaus aku ahi' na mokalaja lebe makeke molingkudui rasul kanjoo'annyo sangga'at. Panyo sabenannyo aijo' misa' usahangku; aijo' usaha nu Tumpu anu mongkalibosi aku ka' mokalaja hingga-hinggat ka' aku.

¹¹ Singkop, mau mule' pa' hi he na pohumpakan miu Lele Ma'ima' aijo' – pa' aijo' lengkat hi belengku kabai lengkat mae hi to rasul-rasul sangga'at – aijo' madi' mongkuka. Anu penting aijo'mo kami mompolele Lele Ma'ima' aijo' ka' kita Utus palesayamo.

Mosia na mian anu sinilakamo po'ule' opotumuu'

¹² De anu opolele mami, aijo'mo i Kristus anu sinilakamo po'ule' pinotumuu', kadaka' daagi' ko anu itina' hi komiu notatae tukoonyo, mian anu sinilakamo madi'mo po'ule' opotumuu'?

¹³ De totu-totu'u mian anu sinilakamo madi'mo po'ule' opotumuu', aijo' mongalati'i i Kristus suele sinilaka madi'mo po'ule' pinotumuu'.

¹⁴ Ka' de bisuannyo i Kristus sinilaka madi'mo po'ule' pinotumuu', saba' madi' ko kaliangannyo na kami mompolele apa-apaa ka' madi' ko kaliangannyo mule' na komiu palesaya, kalana komiu palesaya aijo' madi' ko bau pintoongan apa-apaa.

¹⁵ Lebe-lebe mule' nyata' kami binaleko'mo na monsisik Tumpu Allah, kalana kami nompolelemo i Kristus sinilaka po'ule'mo pinotumuu' nu Tumpu, yo aitu Tumpu madi' ahi' po'ule' nompotumuu' Ia – de memang totu'u mian silaka madi'mo po'ule' opotumuu'!

¹⁶ Kalana de mian silaka madi'mo po'ule' opotumuu', makia' i Kristus sinilaka suele madi'mo po'ule' pinotumuu'.

¹⁷ Ka' de i Kristus madi'mo po'ule' pinotumuu' nyata' palesaya miu ola sumo anu ingipi; aijo' alati'nyo komiu daagi' i uno nu dosa' ka' madi' ko anu opitaha-taha' imani.

¹⁸ Aijo' alati'nyo mule' taalu' to mia-mian Kristen anu sinilakamo sumo aijo', suele madi' ko anu opitaha-taha'imani.

¹⁹ De anu otaha'imaninto hi Kristus ola kona i kantumuu'anto i dunia aiya, taalu' iwi-iwi' na mian i dunia aiya, kitamo na anu talalo madi' ningkaliangan!

²⁰ Panyo nanasamo i Kristus sinilaka po'ule' pinotumuu'. Aijo'mo na katantuannyo taalu' to mia-mian anu sinilakamo po'ule' ahi' opotumuu'.

²¹ Kalana kasilakan ninsoop i dunia nimpu'u hi samian, sumo aitu mule' silaka po'ule' opotumuu' binee' hi mian nimpu'u hi samian suele.

²² Sumo mian iwi-iwi' tionyo silaka kalana pinokakanakonmo sumo i Adam, sumo aitu mule' iwi-iwi' po'ule' opotumuu' kalana opokakanakonmo sumo i Kristus.

²³ Panyo toto samian po'ule' opotumuu' ko posi tempo-tempo'nyo; momonanyo i Kristus; lapas aijo' de po'ule'mo Ia toka mae, sueleje to mia-mian anu i Kristusmo na tumpunyo.

²⁴ Lapas aijo' tokamo na kakiamatan. Tempo'je aijo' ka' i Kristus mompotundu' iwi-iwi na kapalentahan, iwi-iwi na kuasa, ka' iwi-iwi na kahosonan; lantas nubee'mo na kakuasa'an-Nyo salaku Tomundo, hi Tumpu, Tuumanto.

²⁵ I Kristusmo na saja' mompalentah sampe Tumpu mompotimbalimo iwi-iwi' na sampo bali' i Kristus matundu'mo hi Kristus.

²⁶ Sampo bali' anu imihinyo opotundu' aijo'mo kapatean.

²⁷ I uno nu Kitab nu Tumpu tinulismo sumo uuka, “Tumpu Allah nompotimbalimo iwi-iwi na apaa natundu'mo hi Ia.” Nanasamo taalu' anu nu nupatui nu “iwi-iwi na apaa” aijo' madi' minsoop na Tumpu anu nombaumo iwi-iwi na aijo' matundu' hi Kristus.

²⁸ Panyo salatan iwi-iwi' tinundu'mo i aluk nu kapamalentahan i Kristus, saba' posi Ia, aijo'mo Anak nu Tumpu, montundu'akonmo butong-Nyo hi Tumpu anu nompotimbalimo iwi-iwi' matundu' hi Ia. Sahingga Tumpumo na mompalentah iwi-iwi'.

²⁹ De mian silaka madi'mo po'ule' opotumuu', kadaka' daagi' ko mian anu opalamandikan te aijo' gunanyo kona hi mian anu sinilakamo? Apaa na gunanyo aha mombau hahan anu sumo aijo'? De memang mian silaka madi'mo hondo-hondo po'ule' opotumuu', apaa na gunanyo aha mombau hahan anu sumo aijo'?

³⁰ Ka' bau apaa na gunanyo sahingga kami mongka'oho' mongahopi kasusa'an sansina-sinaa?

³¹ To Utu-utus! Sansina-sinaa aku monta'up sansala kalana aku sanang na montoa kantumuu'an miu, kalana komiu pinalesayamo hi Kristus Yesus Tumpunto.

³² De aijo' ola lengkat i pikilan nu mian, apaa na untungnyo hi belengku mompagala mokalaja susumo anu mongewa to bina-binatang bisa' i kota, i Efesus aiya? De totu'u mian silaka madi'mo po'ule' opotumuu', yo lebe ma'ima' obatukintomo na ande-andeon aiya: “Imbo' da kita mongkaan monginum ka' basanang-sanang kalana dodop manau' kita silakamo.”

³³ Boli o akali! Po'imboan anu ma'idek mongidei kalakuan anu ma'ima'.

³⁴ Sinumbu'mo uuka aiya, ka' bolimo mombau dosa'. Sabenannyo pa'a-pa'ambangmo ahi' na komiu, kalana itina' hi komiu daagi' ko anu ma'isa nonsumbu' Tumpu.

Butong nu mian de silakamo ka' po'ule'mo opotumuu'

³⁵ Ihe na monsumbu' daagi' ko anu mompokilawa, “Mosia na mian anu silakamo po'ule' opotumuu'? Butong anu momosia na obee' hi aha, de aha po'ule'mo opotumuu'?”

³⁶ Ponga' hondo! De kita Utus mosu'an bine' i tano', bine' aijo' madi' tumuu', de bine' aijo' madi' mate pe'e.

³⁷ Ka' bine' anu o tugan nu kita Utus i tano' aijo' – pa' bine' nu gandum kabai bine' nu sangga'atannyo – ola batu nu bine' aijo', misa' iwi-iwi' anu o tugan na tumuu' saidi' mae.

³⁸ Posi Tumpu na mombee' hi bine' aijo', tali'-Nyo anu nutoa ma'ima' i sosu'anon haha aijo'. Toto sa'angu' na ngahan nu bine', nu posi bee'i nu Tumpu tali'-Nyo i sosu'anon haha aijo'.

³⁹ Butong nu anu pinotimbalimo nu Tumpu, anu ko santuu'nyo madi' iwi-iwi' pokakana. Mian sangalasan na butongnyo, to bina-binatang sangalasan na butongnyo; to tomo-tomonsi' sangalasan mule' na butongnyo, ka' to ika-ikan sangalasan mule' na butongnyo.

⁴⁰ Sumo aitu mule' apa-apaa aita' i langit tiba apa-apaa aiya i dunia. Anu apa-apaa aita' i langit ima'nyo toto sa'angu' madi' pokakana, ka' apa-apaa anu i dunia aiya sumo aitu mule'.

⁴¹ Ka'ima'an nu batu nu sinaa madi' pokakana tiba ka'ima'an nu bitu'on. To manda-mandala' mule' ko posi ka'ima'annyo. Aitu pe'e to manda-mandala' haha aita' mosi-mosi sangalasan na ko'ima'nyo.

⁴² Sumo aitu mule' saidi' mae na balu-balu'nyo nu to mia-mian silaka anu po'ule' opotumuu'. Butong anu olamun aijo', aijo'mo butong anu timbali ma'idek; panyo butong anu po'ule' opotumuu', aijo'mo butong anu madi' toho' ma'idek.

⁴³ De butong aijo' olamunmo, butong aijo' ma'idekmo ka' madi'mo moko henggo; panyo de ia po'ule'mo opotumuu', ia aijo' timbalimo butong anu ma'ima' ka' mahosonmo.

⁴⁴ Tempo'nyo i lamun, butong aijo' butong lengkat i dunia; panyo salatan po'ule'mo tumuu', saba' butong aijo' butongmo anu binee' nu Roh nu Tumpu. Daagi' ko butong anu lengkat mae i dunia daagi' mule' ko butong anu lengkat hi Tumpu.

⁴⁵ I uno nu Kitab nu Tumpu tinulismo sumo uuka, “Mian anu momona aijo'mo i Adam anu binau ka' pinotumuu',” panyo i Adam anu imihi-mihinyo aijo'mo Roh anu mombee'i kantumuu'an.

⁴⁶ Anu tinoka momona ola mintabiat nu dunia, misa' mintabiat nu Roh. Anu mintabiat nu Roh tokaje i mihi.

⁴⁷ I Adam anu momona tano' na binau, panyo i Adam anu ko ohua'nyo nolengkat mae i suluga'.

⁴⁸ To mia-mian i dunia aiya sumo i Adam anu momona tano' na binau, panyo to mia-mian nu suluga' aijo', sumo Ia anu tinoka lengkat mae i suluga'.

⁴⁹ Susumo kita uuka aiya pokakana i Adam tano' na binau, saba' saidi' mae kita timbalije sumo Ia anu lengkat mae i suluga'.

⁵⁰ Anu nupatui nu potataengku to Utu-utus, aijo'mo butong anu baso' ka' antok na pinotimbali, madi' moko ala minsoop i Dunia Bu'ou nu Tumpu; ka' butong anu timbali silaka madi' moko ala tumuu' sidu-sidutu'.

⁵¹ Boli okolilimi na lahasia aiya: Madi' iwi-iwi' kita silaka, panyo kita iwi-iwi' obali'imo.

⁵² Han aijo' monti-montiik timbalimo i uno nu sangkinihap na mata, de opoko po'onyi'mo na tolompet anu imihi hondo aijo'. Kalana salatan ohongomo na onyi' nu tolompet aijo', to mia-mian anu sinilakamo po'ule'mo opotumuu' timbalimo butong anu sampe toka sidu-sidutu', ka' kita iwi-iwi' obali'imo.

⁵³ Butongto anu timbali silaka aiya tionyo ahi' obali'imo nu butong anu madi' silaka, ka' butong anu lengkat i dunia aiya tionyo ahi' obolosimo nu butong anu lengkat mae i suluga'.

⁵⁴ De butong anu timbali silaka obolosimo nu butong anu madi' silaka, ka' butong anu lengkat i dunia aiya obolosimo nu butong anu lengkat mae i suluga', tempo'je aitu ka' timbalimo apaa na anu tinulismo i Kitab nu Tumpu, “Kapatean i hungku'anmo; ka'untungan i humpakmo!”

⁵⁵ “O kasilakan, iyamo na ka'untunganum? O Kasilakan, iyamo na bisa'um?”

⁵⁶ Bisa' nu kasilakan aijo'mo dosa', ka' dosa' mompojalan kuasanyo montului atulan nu agama.

⁵⁷ Panyo talima kase hi Tumpu; Ia nombee'imo kita ka'untungan da madi'mo nu kuasai nu dosa', anu tinalimantomo hi Yesus Kristus Tumpunto!

⁵⁸ Mokonyo aijo', to Utu-utus anu ku ku kanonongi, tionyo ahi' komiu mahoson ka' moko ala montahan soba'an. Saja' mokalaja totu-totu'u bau kapentingan nu Tumpu, kalana osumbu' miu, iwi-iwi' na anu obau miu bau kapentingan nu Tumpu, madi' ola palasuma.